ဦးစိုးထွန်းရှိန်ကို ရှာဖွေရန် မြန်မာရဲများ ထိုင်းသို့ မနက်ဖြန်သွားမည်

မြန်မာနိုင်ငံရဲတပ်ဖွဲ့က တရားခံပြေးအဖြစ် ကြေညာထားသော အမျိုးသားကြီးပွားတိုးတက်ရေးကုမ္ပဏီပိုင်ရှင် ဦးစိုးထွန်းရှိန်အား ရှာဖွေရန် မြန်မာရဲတပ်ဖွဲ့ ထိပ်ပိုင်းအရာရှိများသည် စနေနေ့ (မနက်ဖြန်) တွင် ထိုင်းနိုင်ငံသို့ သွားမည်ဟု သမ္မတရုံး ပြောခွင့်ရအရာရှိက ယနေ့ ပြောကြားလိုက်သည်။

ဦးစိုးထွန်းရှိန်သည် မြန်မာ – ထိုင်း နယ်စပ်တာချီလိတ်မှ ထိုင်းနိုင်ငံသို့ ကားလမ်းခရီးဖြင့် သွားရောက်ခဲ့သည်ဟု ကနဦးသတင်းအချက်အလက်များကို အခြေခံပြီး သမ္မတရုံး ပြောခွင့်ရအရာရှိ ဦးဇော်ဌေးက ဆိုသည်။

မြန်မာနှင့်ထိုင်း ရဲအရာရှိများသည် ဦးစိုးထွန်းရှိန်အား တွေ့ခဲ့သည်ဆိုသည့် ထိုင်းနိုင်ငံတွင်း နေရာများ၊ တည်းခိုခဲ့သည့် နေရာများနှင့် ဆက်နွှယ်သည့် အသိုင်းအဝိုင်းတို့အား စုံစမ်းဖော်ထုတ်မည်ဟု သမ္မတရုံးပြောခွင့်ရအရာရှိ ဦးဇော်ဌေးက နေပြည်တော်တွင် သတင်းထောက်များကို ပြောခဲ့သည်။

ဦးစိုးထွန်းရှိန်ကို ထိုင်းနိုင်ငံ၊ ဘန်ကောက်မြို့ရှိ သုဝဏ္ဏဘူမိ အပြည်ပြည်ဆိုင်ရာလေဆိပ်တွင် တွေ့မြင်ခဲ့ရကြောင်း မျက်မြင်သက်သေတစ်ဦးက Myanmar Now ကို အောက်တိုဘာ ၁၄ က ပြောကြားခဲ့သည်။

• တရားခံပြေး ဦးစိုးထွန်းရှိန်ကို ဘန်ကောက်မြို့တွင် တွေ့ရှိဟုဆို

ဦးစိုးထွန်းရှိန်၏ အမျိုးသားကြီးပွားတိုးတက်ရေးကုမ္ပဏီသည် မန္တလေးတိုင်း၊ ရမည်းသင်းမြို့နယ်ရှိ ဧက ၆၀၀၀ ကျော်ရှိသော မိုးထိမိုးမိရွှေလုပ်ကွက်ကြီးတွင် နိုင်ငံတော်နှင့် စာချုပ်ချုပ်ပြီး လုပ်ကိုင်ခဲ့ရာ နိုင်ငံတော်အား သတ်မှတ်ရွှေပိဿာများ မပေးဆောင်မှု၊ တရားမဝင် ဆက်လက် ရွှေတူးဖော်မှုတို့ကြောင့် အစိုးရက ၎င်းနှင့် ၎င်း၏ကုမ္ပဏီ တာဝန်ရှိသူအချို့အား ရာဇဝတ်ပုဒ်မများဖြင့် အမှုဖွင့်ထားသည်။

ထောင်ဒဏ် ၁၀ နှစ်အထိ အမြင့်ဆုံးပြစ်ဒဏ်ထိုက်သော သတ္တုတွင်းဥပဒေ ပုဒ်မ ၃၀ (က) အပြင် ပြည်သူပိုင်ပစ္စည်းဖျက်ဆီးမှု ပုဒ်မ ၆၁ တို့ဖြင့် အမှုဖွင့်ခံထားရသော ဦးစိုးထွန်းရှိန်သည် ထွက်ပြေးတိမ်းရှောင်လျက်ရှိပြီး ၎င်းကို တရားခံပြေးအဖြစ် မြန်မာနိုင်ငံရဲတပ်ဖွဲ့က ယခုနှစ်ဆန်းပိုင်းတွင် ကြေညာခဲ့သည်။