မြောက်ပိုင်းမဟာမိတ်တို့နှင့် အပစ်ရပ်နိုင်ရေး ကြိုးစားနေဟု စစ်ကောင်စီထုတ်ပြန်

မြောက်ပိုင်းမဟာမိတ်များနှင့် အပစ်ရပ်နိုင်ရေး ကြိုးစားနေကြောင်းနှင့် ကြားဝင်စေ့စပ်ပေးသည့် တရုတ်အစိုးရကို ကျေးဇူးတင်ကြောင်း စစ်ကောင်စီပြောခွင့်ရအရာရှိ ဗိုလ်ချုပ်ဇော်မင်းထွန်းက စစ်တပ်ထိန်းချုပ် သတင်းဌာနများမှတစ်ဆင့် ယနေ့တွင် ထုတ်ဖော်ပြောကြားလိုက်သည်။

၁၀၂၇ စစ်ဆင်ရေးကြောင့် အထိနာခဲ့သည့် စစ်ကောင်စီသည် မြောက်ပိုင်းမဟာမိတ်တပ်များဖြစ်ကြသည့် ကိုးကန့်တပ် MNDAA၊ တအာင်းတပ် TNLA နှင့် ရခိုင်တပ် AA တို့နှင့် ယခုလအစောပိုင်းက တရုတ်နိုင်ငံတွင် ဆွေးနွေးခဲ့ကြခြင်းဖြစ်သည်။

ထိုဆွေးနွေးပွဲသည် ပြီးခဲ့သည့် ဇန်နဝါရီလအတွင်းက စတင်ခဲ့သည့် ဟိုင်ဂင်သဘောတူညီချက်ဟုခေါ်သည့် စစ်ကောင်စီနှင့် မြောက်ပိုင်းမဟာမိတ်တို့အကြား ဆွေးနွေးပွဲ၏ နောက်ဆက်တွဲဆွေးနွေးပွဲဖြစ်သည်။

ထိုဆွေးနွေးပွဲအတွင်း MNDAA ကို ကိုးကန့်ဒေသ၏ တရားဝင်အစိုးရအဖြစ် အသိအမှတ်ပြုပေးရေး၊ မြောက်ပိုင်းမဟာမိတ်တပ်များ သိမ်းပိုက်ထားသည့် ရှမ်းမြောက်မှ မြို့များကို စစ်ကောင်စီက တရားဝင်စွန့်လွှတ်ရေး၊ နယ်စပ်ကုန်သွယ်ရေးတွင် မြောက်ပိုင်းမဟာမိတ်တပ်များ ဦးဆောင်အခွန်ကောက်ခွင့်တို့ကို သဘောတူညီမှု ရခဲ့သည်ဟု သတင်းများထွက်ပေါ်ခဲ့သည်။

စစ်ကောင်စီပြောခွင့်ရအရာရှိ ဗိုလ်ချုပ်ဇော်မင်းထွန်းက နယ်စပ်ဂိတ်များ စီမံခန့်ခွဲမှုနှင့် ကုန်သွယ်မှုတို့သည့် တရုတ်အစိုးရနှင့် စစ်ကောင်စီလက်ထဲတွင်သာ ရှိနေသေးသည်ဟု ယနေ့ပြောကြားချက်တွင် ထည့်သွင်းပြောဆိုခဲ့သည်။

ဆွေးနွေးပွဲအတွင်း သဘောတူညီချက်များကို ထုတ်ဖော်ပြောဆိုခြင်းမပြုရန် သဘောတူထားသည့်အတွက် အသေးစိတ်ကို ပြောကြားမည်မဟုတ်ကြောင်းနှင့် ပိုင်နက်နယ်မြေနှင့် နယ်နိမိတ်အချုပ်အချာအာဏာသည် မပြောင်းလဲသေးဟုလည်း ၎င်းက ဆိုသည်။

မြောက်ပိုင်းမဟာမိတ်တို့သိမ်းပိုက်ထားသည့် နယ်မြေများ ခွဲဝေပေးခဲ့သည်ဟု သတင်းထွက်လာချိန်တွင် စစ်ကောင်စီက TNLA သိမ်းဆည်းထားသည့် နမ္မတူ၊ နမ့်ဆန်နှင့် မန်တုံမြို့များကို ယနေ့တွင် စစ်အုပ်ချုပ်ရေးကြေညာခဲ့သည်။

ပြီးခဲ့သည့်နှစ် အောက်တိုဘာ ၂၇ ရက်က စတင်သည့် ၁၀၂၇ စစ်ဆင်ရေးအတွင်း စစ်ကောင်စီတပ်က ရှမ်းပြည်နယ်မြောက်ပိုင်းရှိ ရာနှင့်ချီသည့် စစ်တပ်စခန်းပေါင်း များစွာကို စွန့်လွှတ်ခဲ့ရပြီး သေကြေ၊ ဒဏ်ရာရမှုများစွာရှိခဲ့သလို ထောင်နှင့်ချီသည့် စစ်ကောင်စီတပ်ဖွဲ့ဝင်များ မြောက်ပိုင်းသုံးဖွဲ့ထံ လက်နက်ချခဲ့ကြသည်။

ကိုးကန့်ဒေသမြို့တော် လောက်ကိုင်နှင့် ဒေသတစ်ခုလုံးကို MNDAA က ပြန်လည် ထိန်းချုပ်နိုင်ခဲ့သလို တအာင်းတပ်မတော် (TNLA) ကလည်း ရှမ်းမြောက်ရှိ မိုင်းလုံ၊ မိုင်းငေါ့၊ နမ့်ဆန်၊ နမ့်ခမ်း၊ မန်တုံ၊ နမ္မတူနှင့် ကွတ်ခိုင်မြို့တို့ကို သိမ်းပိုက်ထားသည်။

ရက္ခိုင့်တပ်တော် AA ကလည်း နိုင်ငံအနောက်ပိုင်း ရခိုင်ပြည်နယ်နှင့် ပလက်ဝမှ စစ်ကောင်စီ စစ်စခန်းများ၊ မြို့များကို ဆက်လက်တိုက်ခိုက်နေသည်။