ရန်ကုန်မြို့ ဆိပ်ကမ်းများတွင် ကုန်သေတ္တာများ စစ်ဆေးရန် အသုံးပြုသည့် X Ray စက်များအနက် တပ်မတော်၏ ပုဂ္ဂလိကစီးပွားရေးလုပ်ငန်းများဖြစ်သည့် မြန်မာ့စီးပွားရေးဦးပိုင်နှင့် မြန်မာ့စီးပွားရေးကော်ပိုရေးရှင်းကုမ္ပဏီများက ပိုင်ဆိုင်သည့်စက်များမှာ သုံးပုံတစ်ပုံ ပါဝင်နေပြီး ထိုစက်များငှားရမ်းအသုံးပြုခအတွက် ယင်းကုမ္ပဏီများမှာ နှစ်စဉ်ကျပ်ဘီလျံပေါင်းများစွာ ရရှိနေသည်။
ရန်ကုန်ဆိပ်ကမ်းများတွင် စုစုပေါင်း X Ray စက် ကိုးလုံးရှိသည့်အနက် မြန်မာ့စီးပွားရေးဦးပိုင်က စက်နှစ်လုံး၊ မြန်မာ့စီးပွားရေးကော်ပိုရေးရှင်းက စက်တစ်လုံး ပိုင်ဆိုင်ထားသည်။ ကျန်စက်များမှာ နိုင်ငံတော်အစိုးရ၏ အကောက်ခွန်ဌာနပိုင် စက်တစ်လုံး၊ ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီပိုင် စက်တစ်လုံး၊ ရွှေနာဝါကုမ္ပဏီပိုင် စက်နှစ်လုံးနှင့် မြန်မာ့အဏ္ဏဝါစွမ်းကုမ္ပဏီပိုင် စက်နှစ်လုံးတို့ ဖြစ်သည်။
မြန်မာ့စီးပွားရေးဦးပိုင်သည် ဗိုလ်တထောင်မြို့နယ်ရှိ ဗိုလ်အောင်ကျော်ဆိပ်ကမ်းတွင်ရှိသည့် X Ray စက်ကို ၂၀၀၆ တွင် စတင်ရင်းနှီးမြှုပ်နှံခဲ့ပြီး ၂၀၁၈ ခုနှစ်အထိ ၁၂ နှစ်စာအတွက် ထိုစက်မှ အကျိုးအမြတ်အဖြစ် ယူရိုငွေ ၁၂ ဒသမ ၁၈၆ သန်း (ကျပ် ၁၇ ဘီလျံနီးပါး) ခွဲဝေရရှိခဲ့သည်ဟု ၂၀၁၇-၂၀၁၈ ရန်ကုန်တိုင်း စာရင်းစစ်ချုပ်အစီရင်ခံစာတွင် ဖော်ပြထားသည်။
(ဗိုလ်အောင်ကျော်ဆိပ်ကမ်းကို တပ်မတော်အစိုးရလက်ထက် ၂၀၁၀ ခုနှစ်တွင် နိုင်ငံတော်ထံမှ ဦးပိုင်က လွှဲပြောင်းဝယ်ယူခဲ့သည်။)
အလုံမြို့နယ်ရှိ မြန်မာ့စက်မှုဆိပ်ကမ်းတွင်လည်း မြန်မာ့စီးပွားရေးဦးပိုင်က X Ray စက်တစ်လုံးကို ၂၀၁၁ တွင် စတင်ရင်းနှီးမြှုပ်နှံခဲ့ပြီး ၂၀၁၈ အထိ ၇ နှစ်စာအတွက် ယူရို ၄ ဒသမ ၉၃၄ သန်း (ကျပ် ၇ ဘီလျံကျော် ) ခွဲဝေရရှိထားသည်ဟု ယင်းအစီရင်ခံစာက ဆိုသည်။
တပ်မတော်၏ နောက်ထပ်စီးပွားရေးလက်ခွဲတစ်ခုဖြစ်သော မြန်မာ့စီးပွားရေးကော်ပိုရေးရှင်းကလည်း အလုံဆိပ်ကမ်းရှိ X Ray စက်ကို ၂၀၁၅ တွင် စတင်တပ်ဆင်ခဲ့ပြီး ၂၀၁၈ အထိ သုံးနှစ်စာအတွက် ယူရို ၂ ဒသမ ၁ သန်း (ကျပ် ၃ ဘီလျံကျော်) ခွဲဝေရရှိထားသည်ဟု အစီရင်ခံစာတွင် ဖော်ပြထားသည်။
ရန်ကုန်ရှိ အေးရှားဝေါဆိပ်ကမ်းနှင့် ထီးတန်းဆိပ်ကမ်းရှိ X ray စက်နှစ်လုံးမှာ ရွှေနာဝါကုမ္ပဏီမှ ပိုင်ဆိုင်ပြီး ယင်းကုမ္ပဏီမှာ အေးရှားဝေါ၏ လက်အောက်ခံ ကုမ္ပဏီခွဲဖြစ်သည်။ ၂၀၁၈ ထိ အဆိုပါ စက်နှစ်လုံးအတွက် ယူရို ၆ ဒသမ ၅၁၉ သန်း (ကျပ် ၉ ဘီလျံ) ခွဲဝေပေးထားကြောင်း စာရင်းစစ်ချုပ်အစီရင်ခံစာက ဆိုသည်။
မြန်မာ့အဏ္ဏဝါစွမ်းကုမ္ပဏီသည် မြန်မာ့စက်မှုဆိပ်ကမ်းရှိ X ray စက် နှစ်လုံးတွင် ရင်းနှီးမြှုပ်နှံထားပြီး ၂၀၁၈ အထိ ယူရို ၈ ဒသမ ၅၅၃ သန်း (ကျပ် ၁၂ ဘီလျံ) ခွဲဝေရရှိထားသည်။
ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီကလည်း အေးရှား ဝါး(လ်) ဆိပ်ကမ်းရှိ ၎င်းပိုင် X-Ray စက်အသုံးပြုခွင့်မှတစ်ဆင့် ၁၂ နှစ်အတွင်း ကျပ် ၁၆ ဘီလျံကျော် ရရှိခဲ့သည်ကို ဇွန် ၄ တွင် Myanmar Now က သတင်းဖော်ပြခဲ့ပြီးဖြစ်သည်။
နယ်စပ်ဂိတ်များက X Ray စက်များ
ရန်ကုန်တိုင်း ၂၀၁၆-၂၀၁၇ စာရင်းစစ်ချုပ်အစီရင်ခံစာအရ မြန်မာ့စီးပွားရေးဦးပိုင်သည် ၂၀၁၄ နောက်ပိုင်းတွင် မူဆယ်နှင့်မြဝတီနယ်စပ်ဂိတ်တို့၌ ကျပ် ၄ ဘီလျံ နီးပါး တန်ဖိုးရှိ X Ray စက်တစ်လုံးစီ ရင်းနှီးမြှုပ်နှံခဲ့ပြီး ၂၀၁၈ မတ်လအထိ ယူရို ၁ ဒသမ ၃၀၇ သန်း (မြန်မာငွေ တစ်ဘီလျံကျော်) ခွဲဝေရရှိခဲ့သည်။
ကုန်သေတ္တာများ X Ray ရှာဖွေရေးစက် ဖြတ်သန်းခအနေဖြင့် ကုန်သေတ္တာတစ်လုံးလျှင် ကျပ် ၂၀,၀၀၀ သတ်မှတ်ထားပြီး အကျိုးအမြတ်ခွဲဝေမှုစာချုပ်အရ စစ်ဆေးခရငွေ စုစုပေါင်းမှ မီတာခ၊ ကုန်သွယ်လုပ်ငန်းခွန် ၅ ရာခိုင်နှုန်း၊ X Ray ဝန်ထမ်း ကျန်းမာရေး စောင့်ရှောက်ခ ၅ ရာခိုင်နှုန်းတို့ကို နုတ်၍ ကျန်ငွေကို စက်အရေအတွက်ဖြင့်စားကာ စက်တစ်လုံးချင်းစီအလိုက် အချိုးကျပြန်ခွဲပေးသည့်စနစ်ဖြစ်သည်ဟု ၂၀၁၆-၁၇ ဘဏ္ဍာနှစ် ရန်ကုန်တိုင်းဒေသကြီး စာရင်းစစ်ချုပ်အစီရင်ခံစာတွင် ဖော်ပြထားသည်။
သို့ရာတွင် ဌာန၏လုံခြုံရေးဆိုင်ရာအဆင့်အတန်း သတ်မှတ်ချက်အရ လုံခြုံမှုစစ်ဆေးရန် မလိုသည့် ကုန်သေတ္တာများမှာ X Ray စက်ဖြတ်ရန်မလိုသော်လည်း ၎င်းစက်များအတွက် ရသည့် စစ်ဆေးခကို စက်ပိုင်ရှင်ကုမ္ပဏီများအား ခွဲဝေရာတွင် ထည့်သွင်းထားသဖြင့် နိုင်ငံတော်က နစ်နာရသည်ဟု အဆိုပါအစီရင်ခံစာက ဆိုထားသည်။
ထိုကဲ့သို့အကျိုးအမြတ်ခွဲဝေမှုကြောင့် ၂၀၁၆-၁၇ ဘဏ္ဍာရေးနှစ်တစ်ခုတည်းအတွက်ပင် နိုင်ငံတော်မှ ကျပ်သန်းခြောက်ထောင် (၆ ဘီလျံ) ကျော် နစ်နာဆုံးရှုံးခဲ့သည်ဟု စာရင်းစစ်ချုပ်အစီရင်ခံစာက ထောက်ပြထားပြီး၊ လုံခြုံရေးဆိုင်ရာအကျိုးအမြတ်ခွဲဝေမှု စာချုပ်ကို ပြန်လည်ချုပ်ဆိုရန် အကြံပြုထားသည်။
ယခုအခြေအနေနှင့် ပတ်သက်ပြီး မြန်မာ့ဆိပ်ကမ်းအာဏာပိုင်အဖွဲ့၏ လက်ထောက်မန်နေဂျာ ဦးဖုန်းမြင့်ဦးကို Myanmar Now က ဆက်သွယ်မေးမြန်းခဲ့ရာ X ray စက်များနှင့် ပတ်သက်ပြီး မသိရှိကြောင်း၊ သက်ဆိုင်ရာ ဆိပ်ကမ်းများကိုသာ မေးမြန်းရန် ၎င်းက ပြောသည်။
ရန်ကုန်ဆိပ်ကမ်းရှိ X Ray စက်များအား စွမ်းရည်ပိုမိုမြင့်မားသည့် စက်များဖြင့် ၂၀၁၉ ဒီဇင်ဘာနောက်ဆုံးထားပြီး အစားထိုးလဲလှယ်ရန် စက်ပိုင်ရှင်များကို ညွှန်ကြားထားသော်လည်း လက်ရှိတွင် စက်အရေအတွက် မည်မျှလဲလှယ်ပြီးစီးသည်ကို အတိအကျ မသိရှိရသေးကြောင်း အကောက်ခွန်ဦးစီးဌာန ကာကွယ်ရေးဌာနခွဲမှ ညွှန်ကြားရေးမှူး ဦးစိုးဝင်းအောင်က ဇွန်လဆန်းပိုင်းတွင် Myanmar Now ကိုပြောကြားထားသည်။
