မွန်ပြည်နယ်၊ ရေးမြို့နယ်တွင် ယမန်နေ့ (စက်တင်ဘာ ၂၀) ညက ပစ်သတ်ခံရသော အမျိုးသားတစ်ဦးသည် ၎င်းတို့နှင့် မသက်ဆိုင်ကြောင်း ရေးမြို့နယ်ပြည်သူ့ကာကွယ်ရေးတပ်ဖွဲ့ (YPDF) မှ ပြန်ကြားရေးတာဝန်ရှိသူတစ်ဦးက ပြောသည်။
“သေဆုံးသွားတဲ့သူက အရပ်သားသာဖြစ်ပါတယ်။ စစ်ကောင်စီရဲ့ လိမ်လည်အောက်တန်းကျမှုကို ကျွန်တော်တို့ ရှုတ်ချပါတယ်။ ရေးမြို့နယ် PDF က ပြည်သူ့ကို ကာကွယ်ထားတဲ့အဖွဲ့အစည်းဖြစ်လို့ ဒီစစ်ကောင်စီကို ပြန်တိုက်ခိုက်သွားမယ်လို့ သတိပေးချင်ပါတယ်” ဟု အဆိုပါ တာဝန်ရှိသူက ပြောသည်။
ယမန်နေ့ ည ၉ နာရီခန့်တွင် ရေးမြို့မှ မိုင်ဝက်ခန့်အကွာရှိ ရေးမြစ်ကူးတံတားအောက်တွင် ရှိနေသည့် ထိုအမျိုးသားက တံတားထိပ်ရှိ လုံခြုံရေးကင်းတဲကို လက်ပစ်ဗုံးဖြင့် တိုက်ခိုက်သောကြောင့် ပစ်ခတ်ခဲ့ရခြင်းဖြစ်ကြောင်း “ရဲအသိုင်းအဝိုင်း” ကို ကိုးကားပြီး ဒေသအခြေစိုက် မွန်သတင်းအေဂျင်စီ သတင်းတစ်ပုဒ်တွင် ရေးထားသည်။
YPDF ကမူ ၎င်းတို့၏ ရေးမြို့နယ်ကာကွယ်ရေးအထူးအဖွဲ့ (YSTF) က ရေးမြစ်ကူးတံတား (ချောင်းတောင်) တံတားထိပ်ရှိ အဆိုပါ စစ်ဆေးရေးဂိတ်ကို ဗုံးခွဲတိုက်ခိုက်ခဲ့ချိန်မှာ ယမန်နေ့ ညနေ ၃ နာရီခန့်တွင် ဖြစ်သည်ဟု Myanmar Now ကို ယနေ့ ပြောသည်။
အဆိုပါရဲကင်းစခန်းနှင့် ကိုက် ၁၀၀ ခန့် အကွာအဝေးတွင်ရှိသော မနက်ပိုင်းဖွင့်လှစ်သည့် ငါးဈေးမှ ငါးလုပ်သားများ ထိုတံတားကို ဖြတ်သန်းသွားလာမှုရှိသည့်အတွက် ပစ်သတ်ခံရသူသည် ၎င်းအလုပ်သမားများထဲမှ တစ်ဦးဖြစ်နိုင်ကြောင်း YPDF က ယူဆနေသည်။
Myanmar Now အနေဖြင့် သေဆုံးသူအမျိုးသားမှာ မည်သူမည်ဝါဖြစ်သည်ကို ဆက်လက်စုံစမ်းနေဆဲ ဖြစ်သည်။
YPDF က ဒေသခံတို့ကို စစ်ကောင်စီလက်နက်ကိုင်များ၊ ရဲများ၊ စစ်ကောင်စီအုပ်ချုပ်ရေးယန္တရားတွင် ပါဝင်ပတ်သက်နေသူများ၊ စစ်ကောင်စီကို အကျိုးပြုလုပ်နေသူများ၏ အနီးပတ်ဝန်းကျင်တွင် နေထိုင်သွားလာခြင်းများ မပြုလုပ်ရန် မေတ္တာရပ်ခံထားသည်။
ဒေသခံ YPDF အဖွဲ့သည် ရေးမြို့နယ်အတွင်းရှိ စစ်တပ်ပိုင် Mytel ဆက်သွယ်ရေးလိုင်းတာဝါတိုင် ၃ တိုင်ကို စက်တင်ဘာ ၁၇ နှင့် ၁၈ တွင် ဖျက်ဆီးတိုက်ခိုက်ခဲ့ပြီး စက်တင်ဘာ ၁၂ တွင်လည်း ရန်ကုန်-ထားဝယ် ကားလမ်းမ (အာရှလမ်းမကြီး) နှင်းစုံရွာအနီး ရဲတပ်သားတစ်ဦးကို ဓားဖြင့် အနီးကပ်ထိုးသတ်ခဲ့သည်ဟု သတင်းထုတ်ပြန်ထားသည်။
စစ်ကောင်စီသည် ၎င်းတို့ကို ဆန့်ကျင်သူများ၊ ဒေသခံအရပ်သားများကို PDF ဟု စွပ်စွဲ၍ ပစ်သတ်ခြင်း၊ ဖမ်းဆီးခြင်းများ မကြာခဏပြုလုပ်နေသည်။
(လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့အကူအညီကို လိုအပ်နေပါတယ်။ ဒီနေရာကိုနှိပ်၍ လှူဒါန်းနိုင်ပါတယ်။)
Donate here > https://www.userroll.com/site/register/m1f6p
