ရန်ကုန် – မြန်မာနိုင်ငံလူ့အခွင့်အရေးကော်မရှင်သည် မန္တလေးတိုင်းဒေသကြီး ကျောက်ဆည်မြို့နယ်ရှိ အကျဉ်းဦးစီးဌာန ဘဲလင်းကျောက်ထုတ်စခန်းနှစ်ခုကို ယနေ့ ဝင်ရောက်စစ်ဆေးရာ ကြီးကြီးမားမား အခွင့်အရေးချိုးဖောက်မှု မရှိသော်လည်း အကျဉ်းသားများ အလုပ်အချိန်ပို လုပ်နေရခြင်းနှင့် လုပ်ငန်းခွင်ဘေးကင်းရေးပစ္စည်းများမစုံလင်ခြင်းတို့ကို တွေ့ခဲ့ရသည်ဟု ကော်မရှင်အဖွဲ့ဝင် ဦးယုလွင်အောင်က ပြောသည်။
“အလုပ်စချိန်မှန်ပေမဲ့ အလုပ်သိမ်းချိန်နောက်ကျတယ်ဆိုပြီး အကျဉ်းသားတွေက သတင်းပို့ပါတယ်။ အလုပ်လုပ်ချိန်ကို ပိုခိုင်းတော့ သူတို့ပင်ပန်းတယ်၊ နားချိန်မရဘူးပေါ့။ ပြီးတော့ ထိခိုက်ဒဏ်ရာရရှိမှုမရှိအောင် လုပ်ငန်းခွင် အကာအကွယ်ပစ္စည်း (မျက်မှန်၊ ဖိနပ်၊ လက်အိတ်) လိုအပ်ချက်တွေ တွေ့ပါတယ်။ ဒါတွေ ဖြည့်ဆည်းဖို့ ထောင်တာဝန်ခံတွေကို မှာခဲ့ပေမယ့် တရားဝင်အနေနဲ့ (ပြည်ထဲရေး)ဝန်ကြီးဌာနကို စာပို့တင်ပြသွားမှာပါ” ဟု ၎င်းက ပြောသည်။
လူ့အခွင့်အရေးကော်မရှင်အနေဖြင့် မန္တလေးတိုင်းဒေသကြီးရှိ အကျဉ်းထောင်များကို ပုံမှန်စစ်ဆေးရေးခရီး သွားရောက်ခြင်းဖြစ်ပြီး ယခင်က စစ်ဆေးခဲ့ဖူးသည့် အကျဉ်းဦးစီးဌာနလက်အောက်ရှိ ရဲဘက်ကျောက်ထုတ်စခန်းတချို့ အကြံပြုချက်အတိုင်း လိုက်နာမှုအခြေအနေကို သိစေရန် ဇူလိုင်လ ၁၀ ရက်နေ့တွင် တစ်ခါတည်း ရှောင်တခင် ဝင်ရောက်စစ်ဆေးခဲ့ခြင်းဖြစ်သည်ဟု ဦးယုလွင်အောင်က ပြောသည်။
“ညှဉ်းပန်းနှိပ်စက်၊ အခွင့်အရေးချိုးဖောက်တာမျိုး မတွေ့ရှိရဘူး။ ကျန်းမာရေးမကောင်းတဲ့ အကျဉ်းသားတွေက မိခင်ထောင်ကို ပြန်ပြီး ဆေးကုသချင်တာမျိုးနဲ့ စားရေးသောက်ရေး အဆင်မပြေဘူးဆိုတာမျိုးတွေတော့ အကျဉ်းသားတွေ သတင်းပို့တာရှိတယ်။ ဒါတွေအတွက်တော့ ထောင်တာဝန်ခံတွေကို မှာကြားဖို့ရှိပါတယ်။ အကြံပေးတဲ့အတိုင်းလည်း လုပ်ဆောင်ထားတာတွေရှိလို့ တိုးတက်မှုရှိတယ်လို့ပဲ အကြမ်းဖျင်းပြောပါရစေ” ဟု ၎င်းက ပြောသည်။
ကော်မရှင်အနေဖြင့် ပုံမှန်အကျဉ်းထောင်စစ်ဆေးရေးခရီးစဉ်အတွင်း မန္တလေးတိုင်းဒေသကြီး၊ ပုသိမ်ကြီးမြို့နယ်ရှိ ထုံဘို(၁)၊ ထုံးဘို(၂) နှင့် ထုံးဘိုအမျိုးသမီးကျောက်ထုတ်စခန်းတို့ကို သက်ဆိုင်ရာ စခန်းအာဏာပိုင်တို့အား ကြိုတင် အသိပေးထားခြင်းမရှိဘဲ ရှောင်တခင်ဝင်ရောက်စစ်ဆေးမှုများ ပြုလုပ်ခဲ့ခြင်းဖြစ်သည်။
လူ့အခွင့်အရေးကော်မရှင်အနေဖြင့် အမျိုးသမီးကျောက်ထုတ်စခန်းများကို ပိတ်သိမ်းရန် ၂၀၁၇ ခုနှစ်တွင် အကြံပြုခဲ့သလို အမျိုးသားလွှတ်တော်တွင်လည်း ထိုအကြံပြုချက်ကို ဆွေးနွေးခဲ့သော်လည်း ယခုအထိ အစိုးရအာဏာပိုင်များဘက်က မတုံ့ပြန်သေးပေ။
