လူပေါင်းတစ်ရာကျော်ကို လိမ်လည်၍ အသေးစားချေးငွေ ထုတ်ယူမှုဖြစ်စဉ်တွင် အဓိကပါဝင်နေသည့် ဒလမြို့မှ ရပ်ကွက်ပွဲစား မကေသီမိုးက ၎င်းသည် လိမ်လည်မှု ဖြစ်စဉ်ပါ ကုမ္ပဏီ၏ ဝန်ထမ်းဖြစ်သူအတွက် အလုပ်လုပ်ပေးရခြင်းသာဖြစ်သည်ဟု Myanmar Now ကို ပြောသည်။
ဒလမြို့၊ မှော်စက်၊ ကမာကဆစ်၊ ဆာပါချောင်နှင့် တပင်ရွှေထီးရပ်ကွက်တို့မှ လူပေါင်း ၁၁၅ ဦး၏နာမည်များကို အသုံးပြုပြီး ၂၀၁၉ ခုနှစ် ဒီဇင်ဘာလအတွင်း တောင်ဥက္ကလာပမြို့နယ်တွင် ရုံးချုပ်ဖွင့်ထားသည့် Easy Microfinance အသေးစားငွေရေးကြေးရေးကုမ္ပဏီမှ ကျပ်သိန်း ၅၀၀ မှ ၇၀၀ ကြား မကေသီမိုးက လိမ်လည်ခဲ့ဟု နစ်နာသူများက ပြောဆိုထားသည်ကို Myanmar Now က ဖေဖော်ဝါရီ ၁၄ ရက်က ရေးသားခဲ့သည်။
ထိုကဲ့သို့ လိမ်လည်ရာတွင် မကေသီမိုးအပြင် ဒေါ်ခင်ရတနာသက်ဆိုသည့် ‘တာဝန်ခံ’ ဟု နစ်နာသူများက သိခဲ့ကြသည့် အမျိုးသမီးတစ်ဦးပါ ပါဝင်ခဲ့ပြီး Myanmar Now က နှစ်ဦးစလုံးကို ဆက်သွယ်မရခဲ့ပါ။ သို့ရာတွင် ဖော်ဖော်ဝါရီ ၁၅ ရက်က မကေသီမိုးကို တပင်ရွှေထီးရပ်ကွက် ဗိုလ်တေဇလမ်းရှိ ၎င်း၏နေအိမ်တွင် တွေ့ဆုံခဲ့သည်။
“လူရှာပေးရတာပဲ လုပ်ရတာ၊ ကျန်တာ (ကျွန်မ) ဘာမှ မလုပ်ရဘူး” ဟု မကေသီမိုးက ဆိုသည်။
ထို့ပြင် “မှတ်ပုံတင်နဲ့ သန်းခေါင်စာရင်းရှိရင် (ငွေထုတ်ဖို့) သူ (ခင်ရတနာသက်က) ရအောင် လုပ်ပေးတယ်။ သမီးကတောင် ပြောသေးတယ်။ မကြီးတို့ကုမ္ပဏီက ဆိုင်ရှိမှ ရတာဆိုတော့၊ ရပါ့မလားလို့။ ရတယ် ညီမလေး၊ သူပိုင်တယ်တဲ့” ဟု ခင်ရတနာသက်က သူ့ကိုပြောကြောင်း မကေသီမိုးက Myanmar Now ကိုပြောသည်။
Myanmar Now ၏ ကနဦးသိရသည့် အချက်အလက်များအရ လိမ်လည်ခံရသူမှာ ၁၁၅ ဦးဖြစ်သော်လည်း မကေသီမိုး၏စာရင်းအရ လိမ်လည်ခံရသူ “၁၂၆ ဦး” ရှိနေသည်။
လိမ်လည်ခံရသူများမှာ ကေသီမိုးကိုသာ သိကြပြီး Easy Microfinance ရုံးတွင် ချေးငွေသွားထုတ်သည့်အခါ ‘ခင်ရတနာသက်’ ဟူသည့် နာမည်ကို ပြောရုံဖြင့် လျှောက်ထားသည့် ချေးငွေထက်ပင် ပိုများသည့်ပမာဏကို နှစ်ရက်အတွင်း ရနိုင်ခဲ့ကြသည်။ ပုံမှန်အားဖြင့် ချေးငွေလိုသူအနေဖြင့် ကုမ္ပဏီထံ လျှောက်ထားရာတွင် နောက်ကြောင်းအချက်အလက်များနှင့် စီးပွားရေးလုပ်ငန်းများကို စစ်ဆေးခံရမည့်အချိန်အတွက် အနည်းဆုံး ၁ ပတ်ခန့် ကြာမြင့်လေ့ရှိသည်။
သို့သော် နစ်နာသူများက ပြောဆိုချက်များအရ ၎င်းတို့ မတွေ့မမြင်ဖူးသည့် ‘ခင်ရတနာသက်’ ဆိုသူနှင့် မကေသီမိုးတို့ပူးပေါင်း၍ ၎င်းတို့၏နာမည်များကို Easy Microfinance ကုမ္ပဏီတွင် အမည်ပေါက်အောင်လုပ်ကာ လိမ်လည်သွားခြင်းဖြစ်သည်။
ထို့နောက် Easy Microfinance ကုမ္ပဏီက နာမည်ပေါက် ချေးယူထားသူများထံ ဇန်နဝါရီလကုန်ပိုင်းလောက်တွင် လာရောက်ပြီး ချေးငွေပြန်ဆပ်ရန် လာပြောတော့မှ ၎င်းတို့အမှန်တကယ် ချေးထားသည့် ပမာဏထက်ပိုပြီး အကြွေးတင်နေခြင်း သို့မဟုတ် ငွေလုံးဝမရထားခြင်းကို သိခဲ့ရခြင်းဖြစ်သည်။
နစ်နာသူများ၏ ပြောဆိုချက်အရ ခင်ရတနာသက်မှာ မည်သူဟု မသိခဲ့ရသလို ‘ခင်ရတနာသက်’ ဟူသည့်နာမည်နှင့် ဝန်ထမ်းရှိပါသလား ဟု Myanmar Now က Easy Microfinance ကုမ္ပဏီကို မေးမြန်းခဲ့ရာတွင်လည်း ပြန်လည်မဖြေကြားခဲ့ပေ။
‘ခင်ရတနာသက်က အဲ့ဒီကုမ္ပဏီ (Easy Microfinance) က ဝန်ထမ်း၊ သူ့ယောက်ျားက သင်္ဃန်းကျွန်းရုံးခွဲမှာ အလုပ်လုပ်တယ်။ Easy (Microfinance) ဝန်ထမ်းပဲ” ဟု မကေသီမိုးက ပြောသည်။
ငွေချေးသူများထံမှ ပွဲစားဖြစ်သူ မကေသီမိုးနှင့် ကုမ္ပဏီဝန်ထမ်း ‘ခင်ရတနာသက်’ တို့က ဆင်းရဲသားတို့၏ နာမည်ဖြင့် ငွေချေးပြီး ချေးငွေတစ်ဝက်ကို ဖြတ်ယူထားသည့် အပြင် အခြားလိမ်လည်မှုများလည်း အများအပြား တွေ့ရသည်။
နစ်နာသူများက Myanmar Now ကို ဖေဖော်ဝါရီ ၁၀ ရက်က ပြောကြရာတွင် မကေသီမိုးမှာ လိမ်လည်ပြီး ထွက်ပြေးသွားပြီဟု ယူဆကြပြီး အချို့ကမူ ‘အိမ်တွင်းမှာ ပုန်းအောင်းနေသည်’ ဟု ဆိုကြသည်။
မကေသီမိုး၏အဒေါ် ဒေါ်နီနီမာ က တူမဖြစ်သူအပေါ် အပြစ်ပုံချထားပြီး ဆူပူလာသည့်အတွက် ခတ္တရှောင်ခိုင်းခဲ့ခြင်းဖြစ်သည်ဟု ပြောသည်။ မည်သည့်ရက်ပိုင်းကတည်းက ထိုကဲ့သို့ရှောင်ခဲ့သည်ကိုမူ မသိရဘဲ ဖေဖော်ဝါရီ ၁၅ ရက်ကမှ မော်လမြိုင်မြို့မှ ပြန်ရောက်လာခဲ့သည်ဟု ဒေါ်နီနီမာက Myanmar Now ကို ပြောသည်။
၂၀၁၉ မတ်လ ကတည်းက ချေးငွေကိစ္စကို အတူတူ လုပ်ကိုင်ခဲ့ကြသော်လည်း လိမ်လည်မှုများ စတင်ပေါ်ပေါက်ခဲ့သည့် ဇန်နဝါရီလ ၂၆ ရက်က စတင်ပြီး ခင်ရတနာသက်နှင့် အဆက်အသွယ်မရတော့ ဟု မကေသီမိုးက ပြောသည်။
အခြေခံလူတန်းစားများ ငွေချေးရာတွင် မကေသီမိုးအနေဖြင့် မခင်ရတနာသက်အတွက် ငွေချေးလိုသည့်အလုပ်ကို ၂၀၁၉ ခုနှစ် ၃ လပိုင်းကတည်းက ရှာပေးရကြောင်း၊ ယင်းသို့ လုပ်ကိုင်ရန် မခင်ရတနာသက်က ပွဲစားခ တစ်သိန်းပေးမည်ဖြစ်ကြောင်း ကမ်းလှမ်းသောကြောင့် လုပ်ကိုင်ခဲ့ခြင်းဖြစ်သည်ဟု မကေသီမိုးက ပြောသည်။
ထုတ်ယူရရှိသည့်ချေးငွေများအနက် မခင်ရတနာသက်က (ကျပ်သိန်း ၂၅၀ ကျော်) ကို သုံးစွဲထားပြီး လိမ်လည်ခံရသူများ ကျပ်သိန်း ၃၀၀ ကျော်ချေးပေးထားသည်ဟု သိထားပြီး ၎င်းအနေဖြင့်လည်း ငွေကျပ် ၆၉ သိန်းကို သုံးစွဲထားသည်ဟု မကေသီမိုးက ပြောသည်။
လသာမြို့နယ် ဗိုလ်ရွဲလမ်းရှိ Easy Microfinance ကုမ္ပဏီရုံးခန်း၌ ဒလမြို့နယ်၌ ဖြစ်ပွားသည့် ကိစ္စကို ဇန်နဝါရီလ ၂၆ ရက်က သွားရောက်ရှင်းလင်းခဲ့သေးကြောင်း၊ ထိုအချိန်တွင် ခင်ရတနာသက်က ၎င်းရှင်းပေးမည်ဟုသာ ပြောဆိုခဲ့ပြီး ပြည်သူများထံချေးထားသည့် ငွေထဲမှ ၎င်းသုံးယူထားသည်ကိုလည်း ဝန်ခံခြင်းမရှိကြောင်း မကေသီမိုးက ပြောသည်။
ဒလမြို့၌ ငွေကြေးလိမ်လည်မှုများမပေါ်ပေါက်ခင်ကတည်းက မခင်ရတနာသက်သည် ၎င်းထံမှ ငွေချေးသည့် တွံတေးမြို့မှ အခြေခံလူတန်းစားများထံမှ ကိုယ်တိုင်ပွဲစားခယူပြီး ငွေထုတ်ချေးမှုများရှိခဲ့ကြောင်း၊ ယင်းသို့ အသေးစားချေးငွေပေါ်မှာ ပွဲစားခဖြတ်ယူမှုကို မကျေနပ်သည့် တွံတေးမြို့မှ ချေးငွေထုတ်သူများက ကုမ္ပဏီသို့ တိုင်ကြားရာမှ ဒလမြို့သို့ ကူးစက်လာခြင်းဖြစ်သည်။
တွံတေးဒေသခံများ၏ တိုင်တန်းမှုကြောင့် မခင်ရတနာသက်၏ ဖုန်း၊ Tablet အပါအဝင် ရုံးသုံးပစ္စည်းများကို Easy Microfinance ကုမ္ပဏီတာဝန်ရှိသူများက ပြန်လည်သိမ်းယူလိုက်သလို အဆက်အသွယ်လည်း မရတော့ကြောင်း မကေသီမိုးက ပြောသည်။ သို့သော် ဒလမြို့ဘက်မှ ချေးငွေများအပြင် အဆိုပါချေးငွေများထဲက ၎င်းသုံးထားသည့် ငွေများကို ဇန်နဝါရီလကုန်ပိုင်းအထိ စိုက်သွင်းပေးထားရန် မခင်ရတနာသက်က ဖုန်းနံပါတ်အသစ်ဖြင့် ဆက်သွယ်ခဲ့သည်ဟု မကေသီမိုးက ပြောသည်။
အဆိုပါဖြစ်စဉ်များနှင့်ပတ်သက်၍ လက်မှတ်မိတ္တူ ၁၀၀၀ ကျော်အကူးခံရသည့် အုပ်ချုပ်ရေးမှူးက စုံစမ်းဖော်ထုတ်ကာ အရေးယူမည်ဖြစ်ကြောင်း၊ လက်ရှိတွင် အသေးစားချေးငွေကုမ္ပဏီများကို ၎င်း၏ရပ်ကွက်အတွင်း မလာရန် တားမြစ်ထားကြောင်း ပြောသည်။
“ပြန်လာတာ။ ဒီကိစ္စကို ရှင်းချင်လို့ပြန်လာတာ။ ကျွန်မကို လိုင်းပေါ် အကုန်လုံးပုံပြီးတင်ထားတော့ ကျွန်မ မဟုတ်တဲ့ အကြောင်းကို ရှင်းချင်လို့ ပြန်လာတာပါ” ဟု ကေသီမိုးက ဆိုသည်။
မကေသီမိုးသည် ဗိုလ်ရွဲလမ်းရှိ Easy Microfinance ရုံးသို့ ဖေဖော်ဝါရီ ၁၈ ရက်တွင်၊ ရပ်ကွက်အုပ်ချုပ်ရေးမှူးနှင့်အတူ ဒေါ်ခင်ရတနာသက်၏ လိမ်လည်မှုများကို သွားရောက်ရှင်းလင်းတော့မည် ဟုဆိုသည်။
“ပြည်သူတွေသုံးတဲ့ငွေ၊ သူသုံးတဲ့ငွေနဲ့ သမီးသုံးတဲ့ငွေစာရင်းတွေနဲ့ ကုမ္ပဏီမှာ သွားရှင်းမယ်။ သမီးပြောချင်တာက ကုမ္ပဏီဘက်က သူတို့ဝန်ထမ်းသုံးတာ သူတို့သွင်း။ ပြည်သူလူထုသုံးတာကို ပြည်သူလူထုသွင်းလိမ့်မယ်။ သမီးယူတာကို သမီးသွင်းမယ်။ အဲဒါမှ မရဘူးဆိုရင် ကုမ္ပဏီကို ချိပ်ပိတ်လိုက်။ အဲဒါ အရှင်းဆုံးစကားပဲ”ဟု မကေသီမိုးက ပြောသည်။
လိမ်လည်မှုများ တစုတဝေးတည်းဖြစ်ပွားခဲ့သည့် Easy Microfinance ကုမ္ပဏီ လသာရုံးသို့ Myanmar Now က ဖေဖော်ဝါရီလ ၁၀ ရက်က တွေ့ဆုံမေးမြန်း၍ တစ်ကြိမ်၊ ၁၁ရက်နေ့က အီးမေးလ်ဖြင့်တစ်ကြိမ် မေးမြန်းခဲ့သော်လည်း တုံ့ပြန်ဖြေဆိုခြင်းမရှိသေးပေ။
