ရန်ကုန်၊ မင်္ဂလာဒုံမြိုနယ်၊ ပြည်လမ်းနှင့် အမှတ် ၃ လမ်းကြားရှိ ရပ်ကွက် ၅ ခုမှ အိမ်ခြေ တစ်သောင်းကျော်ကို ၅ ရက်အတွင်း ပြောင်းရွှေ့ပေးရန် စစ်ကောင်စီက စာပို့ အကြောင်းကြားထားပြီး ဒေသခံ ၅ သောင်းခန့် အိုးမဲ့အိမ်မဲ့ဖြစ်မည့်အခြေအနေမျိုးနှင့် ရင်ဆိုင်နေရသည်ဟု ရပ်ကွက်နေသူများက Myanmar Now ကို ပြောသည်။
ပျဉ်းမပင်ကျေးရွာအုပ်စုအတွင်း ကာကွယ်ရေးဝန်ကြီးဌာနပိုင်၊ ပျဉ်းမပင်စက်မှုဇုန် ဧရိယာ ၅၆၀ ဒသမ ၀၆ ဧက ခန့်ရှိမြေပေါ်ရှိ ကျူးကျော် အဆောက်အဦများကို လာမည့် နိုဝင်ဘာ ၁၈ နောက်ဆုံးထား၍ မဖျက်သိမ်းပေးပါက တည်ဆဲဥပဒေအရ အရေးယူ ဆောင်ရွက်သွားမည်ဟု စစ်ကောင်စီက ဒေသခံများကို ပေးပို့ထားသည့် ထိုကြေညာချက်တွင် ပါရှိသည်။
၅ ရက်အတွင်း ဖျက်သိမ်းပေးရန် ညွှန်ကြားထားသည့် ပျဉ်းမပင်ကျေးရွာအုပ်စုတွင် စံသမာဓိ၊ မြဲမြံအောင်၊ ဂုံညင်းနီ၊ ဓမ္မပါလနှင့် မြဝတီ စိုင်းခင်း (၁)၊(၂) ရပ်ကွက်များ ပါဝင်ပြီး ရန်ကုန်ပြည်လမ်းနှင့် အမှတ် ၃ လမ်းမကြား အချက်အချာကျသည့်ဒေသ ဖြစ်သည်။
ယမန်နေ့ (နိုဝင်ဘာ ၁၃) နံနက်က စစ်ကောင်စီလက်နက်ကိုင် ၅၀ ခန့် စစ်ကား ၅ စီးဖြင့် စံသမာဓိရပ်ကွက်သို့ ရောက်ရှိလာပြီး နိုဝင်ဘာ ၁၈ တွင် အပြီးသတ် ပြောင်းရွှေ့ဖယ်ရှားပေးရန် ကြေညာကာ အမိန့်စာ များကိုပါ ဝေငှခဲ့သည်ဟု ထိုရပ်ကွက်တွင် နေထိုင်သူ အသက် ၄၁ နှစ်အရွယ် အမျိုးသားက ပြောသည်။
“အပြီးရွှေ့ပေးပါပေါ့။ မရွှေ့ပေးရင် ဥပဒေနဲ့ အညီ အရေးယူသွား မယ်ဆိုပြီးတော့ အော် လည်း အော်သွားတယ်။ စာတွေလည်း လိုက်ပို့သွားတယ်။ မဖယ်ပေးရင် ဥပဒေအရ အရေးယူမယ်။ သူတို့ ကိုယ်တိုင် လာဖျက်သွားမယ်ပေါ့” ဟု ၎င်းက ပြောသည်။
ပေ ၁၀၀၊ ပေ ၆၀ အကျယ်မြေကွက်ကို ပြီးခဲ့သည့် ၁၀ နှစ်ခန့်က ကျပ်ငွေ သိန်း ၂၅၀ ကျပ်ဖြင့် ဝယ်ယူထားခဲ့ခြင်း ဖြစ်ပြီး ပြောင်းရွှေ့ရန် နေရာမရှိသဖြင့် အခက်အခဲကြုံနေရသည်ဟု ထို အမျိုးသားက ဆက်ပြောသည်။
“ကျွန်တော့် ဘေးအိမ်တွေကို မေးကြည့်တာတော့ သိပ်စိတ်မပူနဲ့ပေါ့ဗျာ။ တကယ်လို့ ဖြစ်သွားခဲ့ရင်လည်း ဘယ်သူမှ မသွားကြ၊ မဖယ်ကြနဲ့ပေါ့ဗျာ။ စုစုစည်းစည်းနဲ့သာ နေကြဖို့ပေါ့။ တချို့ကလည်း အိမ်မှာပဲနေရင် အဖျက်ခံမယ်ပေါ့ဗျာ။ တချို့ကျတော့လည်း အိမ်မှာပဲနေပြီး အသေခံမယ်ပေါ့ဗျာ။ အမျိုးမျိုးပြောနေကြ တာပေါ့” ဟု ၎င်းက ဆိုသည်။
စံသမာဓိရပ်ကွက်တွင် အိမ်ထောင်စု ၁၄၂၂ စု၊ လူဦးရေ ၅၆၈၈ ဦးရှိသည်။
စစ်ကောင်စီက လာရောက် အကြောင်းကြားစာ ပေးပို့ပြီးနောက် စံသမာဓိ ရပ်ကွက်ရှိ ရပ်မိ၊ ရပ်ဖများ စုစည်းကာ အစည်းအဝေးပြုလုပ်ခဲ့ကြောင်း၊ လတ်တလောတွင် ဖယ်ရှားပေးရန် မဖြစ်နိုင်သည့်အတွက် နေအိမ်များကို အကြမ်းဖက် လာရောက်ဖယ်ရှားပါကလည်း ဆက်လက်ရင်ဆိုင်သွားရန် ဆုံးဖြတ်ထားကြောင်း စံသမာဓိရပ်ကွက်တွင် နေထိုင်သည့် အသက် ၄၃ နှစ် အရွယ် ဒေသခံ နောက်ထပ် အမျိုးသားတစ်ဦးက ပြောသည်။
“ကျွန်တော်တို့ ဒေသခံတွေကတော့ လောလောဆယ် အနေအထားကတော့ ဖယ်ပေးဖို့ဆိုတာက နေစရာ မရှိတာနဲ့ကို မလွယ်လှဘူးဗျ။ ကြိုတင်စီမံထားတာတော့ မရှိသေးဘူး။ သူတို့ရဲ့ စီမံခန့်ခွဲမှု အပေါ်မှာပဲ မူတည်ပြီးတော့ ရှေ့ဆက်လျှောက်ရမယ်လို့ မြင်တယ်ဗျ” ဟု သူက ပြောသည်။
ပျဉ်းမပင် ကျေးရွာအုပ်စုတွင် နေထိုင်သူအများစုမှာ မြန်မာဘီယာစက်ရုံနှင့် အထည်ချုပ် စက်ရုံများတွင် အလုပ် လုပ်ကိုင်ကြသည့် အလုပ်သမားမိသားစုများဖြစ်ပြီး လက်ရှိနေအိမ်မှ ပြောင်းရွှေ့ဖယ်ရှားပေးရန် အခက် အခဲနှင့် ရင်ဆိုင်နေရသည်ဟု ဒေသခံများထံမှ သိရသည်။
စစ်အာဏာသိမ်းမှုနှင့် ရင်ဆိုင်ခဲ့ရပြီးနောက် ၂၀၂၁ ခုနှစ် အတွင်း မြန်မာနိုင်ငံတွင် အလုပ်သမား ၁ ဒသမ ၆ သန်း ကျော် အလုပ်လက်မဲ့ဖြစ်ခဲ့ရသည်ဟု အပြည်ပြည်ဆိုင်ရာ အလုပ်သမားရေးရာ အဖွဲ့ (ILO) က ထုတ်ပြန်ထားပြီး အလုပ်သမားအများစု နေထိုင်ရာ စက်မှုဇုန် အနီးတစ်ဝိုက်ရှိ ကျူးကျော် ရပ်ကွက်များလည်း ဆက်တိုက်ဆိုသလို ပင် ဖျက်ဆီးခံနေရသည်။
ပြီးခဲ့သည့်နှစ် အောက်တိုဘာလကလည်း လှိုင်သာယာ စက်မှုဇုန် အနီးရှိ ရန်ကုန်၊ လှိုင်သာယာမြိုနယ် ၊ ဘုရင့်နောင် တံတားအဆင်း ရန်ကုန်-ပုသိမ်လမ်းမ တလျှောက်ရှိ ကျူးကျော်နေအိမ်များကို စစ်ကောင်စီက အင်အားသုံးဖျက်သိမ်းခဲ့ရာ လူဦးရေ သိန်းနှင့်ချီပြီး အိုး၊အိမ်မဲ့ ဖြစ်ခဲ့ရသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်။)
