(ဓာတ်ပုံ-မိုးဦး/Myanmar Now)
နိုင်ငံအလယ်ပိုင်း မကွေးတိုင်း၊ ပခုက္ကူခရိုင်၊ ပေါက်မြို့နယ်အတွင်း စိုက်ပျိုးရေးလုပ်ငန်းမရှိ၊ ကုန်သွယ်ရန် လမ်းပန်းမသင့်သည့် တော ၊တောင်တို့အတွင်း နေထိုင်ကြရသည့် စစ်ဘေးရှောင်တို့သည် ကပ်မိုး၊ ကပ်ကာ တဲငယ်လေးများဖြင့် နေထိုင်ကြရသည်။
ရောက်ရှိရာဒေသမှ သစ်စိုက်ခင်းပိုင်ရှင်တို့ထံ အကူအညီတောင်းခံပြီး၊ တဲထိုး၍ရရုံသာရှိသည့် မျောတိုင် နှင့် ဝါးတို့ဖြင့် ဆောက်လုပ်ထားသည့် တဲငယ်ပေါင်း ရာနှင့်ချီရှိသည့် စစ်ဘေးရှောင်စခန်းပေါင်းများစွာ ပေါက်မြို့နယ်အတွင်းရှိနေသည်။
အဆိုပါ စစ်ဘေးရှောင်များ ခိုလှုံနေထိုင်ရသည့်ဒေသသည် ကုန်ကူးသန်းရောင်းဝယ်ရန်လည်း လမ်းပန်း ဆက်သွယ်ရေး ခက်ခဲသည့်နေရာတွင် ဖြစ်သလို စိုက်ပျိုးရေးလုပ်ငန်းမဖွံ့ဖြိုးသဖြင့် လယ်ယာအကူ အငှားလိုက်ခြင်းဖြင့် ဝင်ငွေရှာရန် အခွင့်အလမ်းနည်းပါးလှသည်။
ထို့ကြောင့် ပေါက်ဒေသ စစ်ဘေးရှောင်စခန်းအများစုတွင် ဝင်ငွေရရန် ဝါးကြောဖျာ ရက်လုပ်ခြင်း လုပ်ငန်းတစ်ခုသာ ရှိသည်။ အဆိုပါဝါးကြောဖျာအတွက် လိုအပ်သည့် နှီးဆွဲခြင်း (ဝါး၏အပေါ်ယံ အကြောကို ခွာယူခြင်း)၊ ဝါးခုတ်ခြင်းကဲ့သို့သော လုပ်ငန်းသည်သာ ရွေးချယ်စရာဖြစ်ပြီး၊ ထိုလုပ်ငန်း သည် လူတိုင်းလုပ်နိုင်သည့် လုပ်ငန်းလည်းမဟုတ်သလို၊ နေ့စဉ် လုပ်နိုင်သည့် လုပ်ငန်းတစ်ခုလည်း မဟုတ်ပေ။
နှီးဆွဲခြင်းလုပ်ငန်းမှ တစ်ရက်လျှင် ကျပ်ငွေ ၁၆၀၀၀ သာ ရရှိပြီး ဖျာရက်သူများသည်လည်း တစ်ရက်လျှင် ဖျာတစ်ချပ်သာ ရက်နိုင်ကြပြီး၊ ထိုဖျာရက်လုပ်ခအနေဖြင့် ၁၅၀၀၀ ကျပ်ခန့်သာ ရရှိသည်။
တစ်မြို့နယ်လုံးတွင် စစ်ဘေးရှောင် လူဦးရေ ၁၀၀၀၀ ကျော်ရှိသည်ဟု ပေါက်မြို့နယ် လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဌာနထံက သိရသည်။
ပေါက်ဒေသ စစ်ရှောင်စခန်းများတွင် ကလေးများ ပညာရေး၊ အရေပြား ရောဂါနှင့် သောက်သုံးရေ အခက်အခဲအပါအဝင် အခက်အခဲများစွာ ရင်ဆိုင်ရလျက်ရှိသည်ဟု ဆိုကြသည်။
ပေါက်မြို့နယ်တွင် နှစ်နှင့်ချီ၍ ကာလရှည်စစ်ရှောင်နေရသော ကျေးရွာ ၅၂ ရွာမှ လူဦးရေ ၂၄၀၀၀ ကျော် အထိရှိပြီး အမှတ် (၂၄) ကာကွယ်ရေး လက်နက်ပစ္စည်းစက်ရုံ (ကပစ ၂၄ )အနောက်တောင်ဘက်မှ မျှားပိုင်းနှင့် ခင်အေးစသည့် ရွာများမှ ဒေသခံများသည် ၂၀၂၃ ခုနှစ် ကတည်းက စစ်ရှောင်ခဲ့ကြရသည်။
ပေါက်မြို့နယ်တွင် မြို့ပေါ်ရပ်ကွက် လေးခုရှိပြီး ကျေးရွာ အုပ်စု ၇၁ အုပ်စု၊ ကျေးရွာပေါင်း ၂၃၅ ရွာ ရှိကြောင်း အထွေထွေအုပ်ချုပ်ရေးဦးစီးဌာန စာရင်းများအရ သိရသည်။ ၂၀၂၃ ခုနှစ် မတ်လကုန်ထိ ပေါက်မြို့နယ်တွင် နေထိုင်သည့် လူဦးရေ နှစ်သိန်းကျော်ရှိသည်။
ပေါက်မြို့နယ်သည် တော်လှန်ရေးတပ်ဖွဲ့ဝင်များ အားကောင်းသည့်ဒေသဖြစ်ပြီး ချင်းပြည်နယ်နှင့် ချိတ်ဆက်နေရာ ယခင်ကတည်းကပင် စစ်တပ်သည် လေကြောင်းဗုံးဖြင့် မကြာခဏ တိုက်ခိုက်လေ့ရှိသည်။
