သင်္ကြန်သံချပ်ရွတ်ဆိုရာတွင် တပ်မတော်ကို အကြည်ညိုပျက်စေသည်ဟု ဆိုကာ တပ်မတော်က ရာဇသတ်ကြီး ပုဒ်မ ၅၀၅(က) ဖြင့် တရားစွဲဆိုထားသည့် ဒေါင်းတို့မျိုးဆက် သံချပ်အဖွဲ့ဝင်များကို ယနေ့ ဒုတိယအကြိမ် ရုံးထုတ် စစ်ဆေးပြီး တရားလိုက တရားရုံးသို့ ဦးတိုက်လျှောက်လွှာကို တင်သွင်းခဲ့သည်။
ဒေါင်းတို့မျိုးဆက် သင်္ကြန်သံချပ်အဖွဲ့ဝင် ခုနစ်ဦးကို ယနေ့ ဗိုလ်တထောင်မြို့နယ် တရားရုံးတွင် ဒုတိယအကြိမ် ရုံးထုတ်စစ်ဆေးသည်။
ပြီးခဲ့သည့် သင်္ကြန်တွင်းက သံချပ်ရွတ်ခဲ့သည့် ဒေါင်းတို့မျိုးဆက် သံချပ်ပါစာသားများသည် တပ်မတော်ကို အကြည်ညိုပျက်စေသည်ဆိုကာ လူငယ်တက်ကြွလှုပ်ရှားသူများဖြစ်သည့် မဆုရတနာမြင့်၊ မကေခိုင်ထွန်း၊ ကိုဇေယျာလွင်၊ ကိုပိုင်ရဲသူ၊ ကိုပိုင်ဖြိုးမင်း၊ ကိုဖိုးသား (ခေါ်) ကိုဇင်လင်းထွန်း၊ ကိုငြိမ်းချမ်းစိုးတို့ ခုနစ်ဦးကို တပ်မတော်က အကြည်ညိုပျက်စေမှုပုဒ်မ ၅၀၅ (က)ဖြင့် တရားစွဲဆိုထားခြင်း ဖြစ်သည်။
ယနေ့ တရားရုံးတွင် တရားလို တပ်မတော် ရေတပ်မှ ဒုတိယ ဗိုလ်မှူးကြီး မျိုးမင်းဦးကို စစ်ဆေးသည်။
၎င်း၏ ဦးတိုက်လျှောက်ထားချက်အရ ရန်ကုန်မြို့ရှိ ဒေါင်းတို့ မျိုးဆက် သံချပ်အဖွဲ့က သင်္ကြန်ကာလအတွင်း သံချပ် ထိုးရာတွင် “ဉာဏ်ပညာ အသိပညာ မရှိ၊ နာခံမှုနှင့် အမိန့်သာ ရှိ၊ စစ်ဝတ်စုံပေါ်က ဆုတံဆိပ်များစွာနဲ့ စစ်ဗိုလ်ချုပ်တွေ အိုင်စီစီကိုတန်းပို့၊ အိုင်စီစီကို ကြောက်တဲ့ ကောင် နေပြည်တော်ကို ရှောင်၊ အိုင်စီစီကို ကြောက်တဲ့ ဘဝ နေပြည်တော်က အဘ ” စသည့် သံချပ်စာသားများသည် တပ်မတော်၏ဂုဏ်သိက္ခာ ကျဆင်းစေသည့် အတွက် သံချပ်အဖွဲ့သားခုနစ်ဦးအား ရာဇသတ်ကြီးပုဒ်မ ၅၀၅(က)ဖြင့် ဦးတိုက်လျှောက်ထားထားခြင်း ဖြစ်သည်ဟု ပါရှိသည်။
- ဒေါင်းတို့မျိုးဆက် သံချပ်အဖွဲ့ဝင် ၂ ဦးကို ယနေ့ အင်းစိန်ထောင်ပို့
- တပ်က တရားစွဲသည့် သံချပ်အဖွဲ့ဝင်များ အာမခံ မရ
အိုင်စီစီဆိုသည်မှာ အပြည်ပြည်ဆိုင်ရာ ရာဇဝတ်ခုံရုံးကို ဆိုလိုခြင်းဖြစ်ပြီး တပ်မတော်က ကျူးလွန်သည်ဟု စွပ်စွဲခံထားရသော ဖြစ်စဉ်များနှင့်ပတ်သက်၍ တာဝန်ရှိသူများကို နိုင်ငံတကာခုံရုံးတင်ရန် လူ့အခွင့်အရေး တက်ကြွလှုပ်ရှားသူများက ဆော်ဩနေခြင်းကို ၎င်းတို့သံချပ်က ရည်ညွှန်းခြင်းဖြစ်သည်။
မေလ ၂ဝ ရက် က ဗိုလ်တထောင်မြို့နယ် တရားရုံး၌ ပထမအကြိမ်ရုံးထုတ်ရာ၌ ဝန်းရံသူများအနက် လာရောက် ဝန်းရံသူများနှင့် တာဝန်ကျရဲများ ရုန်းရင်းဆန်ခတ်ဖြစ်ခဲ့ရာ ယင်းကိစ္စနှင့်ပတ်သက်ပြီး ၈၈ မျိုးဆက် ငြိမ်းချမ်းရေး နှင့် ပွင့်လင်းလူ့အဖွဲ့အစည်းမှ မနီလာသိန်းအပါအဝင် ဝန်းရံသူငါးဦးတို့ကို ဗိုလ်တထောင်မြို့နယ် ရဲစခန်းက အမြင့်ဆုံး ထောင်ဒဏ် သုံးနှစ်၊ နှစ်နှစ် စသည် ချမှတ်နိုင်သည့်ပြည်သူ့တာဝန်ဝတ္တရား နှောင့်ယှက်မှု၊ လက်ရောက်မှု၊ အားပေးကူညီမှု အပါအဝင် ပုဒ်မ လေးခုဖြင့် မေလ ၂၂ ရက်တွင် အမှုဖွင့်ခဲ့သည်။
သင်္ကြန်သံချပ်အဖွဲ့ဝင် ကျောင်းသူတစ်ဦးကလည်း မေလ ၂၀ ရက်နေ့ ရုံးထုတ်စဉ်က ဖြစ်စဉ်များနှင့် ပတ်သက်ပြီး ရဲမေများက ၎င်းတို့အပေါ် ကြမ်းကြမ်းတမ်းတမ်း ကိုင်တွယ်ခဲ့သည်ဟု စွပ်စွဲကာ တရားပြန်စွဲမည်ဟု ယနေ့ ပြောသည်။
“မလိုအပ်ဘဲ လုံခြုံရေးတွေ အများကြီးဟာ မိန်းကလေးတွေအပေါ် ထိပါးပြီးတော့ စော်ကားရာ ရောက်တယ်။ အကြမ်းဖက်တဲ့ ပုံစံမျိုး ဖြစ်ပါတယ်။ ဒါကို ပုံဖော်တဲ့အခါကျတော့ ကျွန်မတို့ဘက်က လူတွေကသာ ဝတ္တရားနှောင့်ယှက်တဲ့ ပုံစံနဲ့ တရားစွဲခံထားရတယ်။ ကျွန်မတို့ကလည်း ကျွန်မတို့ အမျိုးသမီးတွေကို ထိပါးတာဆိုပြီး ပြန်တရားစွဲသွားမှာပါ” ဟု သံချပ်အဖွဲ့ဝင် မဆုရတနာမြင့်က ပြောသည်။
သံချပ်အဖွဲ့ဝင်များကို ဇွန်လ ၁၀ ရက်နေ့သို့ ပြန်လည်ချိန်းဆိုထားသည်။
