လုံခြုံရေးအပြည့်နဲ့ နေပြည်တော်ကနေ ထွက်ခွာလာတဲ့ စစ်ယာဉ်တန်းကို ရန်ကုန်-မန္တလေး အမြန်လမ်း ၁၆၉ မိုင်၊ ၄ ဖာလုံမှာ ပြည်သူ့ကာကွယ်ရေးတပ်ဖွဲ့တွေက ဇူလိုင်လ ၇ ရက် မနေ့မနက်ပိုင်းက မိုင်းဆွဲတိုက်ခိုက်ခဲ့ပါတယ်။ စစ်ကောင်စီဘက်က ထိခိုက်၊ သေဆုံးမှု အခြေအနေ အသေးစိတ်မသိရပေမဲ့ မနေ့မနက်ပိုင်းက အမြန်လမ်းမှာ မိုင်း ၃ လုံး ပေါက်ကွဲခဲ့တယ်လို့ စစ်ကောင်စီ ကျောထောက်နောက်ခံပေးထားတဲ့ တယ်လီဂရမ်ချန်နယ်တွေမှာ ဖော်ပြထားပါတယ်။ အခုနှစ်ဆန်းပိုင်းတုန်းကလည်း ထောက်လှမ်းရေးအရာရှိ ဗိုလ်မှူးသန်းထွဋ်နှင့်အဖွဲ့ကို ရန်ကုန်-အမြန်လမ်း ၁၆၁ မိုင်၊ ၆ ဖာလုံအနီးမှာ ကာကွယ်ရေးအဖွဲ့တွေက တိုက်ခိုက်ခဲ့ပြီး အဲ့ဒီတိုက်ခိုက်မှုကြောင့် ဗိုလ်မှူးသန်းသန်းထွဋ်နဲ့ တပ်ကြပ်ကြီးတစ်ဦး သေဆုံးခဲ့ပါတယ်။ သတင်းကြိုရတာကြောင့် စောင့်ဆိုင်းပြီး တိုက်ခိုက်နိုင်ခဲ့တာလို့ ကာကွယ်ရေးအဖွဲ့တွေက ပြောပါတယ်။ မနေ့တုန်းက ယာဉ်တန်း တိုက်ခိုက်မှုနဲ့ ပတ်သက်လို့ တောင်ပိုင်းတိုင်း အမှတ် (၂) စစ်ဒေသခွဲရဲ့ ဒုစစ်ဒေသခွဲမှူး ဦးတင်ဦးကို ဆက်သွယ်မေးမြန်းထားပါတယ်။
