ရန်ကုန်မြို့တွင် ကျင်းပနေသော အာရှတိုက်လုံးဆိုင်ရာ ဘာသာပေါင်းစုံညှိနှိုင်းအစည်းအဝေးတွင် ရခိုင်ဒေသ လတ်တလော ပဋိပက္ခအကြောင်း ထည့်သွင်း ဆွေးနွေးသွားမည်ဟု သိရသည်။
နိုင်ငံတကာမှ ကိုယ်စားလှယ်များ တက်ရောက်နေသည့် ထိုအစည်းအဝေး ဖွင့်ပွဲအခမ်းအနားကို မတ်လ ၅ ရက်နေ့ နံနက်ပိုင်းတွင် ပြုလုပ်ရာ သာသနာရေးနှင့် ယဉ်ကျေးမှုဝန်ကြီး သူရဦးအောင်ကို တက်ရောက်ခဲ့သည်။
ငြိမ်းချမ်းမေတ္တာအဖွဲ့က ဤအစည်းအဝေးဖြစ်မြောက်ရေး စီစဉ်ခြင်း ဖြစ်ပြီး ထိုအဖွဲ့က ၂၀၂၀ အထိ မြန်မာနိုင်ငံတွင် ပြုလုပ်မည့် အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဆိုင်ရာ ဆွေးနွေးပွဲများကို ဝန်ကြီးဌာနက ကူညီသွားမည်ဟု ဝန်ကြီးက အဖွင့်မိန့်ခွန်းတွင် ထည့်သွင်းပြောကြားခဲ့သည်။
ထိုအဖွဲ့၏ဥက္ကဋ္ဌ ဦးမြင့်ဆွေက နိုင်ငံပေါင်းစုံမှ ဘာသာရေးခေါင်းဆောင်များနှင့် တွေ့ဆုံ ညှိနှိုင်းခြင်းမှာ မတူကွဲပြားသည့် ဘာသာဝင်တို့ကြား ဖြစ်ပွားနေသည့် ပဋိပက္ခကို ချေဖျက်နိုင်ရေး၊ ပြည်တွင်း ငြိမ်းချမ်းရေးတို့အတွက် များစွာ အထောက်အကူ ပြုစေသည်ဟု ဆိုသည်။
“အထူးသဖြင့် ဗုဒ္ဓဘာသာတွေဟာ တခြားဘာသာဝင်တွေပေါ် ဘယ်လိုသဘောထားတယ်ဆိုတာ မြင်သွားတဲ့အခါ အများကြီး အကျိုးကျေးဇူးရပါလိမ့်မယ်။ အထင်လွဲနေတာတွေ၊ အမြင်လွဲနေတာတွေ ကျွန်တော်တို့ကို စွပ်စွဲနေတာတွေက မဟုတ်မှန်ဘူး ဆိုတာ သက်သေပြနိုင်ပါလိမ့်မယ်” ဟု ဦးမြင့်ဆွေက သတင်းထောက်များကို ပြောသည်။
ငါးနှစ်တစ်ကြိမ် ကျင်းပလေ့ရှိသည့် Religions for Peace ကမ္ဘာလုံးဆိုင်ရာ ညီလာခံကြီးကို လာမည့် သြဂုတ်လ ဂျာမနီနိုင်ငံတွင် ပြုလုပ်မည်ဖြစ်ပြီး မြန်မာနိုင်ငံ၏ စစ်ဘေးရှောင်ဒုက္ခသည်များ၏ အခန်းကဏ္ဍကို ထည့်သွင်း ဆွေးနွေးသွားမည်ဟု ၎င်းက ဆက်ပြောသည်။
ကမ္ဘာလုံးဆိုင်ရာ ညီလာခံတွင် နိုင်ငံတကာ ကိုယ်စားလှယ်တို့က အစီရင်ခံစာများကို တင်ပြလေ့ရှိပြီး သြဂုတ်လညီလာခံတွင် တင်သွင်းမည့် အာရှတိုက်လုံးဆိုင်ရာ အစီရင်ခံစာအတွက် ရန်ကုန်တွင် ညှိနှိုင်းအစည်းအဝေး ကျင်းနေခြင်း ဖြစ်သည်။
