ရခိုင်ပြည်နယ်မြောက်ပိုင်း မြေပုံမြို့နယ် စညှင်းရွာအနီးတွင် ယမန်နေ့က တပ်မတော်နှင့် ရက္ခိုင့်တပ်တော် AA တို့ တိုက်ပွဲဖြစ်ပွားမှုကြောင့် စညှင်းရွာနှင့် အင်ကြင်းရွာသား ၁၀၀၀ ကျော်မှာ ကမ်းထောင်းကြီးမြို့ကို စစ်ဘေးရှောင်နေရသည်ဟု စညှင်းရွာအုပ်ချုပ်ရေးမှူးက ယနေ့ ပြောသည်။
ယမန်နေ့ မနက် ၉ နာရီခန့်က စညှင်းရွာနှင့် အင်ကြင်းရွာအနီးတွင် တပ်မတော်နှင့် AA တို့ တိုက်ပွဲဖြစ်ပွားကြပြီးနောက် စညှင်းရွာသား ၁၀၀၀ ခန့်နှင့် အင်ကြင်းရွာမှ တိမ်းရှောင်လာသည့် ရွာသား ၆၀ ခန့်တို့မှာ စက်လှေများနှင့် ထွက်ပြေးတိမ်းရှောင်နေကြခြင်းဖြစ်ကြောင်း စညှင်းရွာအုပ်ချုပ်ရေးမှူး ဦးမောင်ရွှေသိန်းက Myanmar Now ကို ပြောသည်။
“ တိုက်ပွဲပြီးတော့ ရွာနားမှာလည်း သေနတ်ဖောက်သံတွေလည်း ကြားလာရတော့ ရွာသားတွေက မနေရဲတော့ဘူး ” ဟု ဦးမောင်ရွှေသိန်းက ပြောသည်။
အိမ်ခြေ ၂၈၀ ခန့်နှင့် လူဦးရေ ၂၀၀၀ ခန့်ရှိသည့် စညှင်းရွာမှာ ရန်ကုန်-စစ်တွေ ကားလမ်းမကြီးအနီးတွင် ရှိပြီး မြေပုံမြို့၏ အရှေ့ဘက် မိုင် ၂၀ ခန့်အကွာတွင် ရှိသည်။
နိုဝင်ဘာ ၁၉ ရက်က အင်ကြင်းရွာနှင့် ဟင်းခရော်ရွာကြားတွင် တပ်မတော်စစ်ယာဉ်တန်း မိုင်းခွဲတိုက်ခိုက်ခံခဲ့ရပြီးနောက် နှစ်ဖက်တိုက်ပွဲ အပြင်းအထန်ဖြစ်ပွားခဲ့ပြီး အဆိုပါရွာများ၏ အရှေ့ဘက်တောင်တန်းများကို တပ်မတော်က ရဟတ်ယာဉ်နှစ်စီး သုံးစွဲကာ တိုက်ခိုက်ခဲ့သည်ဟု ဒေသခံများက ဆိုသည်။
- ကျည်ဆန်ရာ၊ ကျည်ခွံ၊ အမြောက်ဆန်များတွေ့ခဲ့ရသည့် လက္ကာရွာ
- အိမ်ပြန်ချိန် မရေရာသေးသည့် ရခိုင်ပြည်နယ်က စစ်ဘေးရှောင်များ(ဓာတ်ပုံအက်ဆေး)
အနောက်ပိုင်းတိုင်းစစ်ဌာနချုပ် တိုင်းဦးစီး ဗိုလ်မှူးကြီးဝင်းဇော်ဦးက မနေ့မနက်က စညှင်းရွာအနီးတွင် တိုက်ပွဲအနည်းငယ် ဖြစ်ပွားခဲ့သော်လည်း အသေးစိတ်အချက်အလက်များကို မသိရသေးကြောင်း ပြောသည်။
တိုက်ပွဲဖြစ်စဉ်နှင့်ပတ်သက်၍ ရက္ခိုင့်တပ်တော် AA ပြောခွင့်ရ ခိုင်သုခကို Myanmar Now က ဆက်သွယ်မေးမြန်းသော်လည်း ဆက်သွယ်၍မရပေ။
စညှင်းရွာနှင့် အင်ကြင်းရွာမှ စစ်ရှောင်အများစုများ ကမ်းထောင်းကြီးမြို့ပေါ်ရှိ ဘုန်းကြီးကျောင်းများတွင် ခိုလှုံနေရပြီး အသေးစိတ်အခြေအနေများကို မရရှိသေးကြောင်း ရခိုင်တိုင်းရင်းသားမျိုးနွယ်များ အစည်းအရုံး (REC) မှ အတွင်းရေးမှူး ကိုဇော်ဇော်ထွန်းက ပြောသည်။
REC ၏ နောက်ဆုံးရ အချက်အလက်များအရ ရခိုင်မြောက်ပိုင်းရှိ စစ်ဘေးရှောင်စခန်းများရှိရာ ၇ မြို့နယ်တွင် စစ်ဘေးရှောင်သူ ၉၂၅၀၀ ခန့် ရှိနေပြီဖြစ်သည်။
