ကိုဗစ်နိုင်တင်းရောဂါ ကူးစက်ခံထားရသဖြင့် ပြည်ဆေးရုံတွင် တက်ရောက်ကုသနေသော ပေါက်ခေါင်းမြို့နယ်မှ ကလေးများကို မိခင်ရှိရာ ရန်ကုန်ဝေဘာဂီဆေးရုံသို့ ယနေ့(ဧပြီ ၈)ညနေတွင် ပို့ဆောင်ပေးရန် စီစဉ်နေကြောင်း နိုင်ငံတော် သမ္မတရုံးပြောခွင့်ရပုဂ္ဂိုလ် ဦးဇော်ဌေးက ပြောသည်။
မိခင်မှာ ကိုဗစ်နိုင်တင်းရောဂါ ကူးစက်ခံရသဖြင့် ရန်ကုန်မြို့ရှိ ဝေဘာဂီဆေးရုံ၌ တက်ရောက်ကုသနေရပြီး ပေါက်ခေါင်းမြို့နယ်တွင် နေထိုင်သည့် ဖခင်နှင့်အတူနေ မိသားစုဝင်များဖြစ်သော သား (အသက် ၁၀ နှစ်)၊ သမီး(အသက် ၈ နှစ်)၊ တူမ (အသက် ၁၈ နှစ်)တို့လည်း ရောဂါကူးစက်ခံရ၍ ပြည်ဆေးရုံတွင် ဧပြီ ၂ က တက်ရောက်ကုသနေခြင်းဖြစ်သည်။
ကလေးတို့၏ ဖခင် လူနာနံပါတ် ၁၇ ပေါက်ခေါင်းမြို့နယ် ဒုအုပ်ချုပ်ရေးမှူးမှာ ယနေ့(ဧပြီ ၈)နံနက် ၄ နာရီခန့်တွင် ပြည်ဆေးရုံ၌ ကွယ်လွန်ခဲ့၍ ကျန်ရစ်သည့် သား၊ သမီးနှင့် တူမတို့ကို မိခင်ဖြစ်သူ ဆေးကုသမှုခံယူနေသည့် ရန်ကုန်မြို့သို့ ပြောင်းရွှေ့ပေးရန် အစိုးရက စီစဉ်ခြင်းဖြစ်သည်။
ပေါက်ခေါင်းမြို့နယ် ဒုအုပ်ချုပ်ရေးမှူးမှာ ကိုဗစ်နိုင်တင်းကြောင့် သွေးဆိပ်တက်ခြင်းနှင့် ပြင်းထန်အသက်ရှူလမ်းကြောင်း ရောဂါတို့ဖြင့် သေဆုံးရခြင်းဖြစ်ကြောင်း ကျန်းမာရေးဝန်ကြီးဌာနက ထုတ်ပြန်ထားသည်။
ကလေးငယ်များ၏ မိခင်ကလည်း ဖခင်မရှိတော့သဖြင့် သူတက်ရောက်ကုသနေသည့် ဆေးရုံသို့ ကလေးများကို ပြောင်းရွှေ့ကုသပေးရန် လူမှုကွန်ရက်စာမျက်နှာမှတစ်ဆင့် အကူအညီတောင်းခံထားသည်။
ယင်းနှင့်စပ်လျဉ်း၍ ဦးဇော်ဌေးက “နိုင်ငံတော်ရဲ့အတိုင်ပင်ခံပုဂ္ဂိုလ်က ပြည်ဆေးရုံမှာ တက်ရောက်နေတဲ့ မိသားစုဝင်တွေရဲ့ ကျန်းမာရေးအခြေအနေ ကောင်းမွန်တယ်၊ ခရီးသွားဖို့ ခွင့်ပြုနိုင်တယ်ဆိုရင် လူမှုရေးရှုထောင့်အရ သူ့အမေ တက်ရောက်ကုသနေတဲ့ ဝေဘာဂီဆေးရုံကို Transfer လုပ်ပေးဖို့ ကျန်းမာ/အားကစား ဝန်ကြီးဌာနကို ညွှန်ကြားခဲ့ပါတယ်” ဟု သမ္မတအိမ်တော် သတင်းထောက်များ ဖေ့စ်ဘွတ်ခ်စာမျက်နှာမှတစ်ဆင့် သတင်းထုတ်ပြန်ခဲ့သည်။
လက်ရှိတွင် လူနာတင်ကား အသင့်ပြင်ထားပြီး သူနာပြု အစောင့်အရှောက်နှင့်အတူ မမှောင်ခင် ရန်ကုန်သို့ ထွက်ခွာမည်ဖြစ်ပြီး ညဦးပိုင်းအချိန်တွင် ဝေဘာဂီသို့ ရောက်မည်ဟု ခန့်မှန်းထားကြောင်း ၎င်းကဆက်ပြောသည်။
ယနေ့နံနက် ၁၀ နာရီခန့်တွင် ကိုဗစ်နိုင်တင်း အတည်ပြုလူနာတစ်ဦး ထပ်မံသေဆုံးခဲ့ပြီး ၎င်းမှာ ဒူဘိုင်းနိုင်ငံမှ ပြန်လာသော သားဖြစ်သူအား ရန်ကုန်အပြည်ပြည်ဆိုင်ရာလေဆိပ်တွင် သွားကြိုခဲ့သည့် ကိုဗစ်နိုင်တင်း အတည်ပြုလူနာ အမှတ် ၁၆ ဖြစ်သည်။
အသက် (၆၃) နှစ်အရွယ် အဆိုပါလူနာသည် ဧပြီ ၁ တွင်ထုတ်ပြန်သော ဓာတ်ခွဲအဖြေအရ ကိုဗစ်နိုင်တင်းရောဂါပိုး ဓာတ်ခွဲအတည်ပြုတွေ့ရှိခဲ့ပြီး ဝေဘာဂီအထူးကုဆေးရုံကြီးတွင် ကုသနေသူဖြစ်သည်။
မြန်မာနိုင်ငံတွင် ယနေ့အထိ ကိုဗစ်နိုင်တင်း ရောဂါပိုးတွေ့ရှိသူ ၂၂ ဦးအထိ ရှိနေပြီး သေဆုံးသူသုံးဦး ရှိနေပြီ ဖြစ်သည်။
