တရုတ်ရုပ်ရှင် No More Bets ကို စစ်ကောင်စီနှင့် ကမ္ဘောဒီးယား ကန့်ကွက်

ကျားဖြန့်ဟု အလွယ်ခေါ်ကြသည့် အွန်လိုင်းငွေကြေးလိမ်လည်မှုလုပ်ငန်းများအကြောင်း တရုတ်ရုပ်ရှင်ဇာတ်ကား No More Bets သည် နိုင်ငံ၏ပုံရိပ်ကို ထိခိုက်စေသည်ဟု မြန်မာနှင့် ကမ္ဘောဒီးယားတို့က ပြီးခဲ့သည့် ရက်ပိုင်းအတွင်း တရုတ်ကို ညင်သာစွာ အသိပေးလိုက်ကြသည်။

ထိုရုပ်ရှင်ကို ကန့်ကွက်သည်ဟု နန်နင်းမြို့ရှိ စစ်ကောင်စီ၏ ကောင်စစ်ဝန်ချုပ် ဦးကျော်စိုးသိန်းက စက်တင်ဘာလ ၂၆ ရက်နေ့က ဒေသတွင်း အရာရှိငယ်တစ်ဦးကို တွေ့စဉ် ပြောကြားခဲ့ကြောင်း ယနေ့ထုတ် Global New Light of Myanmar က ရေးသားသည်။

ကောင်စစ်ဝန်ချုပ် တွေ့ဆုံခဲ့သူမှာ တရုတ်နိုင်ငံ ကွမ်ရှီးကျွမ့်ကိုယ်ပိုင်အုပ်ချုပ်ခွင့်ရဒေသ၊ နိုင်ငံခြားရေးရုံးမှ ညွှန်ကြားရေးမှူး Ms. Lian Yin ဆိုသူ ဖြစ်သည်။

သြဂုတ် ဒုတိယသီတင်းပတ်မှစတင်ပြီး တရုတ်နှင့် ကမ္ဘာအနှံ့တွင် ရုံတင်ပြခဲ့သည့် ၂ နာရီ ၁၀ မိနစ်ကြာသည့် ထိုရုပ်ရှင်တွင် နယ်စပ်အခြေစိုက် လောင်းကစားဂိုဏ်းများက အလုပ်ပေးမည်ဟု စည်းရုံးကာ တရုတ်နိုင်ငံသားများကို လူကုန်ကူးကြပုံ၊ ရက်စက်စွာနှိပ်စက်ညှဉ်းပန်းပုံများကို ထည့်သွင်းရိုက်ကူးထားသည်။

ထိုဇာတ်ကားမှာ မြန်မာ၊ ကမ္ဘောဒီးယား၊ ထိုင်းတို့တွင် အမှန်တကယ် ပေါ်ပေါက်နေသော၊ ကမ္ဘာတစ်လွှားမှ အလုပ်အကိုင်ရှာဖွေသူများ ကြုံတွေ့ရင်ဆိုင်နေရသော ဖြစ်ရပ်များကို အခြေခံထားခြင်း ဖြစ်သည်။

ဇာတ်ကားထဲတွင် မြန်မာနိုင်ငံဟု အတိအကျမပါဝင်သော်လည်း မြန်မာစကားပြောဇာတ်ဝင်ခန်းနှင့် မြန်မာစာသုံး ဆိုင်းဘုတ်များကို ထည့်သွင်းရိုက်ကူးထားသည်။

ဇာတ်ဝင်ခန်းတစ်ခုတွင် လူကုန်ကူးခံရသည့် အမျိုးသမီးက မြန်မာစကားပြောရဲများရှိရာ ရဲစခန်းသို့ လာရောက် အကူအညီတောင်းခံပုံကို ပြသထားသည်။ ရဲစခန်းတွင် စာလုံးဖောင့်မမှန်သည့် မြန်မာဆိုင်းဘုတ်များ ချိတ်ဆွဲထားပြီး ထိုစခန်းရှိ ရုပ်သံစက်ကလည်း မြန်မာစကားပြောသတင်းအစီအစဉ်ကို ပြသနေသည်။

ထို့နောက် မြန်မာစကားပြောရဲများက ထိုအမျိုးသမီးကို မကူညီဘဲ ဖမ်းချုပ်ပြီး လူဆိုးဂိုဏ်းများထံ ပြန်ပို့လိုက်သည်။ ရဲစခန်းတွင် ရှိနေသည့် ထိုအမျိုးသမီးကို လူကုန်ကူးဂိုဏ်သားများက လာရောက်ခေါ်ဆောင်ချိန်တွင် ရဲနှင့် လူကုန်ကူးဂိုဏ်သားတို့က စစ်တပ်ထုတ် မြန်မာဘီယာကို သောက်ရင်း အောင်ပွဲခံကြပုံကိုလည်း ထည့်သွင်းရိုက်ကူးထားသည်။

သို့သော် ဇာတ်ဝင်ခန်းတွင် ပြသသည့် ရဲများ၏ ဝတ်စုံနှင့် လက်မောင်းတံဆိပ်တို့သည် စစ်ကောင်စီလက်အောက်မှ ရဲများ၏ အသုံးအဆောင်များ မဟုတ်ပေ။

နန်နင်းအခြေစိုက် စစ်ကောင်စီခန့် ကောင်စစ်ဝန်ချုပ် ဦးကျော်စိုးသိန်းက ထိုရုပ်ရှင်ကြောင့် တရုတ်နိုင်ငံသားများ မြန်မာနိုင်ငံသို့ လာရောက်ရန် စိုးရိမ်နေသည်ဟုလည်း တရုတ်အရာရှိကို ပြောကြားခဲ့သည်ဟု ဆိုသည်။

ထိုသို့ ပြောဆိုကြောင်းကို အင်္ဂလိပ်ပိုင်းသတင်းထုတ်ပြန်ချက်တွင် အထက်ပါအတိုင်း ဖော်ပြထားသော်လည်း နိုင်ငံခြားရေးဝန်ကြီးဌာန Facebook စာမျက်နှာတွင် မြန်မာဘာသာဖြင့် ရေးသားထုတ်ပြန်ရာတွင်မူ ထိုသို့ ပြောဆို ကန့်ကွက်ကြောင်း ဖော်ပြမထားပေ။

အချိန်နှောင်းမှ ညင်သာစွာ ကန့်ကွက်စကားဆိုသော ကမ္ဘောဒီးယားနှင့် မြန်မာအာဏာရှင်တို့သည် တရုတ်အစိုးရ၏ သြဇာကို မလွန်ဆန်နိုင်သည့် အခြေအနေတွင် ရှိနေကြသည်။

ကမ္ဘောဒီးယား၏ ကန့်ကွက်မှု

ကမ္ဘောဒီးယား၏ ယဉ်ကျေးမှုဝန်ကြီးဌာနက တရုတ်သံရုံးကို လူကုန်ကူးမှုနှင့် လိမ်လည်မှုများအကြောင်း ရိုက်ကူးထားသည့် ထိုဇာတ်ကားနှင့် ပတ်သက်ပြီး ပြန်လည် လေ့လာသုံးသပ်ရန် တောင်းဆိုထားကြောင်း ဖနွမ်းပင်မြို့တော်အခြေစိုက် Cambodianess အွန်လိုင်းတွင် စက်တင်ဘာ ၂၇ ရက်နေ့က ဖော်ပြထားသည်။

နိုင်ငံ၏ပုံရိပ်ကို ထိခိုက်စေသည့် ရုပ်ရှင်ဖြစ်သည်ဟု ဝန်ကြီးဌာန ပြောခွင့်ရအရာရှိ Sum Map က ပြောကြောင်း သတင်းတွင် ဖော်ပြထားသည်။

‘No More Bets’ ဇာတ်ကားကို ပြသခြင်းမပြုရန် တရုတ်သံရုံးကို တောင်းဆိုထားသည်ဟု သူက ဆိုသည်။

“သံရုံးက အဲဒါနဲ့ ပတ်သက်လို့ ဆောင်ရွက်နေဆဲဖြစ်ပါတယ်။ တကယ်လို့ ထုတ်လွှင့်ပြသနေပြီ ဆိုရင်လည်း ကမ္ဘောဒီးယားမှာ ဒီဇာတ်ကားကို ပိတ်ပင်ထားဖို့ ဝန်ကြီးဌာနက ဒေသအာဏာပိုင်တွေကို တောင်းဆိုပါတယ်” ဟု သူက ပြောသည်။

ကိုဗစ်ကာလ လွန်မြောက်လာပြီဖြစ်သော်လည်း တရုတ်ခရီးသည်များ ဝင်ရောက်မှု နည်းပါးနေချိန်တွင် ဤရုပ်ရှင်ကားကြောင့် ခရီးသွားလုပ်ငန်း ထိခိုက်မည်ကို ကမ္ဘောဒီးယားနှင့် ထိုင်းနိုင်ငံတို့တွင် စိုးရိမ်နေကြသည်။

မြန်မာနိုင်ငံတွင်လည်း အာဏာသိမ်းပြီးနောက် စစ်ကောင်စီ၏ ရက်စက်သည့်လုပ်ရပ်များကြောင့် အနောက်နိုင်ငံမှ ခရီးသွားများ မလာရောက်ကြသည့်အတွက် စစ်ကောင်စီက တရုတ်ခရီးသွားများကို မျှော်နေချိန်တွင် No More Bets ရုပ်ရှင် ထွက်လာခဲ့ခြင်းဖြစ်သည်။

တရုတ်သံရုံး၊ တရုတ်အရာရှိတို့ကို ကမ္ဘောဒီးယားနှင့် မြန်မာတို့က ထိုရုပ်ရှင်အကြောင်း ပြောဆိုမှုသည် နှစ်နိုင်ငံပြည်သူများ ထိုရုပ်ရှင်ဇာတ်ကားအကြောင်း ဒေါသတကြီး ဝေဖန်ပြောဆိုမှုများအပြီး ထွက်ပေါ်လာခြင်း ဖြစ်သည်။

“ရုပ်ရှင်အောင်မြင်မှုရဲ့ အကျိုးဆက်ကတော့ တရုတ်ပြည်သူတွေဟာ မြန်မာပြည်ကို အကြီးအကျယ် ကြောက်ရွံ့ကုန်ကြတာပါ” ဟု မြန်မာတစ်ဦးက Facebook တွင် ရေးသားခဲ့သည်။

အခြားတစ်ဦးကလည်း တရုတ်အစိုးရက နိုင်ငံပြင်ပရာဇဝတ်မှုများတွင် တရုတ်နိုင်ငံသားများ သားကောင်ဖြစ်နေရခြင်းမှ ကာကွယ်နိုင်ရန်အတွက် “အကောင်းဆုံးမီဒီယာလက်နက်” ဖြစ်သော ရုပ်ရှင်ကို အသုံးချနေခြင်းဖြစ်သည်ဟု ဝေဖန်သည်။

မြန်မာ-တရုတ် ချစ်ကြည်ရေးအသင်း ဥက္ကဋ္ဌ ဦးစိန်ဝင်းအောင်ကမူ ထိုဇာတ်လမ်းသည် တရုတ်-မြန်မာချစ်ကြည်ရေးကို ပျက်ပြားအောင် တတိယအုပ်စုတစ်စုက လုပ်ခြင်းဟု သံသယရှိကြောင်း Myanmar Platform သတင်းဌာနနှင့် တွေ့ဆုံမေးမြန်းခန်းတွင် ပြစ်တင်ပြောဆိုသည်။

တရုတ်နိုင်ငံဆိုင်ရာ မြန်မာသံအမတ်ဟောင်းဖြစ်ပြီး ဦးသိန်းစိန်လက်ထက် သမ္မတအကြံပေးလည်းဖြစ်ခဲ့သည့် ဦးစိန်ဝင်းအောင်က ရုပ်ရှင်ကို မကြည့်ရသေးသော်လည်း ထိုဇာတ်လမ်းပါ အကြောင်းအရာများသည် ယုတ်မာစွာဖြင့် ဆောင်ရွက်နေသည်ဟု ဝေဖန်ပြီး နှစ်နိုင်ငံကုန်သွယ်ရေးနှင့် ခရီးသွားလုပ်ငန်းကို ပျက်စီးစေနိုင်သည်ဟုလည်း ဆိုသည်။

AFP သတင်းဌာန၏ အဆိုအရ No More Bets သည် ယခုနှစ်အတွင်း တရုတ်နိုင်ငံ၏ တတိယမြောက် လူကြိုက်အများဆုံးရုပ်ရှင်ဖြစ်လာခဲ့ပြီး ရုံဝင်ကြေး ယွမ် 3.8 ဘီလီယံ (S$721.5 သန်း) ရရှိထားသည်ဟု သိရသည်။

ဤအတောအတွင်း ဖြစ်ရပ်မှန်များကို အခြေခံရိုက်ကူးထားသော ဝါဒဖြန့်ရုပ်ရှင်ကားက ကမ္ဘာပတ်နေပြီဖြစ်သလို တရုတ်အစိုးရကလည်း မြန်မာပြည်နယ်စပ်ဒေသများရှိ အွန်လိုင်းတရုတ်လောင်းကစားဂိုဏ်းများကို နှိမ်နှင်းပေးရန် စစ်ကောင်စီနှင့် တိုင်းရင်းသားလက်နက်ကိုင်များကို ဖိအားပေးလျက်ရှိသည်။

မကြာသေးမီကာလအတွင်း ‘ဝ’ လက်နက်ကိုင်တပ် UWSA က ၎င်းတို့နယ်ထဲမှ ကျားဖြန့်ဂိုဏ်းဝင်ဟု သံသယရှိသူ တရုတ်နိုင်ငံသား ၁၂၀၀ ကျော်ကို ဖမ်းဆီးပြီး တရုတ်အစိုးရထံ လွှဲပေးခဲ့သည်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီ လိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်။