“အမျိုးသားရေး” စာရေးဆရာ မောင်သွေးချွန် တရားစွဲခံနေရမှုနှင့် ပတ်သက်ပြီး ပြန်လည်သုံးသပ်ရန် အမျိုးဘာသာသာသနာ စောင့်ရှောက်ရေး ဗုဒ္ဓဓမ္မ ပရဟိတ ဖောင်ဒေးရှင်း(ဗဟို)က မေ ၂၇ တွင် အစိုးရကို တိုက်တွန်းလိုက်သည်။
နေရာဒေသအများအပြားတွင် ဗုဒ္ဓဘာသာနှင့် သံဃာတော်ကြီးများကို ပုတ်ခတ်စော်ကားနေသည့် ပုဂ္ဂိုလ်များ၏ ဟောပြောမှုမှာမူ အရေးယူခြင်း မခံရဟု ထိုဖောင်ဒေးရှင်းက ထုတ်ပြန်သည့် ကြေညာချက်က ဆိုသည်။
“အမျိုးသားရေး စာရေးဆရာကြီး မောင်သွေးချွန် (ခ) ဦးမြင့်စိုးအား တရားစွဲဆိုခြင်းသည် ‘လူခင် မူပြင်၊ လူမုန်း မူသုံး’ ပုံစံမျိုးသက်ရောက်နေသဖြင့် ဒီမိုကရေစီစံနှုန်းနှင့် ဆန့်ကျင်နေခြင်းကြောင့် ယင်းစွဲဆိုမှုအပေါ် ပြန်လည်စဉ်းစား သုံးသပ်ပေးရန် နိုင်ငံတော်အစိုးရအား အလေးအနက်တောင်းဆိုလိုက်သည်” ဟု ထုတ်ပြန်ချက်တွင် ဖော်ပြထားသည်။
ဧပြီ ၂၅ ရက်နေ့က မင်းကင်းမြို့နယ် ကျောက်တန်းကျေးရွာတွင် မောင်သွေးချွန်က “လွှတ်တော်ဥက္ကဋ္ဌ နှစ်ယောက်လုံးဟာ ခရစ်ယာန်တွေဖြစ်သွားပြီ၊ ဗုဒ္ဓဘာသာတွေ အနားကပ်လို့ မရတော့ဘူး။ ကျွန်တော်တို့ တောင်းဆိုခဲ့တဲ့ မျိုးစောင့်ဥပဒေတွေ လွှတ်တော်ထဲမှာ မကြာခင် ဖျက်သိမ်းကောင်း ဖျက်သိမ်းခံရတော့မယ်။ ဒုသမ္မတတစ်ယောက်ကလည်း ခရစ်ယာန်၊ ခရစ်ယာန်တွေ ဘေးနားမှာလည်း မွတ်စလင်တွေပေါင်းပြီး ဗုဒ္ဓဘာသာကို အမြစ်ပြတ်အောင် လုပ်တော့မယ်” ဟု ဟောပြောခဲ့သည်။
ထိုဟောပြောချက်နှင့် ပတ်သက်ပြီး မောင်သွေးချွန်သည် နိုင်ငံတော်အကြည်ညိုပျက်စေမှုဖြင့် ထိုမြို့နယ်တွင် တရားစွဲခံနေရသည်။
မောင်သွေးချွန်၏ ဟောပြောချက်မှာ “ယထာဘူတကျကျ အမြင်ဖွင့်” ဟောပြောချက်ဖြစ်သည်ဟု ဖောင်ဒေးရှင်းကြေညာချက်က ဆိုသည်။
စာမျက်နှာ နှစ်မျက်နှာရှိသော ကြေညာချက်တွင် မြန်မာပြည်အရေးနှင့် ပတ်သက်ပြီး အများအပြားဖော်ပြထားရာ ဘာသာပေါင်းစုံအဖွဲ့၏ လုပ်ရပ်များကို ရှုတ်ချကန့်ကွက်သည်ဟူသော အချက်ကို ထိပ်ဆုံးတွင် ဖော်ပြထားသည်။ ကန့်ကွက်ရသည့်အကြောင်းရင်း သုံးခုကိုလည်း ဖော်ပြထားသည်။
အစိုးရနှင့် တပ်မတော်ကို နိုင်ငံတကာက အရေးယူရေး ကြိုးပမ်းနေသူတို့ကိုလည်း ပြင်းထန်စွာ ကန့်ကွက်ထားသည်။
တိုင်းပြည်နှင့် လူမျိုးအတွက် ကာကွယ်စောင့်ရှောက်နေသော တပ်မတော် ထိခိုက်နစ်နာအောင် ပြုလုပ်သူတို့ကိုလည်း ကန့်ကွက်သည်ဟု ကြေညာချက်က ဆိုသည်။
အင်းစိန်မြို့၊ ကျောက်တော်ကြီးဘုရားအနီး သီရိမင်္ဂလာမဟာသာသနာ့ဗိမာန်ခန်းမတွင် ကျင်းပသော ဖောင်ဒေးရှင်း၏ နှစ်ပတ်လည်စုံညီပွဲသို့ တက်ရောက်သူ သံဃာများ၊ သီလရှင်များ အများအပြား တက်ရောက်ခဲ့သည်။
နှစ်ပတ်လည် စုံညီတွေ့ဆုံ သြဝါဒခံယူပွဲနှင့်အတူ ဆွမ်းဆန်စိမ်းလောင်းလှူပွဲပြုလုပ်ရာ ရန်ကုန်တိုင်းစစ်ဌာနချုပ်၏ လှူဖွယ်ပစ္စည်းများ တွေ့ရပြီး အတိုက်အခံပါတီဖြစ်သော ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီကလည်း အလှူပွဲတွင် ပါဝင်ကြောင်း တွေ့ရသည်။
