ရန်ကုန် – ရန်ကုန်၊ လှည်းကူးမြို့နယ် ကျူးကျော်ရပ်နေအိမ်ဖျက်သိမ်းခံရသူများက မြေကွက်လိမ်လည်ရောင်းချသွားသူတို့ကို တရားစွဲဆိုသွားမည်ဟု သြဂုတ်လ ၅ ရက်နေ့က သတင်းထောက်များကို ပြောသည်။
၎င်းတို့၏ ရှေ့နေ ဦးအောင်သူရိန်ထွန်းကလည်း ဇွန်လ ၁၅ ရက်နေ့ လှည်းကူးရဲစခန်းတွင် အမှုဖွင့် တိုင်ကြားထားမှုမှာ ယနေ့အချိန်အထိ ထူးခြားမှု မရှိသေးကြောင်း၊ တစ်ပတ်အတွင်း တရားစွဲဆိုနိုင်ရန် ပြင်ဆင်နေကြောင်း ပြောသည်။
“နို့တစ်စာ ပစ်ပြီး တရားစွဲဖို့ဆိုရင် လိမ်လည်ရောင်းချသူ ၂၇ ဦးရဲ့ အချက်အလက်တွေ လိုတယ်။ လောလောဆယ်က အချက်အလက်တွေ စုဆောင်းဆဲအဆင့်ပဲ ရှိပါသေးတယ် ” ဟု ကျူးကျော်များအတွက် လိုက်ပါ ဆောင်ရွက်ပေးနေသည့် ဦးအောင်သူရိန်ထွန်းက ပြောသည်။
အမှုအခြေအနေနှင့်ပတ်သက်၍ လှည်းကူးမြို့နယ်ရဲစခန်းကို ဆက်သွယ်မေးမြန်းရာ လက်ခံဖြေကြားပေးနိုင်မည့် အမှုစစ်အရာရှိတို့ စခန်းတွင် ရှိမနေကြောင်း တာဝန်မှူး ရဲအုပ်မောင်မောင်ဇော်ထံမှ သိရသည်။
ဇွန်လလယ်ပိုင်းက အမြန်လမ်းမကြီးဘေးရှိ ကျူးကျော်နေအိမ် ၆,၀၀၀ ခန့် ကို တိုင်းအစိုးရ၏ ညွှန်ကြားချက်ဖြင့် ရှင်းလင်းဖယ်ရှားခဲ့သည်။
ထိုနေရာတွင် လူနေအိမ်၊ အပန်းဖြေစခန်းတို့ ပါဝင်သည့် စီမံကိန်းတစ်ခုကို စတင်လျက်ရှိကြောင်း၊ လူနေအိမ်ခန်း ၄,၀၀၀ ခန့် ဆောက်လုပ်ရန်အတွက် မြေပြင်ခြင်းလုပ်ငန်း ပြီးစီးသွားပြီဖြစ်ကြောင်း မြို့ပြနှင့် အိမ်ရာဖွံ့ဖြိုးရေး ဦးစီးဌာန ညွှန်ကြားရေးမှူး ဦးယုခိုင်ထံမှ သိရသည်။
အိမ်ဖျက်ခံရပြီး ရက်ပိုင်းအတွင်း နစ်နာသူများက လာရောက်တွေ့ဆုံခဲ့ကာ ၎င်းတို့၏ အခက်အခဲကို ကူညီဖြေရှင်းပေးရန်၊ လိမ်လည်ရောင်းချသွားသူများအား အမြန်ဆုံးအရေးယူပေးရန် တောင်းဆိုခဲ့သည်ဟု ဦးယုခိုင်က ဆိုသည်။
“သူတို့တင်ပြပြီး နောက်နေ့ပဲ တိုင်းအစိုးရရုံးကို အစီအရင်ခံစာ တင်လိုက်တယ်။ လောလောဆယ်တော့ ဘာမှ အကြောင်းမပြန်သေးဘူး” ဟု ဦးယုခိုင်က ပြောသည်။
