(မန္တလေး) – တစ်လလျှင် ကျောက်မျက်ရတနာ ခိုးယူမှုနှင့် လိမ်လည်ရောင်းမှု ၄မှုမှ ၈ မှုနှုန်း ရှိခဲ့သည့် မန္တလေးမြို့မဟာအောင်မြေ ကျောက်ဝိုင်းတွင် ပြီးခဲ့သည့် ဇူလိုင်လအတွင်းက လုံခြုံရေး စောင့်ကြည့်ကင်မရာများ တပ်ဆင်ခဲ့ပြီးနောက် မသမာမှုများ သိသိသာသာ ကျဆင်းသွားကြောင်း ကျောက်ဝိုင်းတာဝန်ခံများကပြောသည်။
“စည်ပင်ရဲမှာမှတ်တမ်းတွေရှိတယ်။ CCTV တွေနေရာအနှံ့ တပ်ဆင်ပေးထားတယ်။ ဘယ်သူကသူခိုး ဘယ်သူကဆေးဆိုး( ကျောက်အတုရောင်းတဲ့သူ)တွေဆိုတာ သူတို့အထဲမှာ နာမည်တွေနဲ့ မှတ်တမ်းတင်ထားတယ်” ဟု မဟာအောင်မြေကျောက်မျက်ရုံး ပြန်ကြားရေးတာဝန်ခံ ဦးကျော်ကျော်ဦးကပြောသည်။
ကျောက်ဝိုင်း နေရာအနှံ့ လုံခြုံရေးကင်မရာ ၄၈ လုံး တပ်ဆင်ထားပြီး ၄င်းတို့အနက် ၃၁ လုံးကို စည်ပင်က အကုန်အကျခံကာတပ်ဆင်ပေးခြင်းဖြစ်ပြီး ကျန်ကင်မရာများအား ကျောက်မျက်ရုံး၏ အစီအစဉ်ဖြင့် တပ်ဆင်ခဲ့ခြင်း ဖြစ်ကြောင်း ၄င်းကပြောသည်။
“အရင်တုန်းကဆိုကျောက်ခိုးတာတွေ ဆေးဆိုးကျောက်တွေလိမ်ရောင်းတာတွေတအားပေါတယ်။ လူတွေကလည်းတအားများတော့ ကိုယ့်ဆီကကျောက်နှိုက်သွားလည်းမသိဘူး။ ခဏခဏခံရတယ် အခုနောက်ပိုင်းcctvကင်မရာတွေတပ်ပြီး လုံခြုံရေးအထူးဆောင်ရွက်ပေးတော့ နည်းနည်းတော့ လျော့သွားတာပေါ့” ဟု ၄၁လမ်းသင်္ဂဇာချောင်းအနီး မဟာအောင်မြေကျောက်မျက်ဝိုင်း မှ ကျောက်စိမ်းရောင်းသူ မသင်းသင်းဦးကပြောသည်။
