တပ်မတော်နှင့် တပ်မတော်အောက်ရှိ အဖွဲ့အစည်းများ၏ Facebook နှင့် Instagram (အင်စတာဂရမ်) တို့ကို ရက်အကန့်အသတ်မရှိ တားမြစ်ပိတ်ပင်လိုက်ကြောင်း Facebook မှ ယနေ့ ထုတ်ပြန်လိုက်သည်။
“ အာဏာသိမ်းမှု ဖြစ်ပွားခဲ့တဲ့ ဖေဖော်ဝါရီ ၁ နောက်ပိုင်း လူသေဆုံးမှုတွေ ပါဝင်လာခဲ့တဲ့ အကြမ်းဖက်မှုတွေကြောင့် ဒီတားမြစ်ပိတ်ပင်မှုကို လုပ်ဆောင်ရန်အတွက် လိုအပ်လာပါတယ်။ တပ်မတော်ကို Facebook နဲ့ Instagram မှာ ဆက်လက်ထားရှိစေဖို့ဆိုတာ အင်မတန်အန္တရာယ်များတဲ့ အခြေအနေတစ်ရပ်လို့ ယုံကြည်ပါတယ်” ဟု Facebook ၏ ယနေ့ ထုတ်ပြန်ချက်တွင် ဖော်ပြထားသည်။
အဆိုပါ ဖယ်ရှားမှုတွင် တပ်မတော်နှင့် တပ်မတော်၏ တိုက်ရိုက်စီမံမှုရှိသည့် အစိုးရအဖွဲ့အစည်း၊ သတင်းနှင့်ပြန်ကြားရေးအဖွဲ့အစည်းများ ပါဝင်မည် ဖြစ်သည်။
ထို့ကြောင့် ဆိုရှယ်လူမှုကွန်ရက် ပလက်ဖောင်းဖြစ်သော Facebook နှင့် Instagram တို့တွင် မြန်မာ့တပ်မတော်နှင့် သက်ဆိုင်သောအကြောင်းအရာများကို လုံးဝတွေ့မြင်ရမည် မဟုတ်တော့ပေ။
ထို့ပြင် အဆိုပါ ပလက်ဖောင်းများ၌ တပ်မတော်၏ စီးပွားရေးလုပ်ငန်းများ ကြော်ငြာခွင့် ကိုလည်း ပိတ်ပင်လိုက်ကြောင်း ပါရှိသည်။
သို့ရာတွင် ကျန်းမာရေးနှင့်အားကစားဝန်ကြီးဌာန၊ ပညာရေးဝန်ကြီးဌာနကဲ့သို့ အများပြည်သူဝန်ဆောင်မှု ပေးရသော အစိုးရဌာနအဖွဲ့အစည်းများ မပါဝင်ပေ။
ထိုသို့ မြန်မာ့တပ်မတော်နှင့်ဆိုင်သော အကြောင်းအရာများကို ဖယ်ရှားရန် အချက် ၄ ချက်ပေါ် မူတည် ဆုံးဖြတ်ခဲ့သည်ဟု Facebook က ဆိုသည်။
တပ်မတော်၏ လူ့အခွင့်အရေး ချိုးဖောက်မှုနှင့် အကြမ်းဖက်မှုများ၊ တပ်မတော်၏ Facebook တွင် မျှဝေသည့်အကြောင်းအရာများသည် လူမှုအသိုင်းအဝိုင်းကာကွယ်ရန် ချမှန်ထားသည့် မူဝါဒများအား အကြိမ်ကြိမ် ချိုးဖောက်ခြင်း၊ ပုံမှန်မဟုတ်သည့် စုပေါင်းလှုံ့ဆော်မှု အပြုအမူ (CIB) ကွန်ရက်များ လှုပ်ရှားလာပြီး အကြမ်းဖက်မှုလှုံ့ဆော်ခြင်းနှင့် ထိခိုက်မှုဖြစ်အောင် ကြံစည်ခြင်း အစရှိသော Facebook စံနှုန်းများ ချိုးဖောက်ခြင်း တို့ကို တပ်မတော်အကောင့်များမှ တင်နေ၍ ဖယ်ရှားခဲ့ရခြင်း၊ အွန်လိုင်းမှာ ခြိမ်းခြောက်မှုများက ပြင်ပမှာပါ အန္တရာယ် ဖြစ်စေနိုင်ခြင်း အစရှိသည့် အချက် ၄ ချက်ကြောင့် ဖြစ်သည်ဟု ဆိုသည်။
အာဏာသိမ်းပြီး ဖေဖော်ဝါရီ ၁ နောက်ပိုင်းကတည်းက တပ်မတော်သတင်းမှန်ပြန်ကြားရေး စာမျက်နှာ၊ MRTV နဲ့ MRTV Live စာမျက်နှာများကို သတ်မှတ်ထားသော စံနှုန်းများနှင့် မကိုက်ညီဘဲ အကြမ်းဖက်မှုများကို လှုံ့ဆော်သောကြောင့် ဖယ်ရှားခဲ့ကြောင်း Facebook ထုတ်ပြန်ချက်တွင် ပါရှိသည်။
ထို့ပြင် တပ်မတော်က စီမံထိန်းချုပ်နေသည့် စာမျက်နှာနှင့် အကောင့် ၂၃ ခု၏ အကြောင်းအရာများ ကို အသုံးပြုသူများ မြင်နိုင်မှု လျော့အောင် လုပ်ဆောင်ခဲ့ကြောင်း ပါရှိသည်။
အမေရိကန်အခြေစိုက် အဖွဲ့တစ်ခုဖြစ်သော Business for Social Responsibility (BSR) အဖွဲ့က Facebook သည် မြန်မာနိုင်ငံတွင် လူ့အခွင့်အရေးချိုးဖောက်မှုများ ဖြစ်ပေါ်စေရေးအတွက် အားပေးသည့် နေရာတစ်ခု ဖြစ်နေသည်ဟု ၆၂ မျက်နှာပါ အစီရင်ခံစာတစ်စောင် ၂၀၁၈ တွင် ပေါ်ထွက်လာခဲ့သည်။
ထို့နောက် ဗိုလ်ချုပ်မှူးကြီးမင်းအောင်လှိုင် အပါအဝင် တပ်မတော်နှင့်ပတ်သက်သည့် အဖွဲ့အစည်း၊ လူပုဂ္ဂိုလ် အစရှိသော ၂၀ ကျော်ကို လူ့အခွင့်အရေး ချိုးဖောက်မှုဖြင့် Facebook မှ ဖယ်ရှားခဲ့သည်။
၂၀၁၈ မှ ၂၀၂၀ အတွင်း ပုံမှန်မဟုတ်သည့် စုပေါင်းလှုံ့ဆော်မှု အပြုအမူ (CIB) ကွန်ရက် အနည်းဆုံး ၆ ခုကို ဖယ်ရှားခဲ့ကြောင်း Facebook က ဆိုသည်။
လတ်တလောတွင် မြန်မာနိုင်ငံ၌ Facebook,Instagram,Youtube,Twitter,Google အသုံးပြုမှုများ ပိတ်ပင်ခံထားရပြီး VPN ကဲ့သို့ တည်နေရာပြ ကြားခံအက်ပလီကေးရှင်းဖြင့် လူထုက သုံးစွဲနေရသည်။
