ပြည်သူတွေ တရားမျှတမှုကို ကိုယ့်အားကိုယ်ကိုး ရှာဖွေရတော့မလား (အမြင်ဆောင်းပါး)

သာမန်အားဖြင့် လူသတ်မှုဖြစ်ပြီဆိုလျှင် လူသတ်တရားခံကို ပြည်သူလူထုက ပြင်တင်ကဲ့ရဲ့ကြမည်။ ဆိုးဆိုးရွားရွား ယုတ်မာသည့် လူသတ်မှုဖြစ်လျှင် ထိုသူကို ရွံရှာစက်ဆုပ်ကြသည်အထိ ဖြစ်မည်။ သို့သော် မလင်းလင်းခိုင်၏ဖြစ်ရပ်တွင် မူ လူသတ်တရားခံကို အများအပြားက အပြစ်မတင်သည့်အပြင် ကရုဏာပင် သက်ကာ ဝိုင်းဝန်းအားပေးကြသည်။ လူယုတ်မာတစ်ယောက်ကို ဖယ်ရှားပေးခဲ့ပြီး နောင် သူ့လို မိန်းကလေးများ ထပ်မခံစားရအောင် အနစ်နာခံခဲ့သူအဖြစ် ချီးကျူးဂုဏ်ပြုကြသည်။ သူ့ဘက်က အခမဲ့ရှေ့နေလိုက်ပေးမည်ဟုပင် အွန်လိုင်းပေါ်တွင် ရှေ့နေ အချို့က ရေးသားကြသည်။

မလင်းလင်းခိုင်က သူလူသတ်ခဲ့ကြောင့် ဝန်ခံထားသည့် ဗီဒီယိုဖိုင်ကို ကြည့်ရသူတိုင်းက လူသတ်ခဲ့သည့် သူ့ကို အပြစ်မတင်ဘဲ သူ့အတွက် တရားမျှတမှုကို ဆောင်ကြဉ်းမပေးနိုင်ခဲ့သည့် တရားဥပဒေစိုးမိုးရေး ဝန်ထမ်းများကိုသာ ဝိုင်းဝန်းအပြစ်တင်ကြသည်။ မြန်မာနိုင်ငံ၏ တရားရေးမဏ္ဍိုင်ကြီးကိုသာ နာနာဖိဆဲကြတော့သည်။ မိမိကို လိမ်ညာခိုးယူပေါင်းသင်း၊ မြဝတီသို့ ရောင်းစားရန်အကြံဖြင့် ခေါ်ယူသွားပြီးမှ ထားခဲ့သည့် ထိုလူကို အရေးယူပေးရန် တောင်ဒဂုံရဲစခန်းသို့ သွားသော်လည်း ရဲစခန်းက အမှုဖွင့်မပေးဘဲ တရားရုံးတွင် ဦးတိုက်လျှောက်ဖို့ အကြံပေး ခဲ့သည်။ တရားရုံးရောက်တော့လည်း ရှေ့နေဆိုသူက မြဝတီမှာ ဖြစ်ခဲ့ခြင်းကြောင့် မြဝတီမှာအမှုသွားဖွင့်ရမည်ဟု ဆိုကာ သူ့တိုင်ကြားချက်ကို မဆောင်ရွက်ပေးခဲ့။ ဤသို့ဖြင့် မလင်းလင်းခိုင်တစ်ယောက် လုပ်မိလုပ်ရာဖြင့် ဟိုလူကို ဓားဖြင့် ထိုးမိခဲ့သည်အထိ ဖြစ်ခဲ့ရသည်။ တကယ်ဆို ၎င်းအဖြစ်သည် လူကုန်ကူးမှုပုဒ်မဖြင့် အမှုဖွင့်၍ရသည့် အမှုဖြစ်သော် လည်း ရဲစခန်းက မဆောင်ရွက်ပေးခဲ့ပါ။ ရဲနှင့်တရားရုံးတို့ကသာ ကိုယ့်အလုပ်ကိုယ် လုပ်ခဲ့ကြလျှင် မလင်းလင်းခိုင်တစ်ယောက် ယခုလို သံတိုင်များနောက် ရောက်စရာမလိုပါ။

မလင်းလင်းခိုင်အဖြစ်ကို ကြားရသည့်အခါ ကြည့်ဖူးခဲ့သည့် ရုပ်ရှင်တစ်ကားကို အမှတ်ရမိသည်။ Law-abiding Citizen (ဥပဒေကိုလိုက်နာသည့်နိုင်ငံသား) အမည်ရှိ ဟောလီးဝုဒ်ကားဖြစ်သည်။ မိန်းမနှင့်ကလေး ရက်ရက်စက်စက် အသတ်ခံခဲ့ရသည့်အဖြစ်ကို မျက်စိဖြင့်မြင်ခဲ့ရသော်လည်းထို အမှုတွင် တရားစွဲရှေ့နေသည် တရားခံနှစ်ဦးအနက် တစ်ဦးနှင့် အပေးအယူလုပ်ကာ ပစ္စည်းခိုးရုံကြံစည်ခဲ့သူကို သေဒဏ်၊ တကယ်သတ်ခဲ့သူကို ပြစ်မှုအသေးဖြင့် ပြောင်းလဲကျခံ စေရန် လုပ်ဆောင်ခဲ့သည်။ ကိုယ့်မိန်းမနှင့်ကိုယ့်ကလေးကို သတ်ခဲ့သူက ထောင် ခဏကျပြီး အပြင်မှာလွတ်ကာ တကယ်မသတ်ခဲ့သူက သေဒဏ်ခံခဲ့ရသည်ကို မြင်ရသည့် ယောက်ျားဖြစ်သူသည် ထို အမှုတွင် ပါဝင်ပတ်သက်ခဲ့သည့် တရားရေးဝန်ထမ်းများကို တစ်ယောက်ချင်းစီ အမှည့်လိုက်ချွေသည့် ဇာတ်ကား ဖြစ်သည်။

ထိုအဖြစ်အပျက်များမှ ကျွန်တော်တို့ ဘာသင်ခန်းစာ ယူနိုင်ပါသနည်း။ လူတို့သည် မိမိတို့မတရားခံစားရမှုများ အတွက် ဖြစ်သင့်ဖြစ်ထိုက်သည့် ဥပဒေ၏အကာအကွယ် သို့မဟုတ် တရားမျှတမှုကို မဆောင်ကြဉ်းနိုင်မှန်း ခံစားရသည့်အခါ လုပ်မိလုပ်ရာ လုပ်တတ်သည်ဆိုသော အချက်ပင်ဖြစ်သည်။ တရားရုံးများ၊ ရဲဌာနများကို ထားရှိခြင်းသည် လူတို့အချင်းချင်း မတရားမှုများမပြုအောင်၊ ပြုခဲ့သည်ရှိသော် ဓားဓားချင်း၊ လှံလှံချင်း လက်တုံ့ ပြန်ခြင်းမျိုးမဖြစ်စေရန်အတွက် ဖြစ်သည်။ သို့သော် ထိုကဲ့သို့သော တရားဥပဒေယန္တရားများက မူလ ရည်ရွယ်ချက် အတိုင်း တရားမျှတမှုကို မဆောင်ကြဉ်းနိုင်သည့်အခါ လူတို့သည် ရှေးခေတ်ကလိုပင် ကိုယ့်အား ကိုယ်ကိုးပြီး လက်တုံ့ပြန်ကြ၊ လက်စားချေသည့်အဖြစ်ကို ရောက်ကြသည်။

ဦးသိန်းစိန် သမ္မတဖြစ်သည့်နောက်ပိုင်း မြန်မာနိုင်ငံ၏ပြုပြင်ပြောင်းလဲရေးများ ဖော်ဆောင်သည့်အခါ ခေတ် အဆက်ဆက် သုံးစားမရခဲ့သည့် တရားရေးမဏ္ဍိုင်ပြောင်းလဲရေးအတွက် ပြည်သူတို့မျှော်လင့်ခဲ့ကြသည်။ ဒေါ်အောင်ဆန်းစုကြည် ဦးဆောင်သည့် အမျိုးသားဒီမိုကရေစီအဖွဲ့ချုပ်ကလည်း တရားဥပဒေစိုးမိုးရေးကို ရွေးကောက်ပွဲ ကတိတစ်ခုဖြင့် ထည့်သွင်းကြွေးကြော်ခဲ့သည်။ သို့သော် ဒီချုပ်အစိုးရလက်ထက်တွင်လည်း တရားဥပဒေစိုးမိုးရေး အခြေအနေသည် သိသာထင်ရှားလောက်အောင် မပြောင်းလဲခဲ့သေးပါ။ ဦးဝင်းမြင့် သမ္မတဖြစ်ခါစ မိန့်ခွန်းတွင် ယိမ်းယိုင်နေသောတရားရေးမဏ္ဍိုင်ကို ပြန်တည့်မတ်ရပါမည်ဟူ၍ ပြောကြားခဲ့ပါသေးသည်။ သို့သော် လက်ရှိ တရားရေး မဏ္ဍိုင်သည် ဒီတောင်ကိုကျော်နိုင်ပါ့မလားဟု မေးခွန်းထုတ်ရမလောက်အောင်ကို ဗုန်းဗုန်းလဲနေပြီကို မြင်တွေ့နေရသည့် ဖြစ်စဉ်များက ပြောပြနေသည်။

တချို့ကမူ ပြည်ထဲရေးဝန်ကြီးဌာနကို ကာကွယ်ရေးဦးစီးချုပ်ကခန့်အပ်သည့် စစ်ဗိုလ်ချုပ် ဝန်ကြီးတစ်ဦးအောက် တွင် ထားရှိစေရန် စီမံရေးဆွဲခဲ့သည့် ၂၀၀၈ အခြေခံဥပဒေကို အပြစ်တင်ကြသည်။ တရားရေးလောကအတွင်းရှိ အရိုးစွဲ အကျင့်ပျက်ခြစားမှုကို လက်ညှိုးထိုးကြသည်။ ခုရေတွင်းတူး ခုရေကြည်မသောက်နိုင်ဟု စောဒက တက်ကြသည်။ တပ်ချုပ်ကလည်း ပြည်ထဲရေးဝန်ကြီးကို သူ့အနေဖြင့် အမည်တင်သွင်းရုံသာရှိပြီး သမ္မတက ခန့်အပ်ရသလို သမ္မတ၏ ကက်ဘိနက်အဖွဲ့ဝင်ဖြစ်သဖြင့် သမ္မတညွှန်ကြားချက်အတိုင်းသာ ပြည်ထဲရေးအစ ရှိသည့် စစ်တပ်ကလာသည့် ဝန်ကြီးများက အလုပ်လုပ်ရပါသည်ဟု ဆိုပြန်သည်။ ကြားထဲမှာတော့ ပြည်သူတွေက မြေစာပင်ဖြစ်ရသည်။
ဒီချုပ်အစိုးရအနေဖြင့် တရားရေးကဏ္ဍ ပြုပြင်ပြောင်းလဲရေးကို ယခုထက်ပို၍ အားစိုက်ခွန်စိုက် လုပ်ဆောင်သင့် နေပါပြီ။ ပြည်ထဲရေးဝန်ကြီးသည် သမ္မတစေခိုင်းသည့်အတိုင်း မလုပ်ဆောင်ပါက ဝန်ကြီးအသစ်လဲပေးရန် တပ်ချုပ်ထံ တင်ပြတောင်းခံနိုင်ပါသည်။ ထိုနည်းဖြင့် ဝန်ကြီးဌာနသုံးခုအတွင်း အရွေ့တစ်ခုဖြစ်အောင် ကြိုးစား စေချင်ပါသည်။ ၂၀၀၈ ခြေ/ဥကြောင့်၊ အစိတ်သားကြောင့်၊ ထွေအုပ်ကြောင့် စသည်ဖြင့် အကန့်အသတ်များ ရှိနေခြင်းကို အကြောင်းမပြ စေချင်ပါ။ ပြည်ထဲရေးဝန်ကြီးသည် တပ်ကလာမည်ဆိုသည်ကို မိမိတို့ အာဏာမရမီ ကတည်းက သိပြီးဖြစ်ပါသည်။ တရားဥပဒေစိုးမိုးရေးသည် ဒီချုပ်၏မဲဆွယ်ကတိဖြစ်ပါသည်။ ပြည်သူတို့က မဲပေးခဲ့ခြင်းမှာ ထိုအကန့်အသတ်များရှိလင့် ကစား ဒီချုပ်အစိုးရသည် ထိုထောင်ချောက်ကိုကျော်လွန်နိုင်လောက် သည့် ဗျူဟာတစ်ခုခုရှိလိမ့်မည်ဟု ယုံကြည်ခဲ့၍ဖြစ်ပါသည်။ အစိုးရဖြစ်ပြီးခါမှ ပြည်ထဲရေးသည် မိမိတို့ လက်အောက်မှာမရှိဟု အကြောင်းပြမည်ဟု မမျှော်လင့်ခဲ့၍ ဖြစ်ပါသည်။

နိုင်ငံတော်အတိုင်ပင်ခံပုဂ္ဂိုလ် ပြောခဲ့ဖူးသည့်စကား ရှိသည်။ ဒီချုပ်သည် ၇၅ ရာခိုင်နှုန်းသာ အာဏာရှိသော်လည်း ၁၀၀ ရာခိုင်နှုန်း တာဝန်ရှိသည်ဟူ၍ ဖြစ်သည်။ ထို့ကြောင့် ကိုယ်အုပ်ချုပ်သည့်ကာလတွင် ဘာပဲဖြစ်လာလာ မိမိမှာသာ အလုံးစုံတာဝန်ရှိသည်၊ တာဝန်ခံရမည်ကို သိပြီးဖြစ်သည်ဟု ယူဆပါသည်။ ထိုသို့ဖြစ်အောင်လည်း ၂၀၀၈ ခြေဥက စီမံထားသည်ကို သိပြီးဖြစ်ပါလိမ့်မည်။ အာဏာရသည့်အခါ ထိုအခက်အခဲကို မည်သို့ ကျော်လွှား မည်ဆိုသည်ကိုလည်း ကြိုတင်စဉ်းစားပြီးသား ဖြစ်ပါလိမ့်မည်။ ထို့ကြောင့် ရွေးကောက်ပွဲကတိဖြစ်သည့် တရားဥပဒေစိုးမိုးရေးကို တိုးတက်ပြောင်းလဲအောင် အပြောမဟုတ် လက်တွေ့ပြရမည့်အချိန် ဖြစ်သည်ဟု ဆိုချင်ပါသည်။