ရန်ကုန် – နိုင်ငံတော်လျှို့ဝှက်ချက် အက်ဥပဒေဖြင့် ထောင်ချထားသည့် ရိုက်တာသတင်းထောက်များ၏ အမှုကို ပြန်လည်ကြားနာရန် သင့်မသင့်ကို ရန်ကုန်တိုင်းလွှတ်တော်က ၂၀၁၉ ဇန်နဝါရီတွင် အဆုံးအဖြတ်ပေးမည်ဟု သတင်းထောက်များ၏ ရှေ့နေကပြောသည်။
အသက် ၃၂ နှစ်အရွယ် ကိုဝလုံးနှင့် အသက် ၂၈ နှစ်အရွယ် ကိုကျော်စိုးဦးတို့အား နိုင်ငံတော်လျှို့ဝှက်ချက် အက်ဥပဒေ ၃/၁ (ဂ) ဖြင့် မြောက်ပိုင်းခရိုင်တရားရုံးက စက်တင်ဘာလဆန်းတွင် ထောင် ၇ နှစ် ချခဲ့ခြင်းဖြစ်သည်။
အယူခံကို တိုင်းတရားလွှတ်တော်က လက်မခံပါက နေပြည်တော်ပြည်ထောင်စု တရားလွှတ်တော်ချုပ်အထိ တက်ရန်ဆုံးဖြတ်ထားသည်ဟု အယူခံအမှုကို ရန်ကုန်တိုင်းတရားလွှတ်တော်တွင် ယနေ့စတင်ကြားနာသည့်တရားခွင်အပြီး ရိုက်တာသတင်းထောက်များ၏ ရှေ့နေ ဦးသန်းဇော်အောင်က ပြောသည်။
“မူလအမှုစစ်တရားရုံးရဲ့ လွဲမှားမှုတွေကို အယူခံတရားရုံးကနေ သေချာသုံးသပ်ပြီးတော့ ဝလုံးနဲ့ ကျော်စိုးဦးတို့ကို လွတ်မြောက်ဖို့အတွက် သူတို့ဆုံးဖြတ်ပေးနိုင်မယ်လို့တော့ မျှော်လင့်ပါတယ်” ဟု ၎င်းကပြောသည်။
ယနေ့တရားခွင်တွင် သတင်းထောက်များထံမှ တွေ့ရှိသည်ဆိုသည့် စာရွက်စာတမ်းများအကြောင်း ရဲ၏ထွက်ဆိုချက်နှင့် တရားခွင်အတွင်းထွက်ဆိုချက် ကွဲပြားပုံကို အဓိက လျှောက်ထားခဲ့ကြောင်း ၎င်းကပြောသည်။
ရိုက်တာသတင်းထောက်များအား အင်းစိန်ထောင်တွင်း ထိန်းသိမ်းထားပြီး ၎င်းတို့၏ ကျန်းမာရေး အခြေအနေမှာ ကောင်းမွန်ကြောင်း ဒီဇင်ဘာလ ဒုတိယအပတ်အတွင်းက ထောင်ဝင်စာ သွားတွေ့ခဲ့သည့် မိသားစုများကပြောသည်။
