ရန်ကုန် – ဆက်သွယ်ရေးဥပဒေ ပုဒ်မ ၆၆(ဃ)ကို ပြင်ဆင်ရန် လွှတ်တော်သို့ မကြာမီ တင်ပြမည်ဟု ပြန်ကြားရေးဝန်ကြီးဌာန အမြဲတမ်းအတွင်းဝန်ထံမှ သိရကြောင်း နိုင်ငံတကာ အဖွဲ့အစည်းတစ်ခုဖြစ်သည့် CPJ ခေါ် စာနယ်ဇင်းသမားများ ကာကွယ်စောင့်ရှောက်ရေး ကော်မတီက သောကြာနေ့တွင် ပြောလိုက်သည်။
အမြဲတမ်းအတွင်းဝန် ဦးမျိုးမြင့်မောင်နှင့် နေပြည်တော်တွင် တွေ့ဆုံခဲ့သည်ဟု ကော်မတီဥက္ကဋ္ဌ Ms. Sandra Mims Rowe က ရှင်းပြသည်။
“ဆက်သွယ်ရေးဥပဒေပြင်ဆင်ဖို့ ဘယ်လိုအခြေအနေရှိနေပါပြီလို့ မနေ့က တာဝန်ရှိသူတွေက ပြောခဲ့တယ်။ အားရစရာ ကောင်းပါတယ်။ ဒါပေမယ့် ပြောတဲ့အတိုင်း လုပ်ကြမလား။ ပြီးတော့ ပြောတာနဲ့လုပ်တာနဲ့ တခြားစီ ဖြစ်သွားမလား။ ပြောတဲ့အတိုင်း မလုပ်ခဲ့ဘူး ဆိုလို့ရှိရင် ကတိကဝတ်တွေ ဖျောက်ဖျက်ရာ ရောက်ပြီးတော့ ဒီအစိုးရအပေါ် ယုံကြည်မှု ကျဆင်းသွားမှာဖြစ်ပါတယ်” ဟု Ms. Sandra Mims Rowe က ပြောသည်။
ပြုပြင်ပြောင်းလဲမှုဖြစ်စဉ်ကို ဆက်လက်စောင့်ကြည့်နေသည်ဟု သူက ဆက်ပြောသည်။
ထိုပြောကြားချက်နှင့် ပတ်သက်ပြီး ပြန်ကြားရေးဝန်ကြီးဌာန အမြဲတမ်းအတွင်းဝန်ရုံးသို့ Maynmar Now သတင်းဌာနက သောကြာနေ့ ညနေပိုင်းတွင် ဖုန်းဆက်သော်လည်း လက်ခံ ဖြေဆိုခြင်း မရှိပေ။
CPJ သည် ပြည်သူ့လွှတ်တော် ဥပဒေကြမ်းကော်မတီနှင့်လည်း တွေ့ဆုံခဲ့ကြောင်း၊ ဥပဒေကြမ်းကော်မတီ အနေဖြင့် သတင်းမီဒီယာ လွတ်လပ်ခွင့်၏ အရေးပါပုံကို သိနားလည်ကြောင်း၊ အဆိုပြုလွှာတင်သွင်းလာခဲ့ပါက ဦးစားပေးဆောင်ရွက်မည်ဖြစ်ကြောင်း CPJ နှင့် တွေ့ဆုံစဉ်ပြောကြားသည်ဟု ဆိုသည်။
(ဆလိုင်းလာလ်နွန်အုပ်သည် ရန်ကုန်မြို့၊ မြန်မာသတင်းပညာသိပ္ပံတွင် စာနယ်ဇင်းပညာ သင်ယူနေသူတစ်ဦးဖြစ်ပြီး Myanmar Now ရုံးတွင် အလုပ်သင် သတင်းထောက်အဖြစ် ယာယီ လုပ်ကိုင်လျက်ရှိသည်)
