နှင်းဆီပါတီဥက္ကဋ္ဌ ဦးကျော်မြင့်၏ ဘဏ်ငွေစာရင်းများ၊ စီးပွားရေးလုပ်ငန်းများ၊ ပိုင်ဆိုင်မှုများနှင့် ပတ်သက်၍ ကနဦးစစ်ဆေးတွေ့ရှိချက်များကို နိုင်ငံတော်သမ္မတရုံးက ယနေ့ (အောက်တိုဘာ ၁၅) တွင် သတင်းစာရှင်းလင်းပွဲဖြင့် ထုတ်ပြန်ရှင်းလင်းခဲ့သည်။
နှင်းဆီပါတီဥက္ကဋ္ဌ ဦးကျော်မြင့်၏ ဘဏ်ငွေစာရင်း ၅၉ ခုကို ကနဦးစစ်ဆေးခဲ့ရာတွင် တရုတ်နိုင်ငံမှတဆင့် ငွေကျေပ် ၁၆ ဘီလျံကျော်ကို တရားမဝင်လွှဲပြောင်း ရယူခဲ့ပြီး ချေးငွေလုပ်ငန်းများလည်း တရားမဝင်လုပ်ကိုင်ခဲ့ကြောင်း၊ ဦးကျော်မြင့်ပိုင်ဆိုင်သည့် အိမ်ခြံမြေပစ္စည်းများတွင် လုပ်ထုံးလုပ်နည်းနှင့် မကိုက်ညီဘဲ ရယူထားသည်များလည်း ပါဝင်ကြောင်း သိရသည်။
နှင်းဆီပါတီဥက္ကဋ္ဌကို လက်ရှိစွဲဆိုထားသည့် ထောင်ပြေးမှု ပုဒ်မ ၂၂၄ အပြင် ရာဇသတ်ကြီးပုဒ်မများ၊ နိုင်ငံရေးပါတီများ မှတ်ပုံတင်ခြင်းဥပဒေပါ ပုဒ်မများ၊ လူဝင်မှုကြီးကြပ်ရေးဥပဒေဆိုင်ရာ ပုဒ်မများဖြင့်လည်း ဆောင်ရွက်သွားရန်ရှိသည်ဟု ဦးဇော်ဌေးက ပြောကြားခဲ့သည်။
