ဒလမြို့ခံ အမျိုးသမီးငယ်တစ်ဦးသည် အသေးစားချေးငွေကုမ္ပဏီ ဝန်ထမ်းတစ်ဦးနှင့်ပေါင်းကာ လူ ၁၁၅ ဦးအား အသေးစားချေးငွေ ရရှိအောင် ဆောင်ရွက်ပေးပြီးနောက် နည်းလမ်းအမျိုးမျိုးဖြင့် ကျပ်သိန်း ၅၀၀ မှ ၇၀၀ အကြား လိမ်လည်ထွက်ပြေးသွားခဲ့သည်။
အသေးစားချေးငွေ ကုမ္ပဏီဝန်ထမ်း အမျိုးသမီးတစ်ဦးနှင့် ရပ်ကွက်ပွဲစား အမျိုးသမီးတို့ ပူးပေါင်းပြီး လူ ၁၀၀ ကျော်ကို လိမ်လည်ကာ အသေးစားချေးငွေထုတ်ယူသွားသည့်အမှု တစ်မှု ရန်ကုန်မြို့ တစ်ဖက်ကမ်း ဒလမြို့နယ်၌ ပြီးခဲ့သည့်နှစ်ကုန်ပိုင်းအတွင်း ဖြစ်ပွားခဲ့သည်။
တောင်ဥက္ကလာပ မြို့နယ် ကျော်သူလမ်း၊ အမှတ် ၈၅၃ ဟု ရုံးချုပ်လိပ်စာအဖြစ် တရားဝင် မှတ်ပုံတင်တွင် ဖော်ပြထားသည့် Easy Microfinance company ၏ ဒလမြို့နယ် တာဝန်ခံဟု ဆိုသူ ဒေါ်ခင်ရတနာသက်၏ နာမည်ဖြင့် တပင်ရွှေထီး ၆ ရပ်ကွက် ဦးအောင်ဇေယျလမ်းတွင် နေထိုင်သူ မကေသီမိုးက ဒေသခံ ၁၁၅ ဦးထံမှ ငွေလိမ်လည် ယူသွားခဲ့ခြင်းဖြစ်သည်။
အဆိုပါနစ်နာသူ ၁၁၅ ဦးမှာ ဒလမြို့ မှော်စက်၊ တပင်ရွှေထီး၊ ဆာပါချောင် နှင့် ကမာကဆစ်ရပ်ကွက်တို့မှဖြစ်သည်။ ယင်းတို့အနက်မှ လိမ်လည်ခံရသူ ၁၅ ဦးခန့်နှင့် Myanmar Now က တွေ့ဆုံခဲ့သည်။
နစ်နာသူများ၏ ပြောဆိုချက်များအရ အသက် ၂၃ နှစ်အရွယ် မကေသီမိုးသည် အထက်ပါရပ်ကွက်များမှ ငွေကြေးလိုအပ်ချက်ရှိသူများကို ချေးငွေ မြန်မြန်ဆန်ဆန် ရယူနိုင်ကြောင်းပြောကာ ထိုအတွက် အစအဆုံးကူညီပေးမည်ဟု ၂၀၁၉ အောက်တိုဘာလက ပြောဆိုစည်းရုံခဲ့သည်။
အဆိုပါအမျိုးသမီးနှစ်ဦးသည် Easy Microfinance ကုမ္ပဏီလိမိတက်ထံမှ ဒလမြို့ခံ လူ ၁၁၅ ဦး၏ နာမည်ပေါက်ဖြင့် ချေးယူထားသည့် အနည်းဆုံး ကျပ်သိန်း ၅၀၀ မှ ၇၀၀ အတွင်းနှင့် အိမ်ထောင်စုစာရင်းများအပါအဝင် ချေးငွေစာချုပ်စာတမ်းများကိုပါ သိမ်းယူပြီး ထွက်ပြေးတိမ်းရှောင်သွားကြပြီဖြစ်သည်။
Easy Microfinance ကုမ္ပဏီက နာမည်ပေါက်ချေးယူထားသူများထံ လာရောက်ပြီး ဇန်နဝါရီလကုန်ပိုင်းလောက်တွင် ချေးငွေပြန်ဆပ်ဖို့ လာအကြောင်းကြားတော့မှ ၎င်းတို့သည် ၎င်းတို့အမှန်တကယ် ချေးထားသည့် ပမာဏထက်ပိုပြီး အကြွေးတင်နေခြင်း သို့မဟုတ် ငွေလုံးဝမရထားခြင်းကို သိခဲ့ရသည်။
ငွေကြေးလိမ်လည်ခံရသူများက ရန်ကုန်မြို့ ၄၈ လမ်းရှိ မြန်မာဂျာနယ်လစ်ကွန်ရက် ရုံးခန်း၌ ဖေဖော်ဝါရီလ ၁၅ ရက်တွင် သတင်းစာရှင်းလင်းပွဲပြုလုပ်ရန် စီစဉ်ထားကြသည်။
ကေသီမိုး၏ အဒေါ်ဟုဆိုသူ ဒေါ်နီနီမာကလည်း ၎င်း၏တူမကို နစ်နာအောင်လုပ်ပါက ယခု သတင်းစာရှင်းမည့်သူများကို တရားပြန်စွဲမည်ဟု လိမ်လည်ခံထားရသူတစ်ဦးကို ဖုန်းဆက်ပြောထားသည်။
လိမ်လည်မှု၏အစ
မကေသီမိုးဆိုသူ အမျိုးသမီးငယ်မှာ လိမ်လည်ခံရသူများနှင့်တစ်မြို့နယ်တည်း (တပင်ရွှေထီးရပ်ကွက်တွင်) နေထိုင်သူဖြစ်သည်။ သို့သော် ဒေါ်ခင်ရတနာသက်ဆိုသူ အမျိုးသမီးကိုမူ နစ်နာသူများက မြင်တွေ့ဖူးခြင်းမရှိဘဲ မကေသီမိုး၏ ပြောဆိုချက်များအရ ‘တာဝန်ခံပေးမည့်သူ’ (သို့မဟုတ်) ‘မန်နေဂျာ’ ဟုသာ သိထားကြသည်။
ငွေချေးမည့်သူတစ်ဦးသည် အသေးစားငွေချေးကုမ္ပဏီထံ မိမိ၏ပိုင်ဆိုင်မှုနှင့် စီးပွားရေးလုပ်ငန်းများရှိသည်ကို အထောက်အထားပြရမည့်အပြင် အိမ်ထောင်စုစာရင်းများနှင့် လူကိုယ်တိုင် ထုတ်ချေးရမည်ဖြစ်သည်။ သို့သော် မကေသီမိုး ဆိုသူ အမျိုးသမီးက ငွေချေးလိုသူများကို အဆိုပါ စာရွက်စာတမ်းဆိုင်ရာကိစ္စများကို ကူညီပေးမည်ဟုဆိုကာ လူစုဆောင်းခဲ့သည်ဟု နစ်နာသူများက ဆိုကြသည်။
ထို့နောက် ငွေထုတ်ယူလိုသူများက လသာမြို့နယ် ဗိုလ်ရွဲလမ်း အောက်ဘလောက်ရှိ Easy Microfinance ကုမ္ပဏီရုံးခွဲသို့ ကိုယ်တိုင် သွားထုတ်ယူသည့်အချိန်တွင် မကေသီမိုးက လမ်းတစ်နေရာတွင် ကျန်ရစ်ခဲ့သည်ဟု နစ်နာသူများကဆိုသည်။
ငွေထုတ်ယူရာတွင် ပုံမှန်အားဖြင့် ငွေထုတ်ယူလိုသူ၏ နောက်ခံအချက်အလက်များကို ထောက်ခံပေးသူထံ ငွေထုတ်ချေးပေးမည့်ကုမ္ပဏီက ဖုန်းဖြင့် ဆက်သွယ်၍ မေးမြန်းပြီး စိတ်ချယုံကြည်မှုရှိပါမှ ငွေထုတ်ပေးခြင်းဖြစ်သည်။
သို့သော် ယခုကိစ္စတွင်မူ ငွေထုတ်လိုသူများက ‘ခင်ရတနာသက် က လွှတ်လိုက်တာပါ’ ဟု Easy Microfinance ကုမ္ပဏီရုံးခန်းတွင် ပြောဆိုပါက နောက်ခံအချက်အလက် စစ်ဆေးခြင်းပင် မပြုတော့ဘဲ ချက်ချင်းငွေထုတ်ပေးသည်ဟု သိရသည်။
နစ်နာသူ တစ်ဦးဖြစ်သူ ဒလမြို့ မှော်စက်ရပ်ကွက်မှ ပျံကျဈေးသည် ဒေါ်ခင်မျိုးမျိုးသန်းမှာ ချေးငွေလျှောက်ထားမှုအအစဆုံးကို မြန်မြန်ဆန်ဆန်ပြုလုပ်ပေးပြီး ယင်းအတွက် ပွဲစားခ ကျပ်တစ်သိန်းသာ ပေးရမည်ဟု မကေသီမိုး၏ စည်းရုံးမှုကြောင့် ငွေချေးဖြစ်ခဲ့သူဖြစ်သည်။
အမှန်တကယ်တွင်လည်း ချေးငွေ ကျပ်ငါးသိန်းအတွက် မကေသီမိုးက အစအဆုံးလုပ်ပေးခဲ့သည်ဟု ဒေါ်ခင်မျိုးမျိုးစန်း ပြောသည်။ ထို့အပြင် ဒေါ်ခင်မျိုးမျိုးသန်းအနေဖြင့် သူ၏ ပိုင်ဆိုင်မှုများကို ကုမ္ပဏီထံ မပြသရဘဲ ပုံမှန်အားဖြင့် အနည်းဆုံး တစ်ပတ်ခန့်ကြာမြင့်မည်ဖြစ်သော်လည်း ‘ခင်ရတနာသက်’ နာမည်ကို အသုံးပြုရုံဖြင့် ရက်ပိုင်းအတွင်း ချေးငွေရရှိကြခြင်းဖြစ်သည်။
နစ်နာသူများ၏ပြောဆိုချက်များအရ ဒေါ်ခင်ရတနာသက် ဆိုသူမှာ ‘ဒလမြို့နယ်တာဝန်ခံ’ ဟု သိထားသလို Myanmar Now က တွေ့ဆုံခဲ့သူများက ‘မန်နေဂျာ’ ဟုလည်း ခေါ်ကြသည်။ သို့သော် မည်သည့်အဖွဲ့အစည်း၏ တာဝန်ခံဆိုသည်ကိုလည်း မသိရှိသလို မကေသီမိုး၏ ပြောဆိုချက်များကိုသာ ယုံကြည်ခဲ့ကြသည်ကို တွေ့ရသည်။
“(ကေသီမိုးက) အိမ်လည်း လာကြည့်တာမဟုတ်ဘူး။ ဆိုင်လည်းလာကြည့်တာမဟုတ်ဘူးတဲ့။ ဝန်ထမ်း ပါလို့သာ ရတာတဲ့။ ဝန်ထမ်းနဲ့ သူတို့ တစ်ယောက်တစ်ဝက်မှ ချေးငွေက မြန်မှာလို့ပြောတာ။ အန်တီတို့ကလည်း လက်လုပ်လက်စားသမားတွေဆိုတော့ ပိုက်ဆံက လိုတော့ သူပြောတာလက်ခံလိုက်တယ်။ ကုမ္ပဏီကို သွားထုတ်တဲ့အခါ ၁၀ သိန်းရတော့ ဝမ်းသာသွားတာ”ဟု ဒေါ်ခင်မျိုးမျိုးသန်းက ပြောသည်။
ဒေါ်ခင်မျိုးမျိုးသန်း ချေးယူရန်တင်ပြထားသည်မှာ ကျပ်ငါးသိန်းသာဖြစ်သော်လည်း မကေသီမိုး၏ ကူညီမှုဖြင့် ဒေါ်ခင်ရတနာသက်၏ နာမည်ကို ပြောလိုက်ရုံဖြင့် ကျပ်ဆယ်သိန်း ရရှိခဲ့သည်ဟု ပြောသည်။
ချေးငွေထုတ်ယူပြီးနောက် ဒေါ်ခင်မျိုးမျိုးသန်းသည် မကေသီမိုးအား ပွဲစားခ ကျပ်တစ်သိန်း ပေးရသလို ဝန်ထမ်းခဟုဆိုကာ ကျပ်ငါးသိန်းပေးဆောင်ရခဲ့ရသဖြင့် ထုတ်ယူသည့်ချေးငွေအနက် လေးသိန်းသာ သုံးစွဲရကြောင်း ၎င်းက ပြောသည်။
‘ဝန်ထမ်းခ’ဟုဆိုကာ ကောက်ယူသည့် ကျပ်ငါးသိန်းနှင့်ပတ်သက်၍ မကေသီမိုးက ရှင်းရှင်းလင်းလင်း ပြောဆိုခြင်းမရှိကြောင်း၊ ချေးငွေကို ပြန်လည်ပေးသွင်းရာတွင်လည်း ကုမ္ပဏီသို့ တိုက်ရိုက်ပေးရခြင်းမဟုတ်ဘဲ မကေသီမိုးက နေ့စဉ်လာကောက်ယူသည်ဟု ဒေါ်ခင်မျိုးမျိုးသန်းက ပြောသည်။
ဒေါ်ခင်မျိုးမျိုးသန်းအနေဖြင့် ချေးငွေငါးသိန်းအတွက် တစ်ရက်လျှင် ကျပ် ၂,၃၀၀ ကို မကေသီမိုးထံပေးသွင်းနေခဲ့သော်လည်း ကေသီမိုးက ကုမ္ပဏီထံ ပြန်သွင်း မသွင်းဆိုသည်ကိုမူ ၎င်းတို့ မသိကြပေ။
Easy Microfinance ကုမ္ပဏီဝန်ထမ်းများက ဇန်နဝါရီ လကုန်ပိုင်းက ၎င်းတို့၏ နေအိမ်သို့ လာရောက်ပြီး တစ်ကြိမ်မျှ ချေးငွေပြန်ဆပ်ခြင်း မရှိသေးကြောင်း၊ ဆပ်ရမည့် ပမာဏမှာလည်း ငါးသိန်းမဟုတ်ဘဲ ဆယ်သိန်းကျပ်အတွက် အတိုးပြန်ဆပ်ရမှာဖြစ်ကြောင်း လာရောက်ပြောဆိုတော့မှ မကေသီမိုး၏ လိမ်လည်မှုကို သိကြရသည်ဟု ဒေါ်ခင်မျိုးမျိုးသန်းက ပြောသည်။
“အပြင်မှာ သွားချေးရင် ၂၀ တိုး၊ ၃၀ တိုးပေးရတာထက်စာရင် ကုမ္ပဏီချေးငွေက သက်သာတယ်ဆိုပြီးယူလိုက်တာ။ အခု ကေသီမိုးက မသွင်းလို့ ပြဿနာဖြစ်တော့မှ ၁၀ သိန်းပြန်ဆပ်ရမယ်ဆိုတာ သိရတာ။ … 'ငါတို့ကို ကလိမ်ကကျစ် မကျနဲ့' လို့ ပြောတော့ (ကေသီမိုးက) 'ကုမ္ပဏီက မလိမ်ဘူး။ လိမ်ခြင်းလိမ်ရင် အမကြီးတို့ပဲ လိမ်မှာ' တဲ့။ အခုပြဿနာဖြစ်တော့ (သူက) ပုန်းနေတာ”ဟု သူက ဆိုသည်။
ငွေချေးပြီးတစ်ပြားမှမရလိုက်သူ
ယင်းသို့ပေးဆောင်ရသည့်အထဲတွင် ပါဝင်သည့် မှော်စက်ရပ်ကွက်မှ ဒေါ်ဇာခြည်မိုးသည် ကျပ် ၁၅ သိန်းထုတ်ယူခဲ့သော်လည်း ယင်းငွေကို တစ်ပြားတစ်ကျပ်မျှ ထုတ်ယူသုံးစွဲနိုင်ခြင်းမရှိခဲ့ချေ။
မကေသီမိုး၏ အကူအညီဖြင့်ပင် Easy Microfinance ကုမ္ပဏီမှ ဒေါ်ဇာခြည်မိုးအား ဒီဇင်ဘာအတွင်းက ချေးငွေ ၁၅ သိန်းထုတ်ပေးခဲ့သည်။ သို့သော် ဝန်ထမ်း အသုံးစရိတ်ဟုဆိုကာ မကေသီမိုးကို ကျပ်ငါးသိန်း ပေးခဲ့ရသည်ဟု ဒေါ်ဇာခြည်မိုးက ဆိုသည်။ ‘ဝန်ထမ်းအသုံးစရိတ်’ ဆိုသည်မှာ မည်သည့်အရာမှန်း ဒေါ်ဇာခြည်မိုးလည်း မသိပေ။
ထို့နောက် ကျန်သည့် ငွေ ၁၀ သိန်းမှာလည်း “အဲဒီကောင်မလေး (မကေသီမိုး) က၊ ‘မကြီး နင်ငါ့ကို ပွဲစားခမပေးနဲ့တော့’ တဲ့။ သူ့အဒေါ် ပုဂံဘုရားဖူးသွားရမှာမို့။ နောက်လကျရင် ပြန်ပေးမယ်၊ ပေးသုံးပါဆိုလို့ ပေးသုံးလိုက်တာ၊ သူကရှောင်ပြေးသွားတယ်။ အခုချော်လဲ ရောထိုင်ဖြစ်သွားပြီ။ ထွက်မတွေ့တော့ဘူး”ဟု ဒေါ်ဇာခြည်မိုးက ပြောသည်။
ယခုတော့ ဒေါ်ဇာခြည်မိုးမှာ သူ၏နာမည်ဖြင့် အကြွေး ၁၅ သိန်းတင်သွားပြီဖြစ်သည်။ သို့သော် အဆိုပါငွေထဲမှ တစ်ပြားတစ်ကျပ်ကိုမျှ မသုံးစွဲလိုက်ရပေ။
ချေးငွေ သွားဆပ်ရမည့်အလုပ်ကိုလည်း လုပ်ပေးမည် ဆိုပြီး ငွေချေးစာချုပ်စာတမ်းများကို ကေသီမိုးက သိမ်းထားသည်။ ယင်းအတွက် မကေသီမိုးက ‘အတိုး’ ကို အိမ်တိုင်ရာရောက် နေ့စဉ်လာကောက်သည်ဟု ငွေချေးသူများက ပြောသည်။
ဇန်နဝါရီ လကုန်ပိုင်းက Easy Microfinance ကုမ္ပဏီ၏ လသာရုံးခွဲမှ တာဝန်ရှိသူများက ၎င်းတို့ထံလာရောက်၍ ချေးငွေပြန်ဆပ်ရန် ပြောမှသာ ၎င်းတို့ ချေးငွေယူသူများက လိမ်လည်မှုကို သိကြခြင်းဖြစ်သည်။
ဒေသခံများ၏ ပြောကြားချက်အရ မကေသီမိုးမှာ ငွေတိုးချေးစားနေသူလည်း ဖြစ်သည်။ ယမန်နှစ် ၂၀၁၉ အောက်တိုဘာက အသေးစားချေးငွေထုတ်ယူရာတွင် အာမခံသက်သေလိုက်ပေးပါက ကျပ် ၃၀,၀၀၀ ပေးမည်ဖြစ်ကြောင်း မှော်စက်ဈေးထဲ၌ ငါးရောင်းနေသည့် အသက် ၅၃ နှစ်အရွယ် ဒေါ်ခင်မာဦးကို မကေသီမိုးက လာရောက် စည်းရုံးပြောဆိုခဲ့သောကြောင့် လက်မှတ်လိုက်ထိုးပေးခဲ့ဖူးသည်ဟု ပြောသည်။
သို့သော် ကုမ္ပဏီတွင် ငွေချေးသူ နာမည်ပေါက်သွားသူမှာ ကေသီမိုးမဟုတ်ဘဲ ၎င်းကိုယ်တိုင်ဖြစ်သွားသည်ဟု ဒေါ်ခင်မာဦးက ပြောသည်။
“ကေသီမိုးက အဘွားကို 'သမီးကို အာမခံလိုက်ပေးမလား' ဆိုပြီး လာမေးတယ်။ အာမခံဆိုတာ ဘာတုန်း၊ မသိဘူးလို့ ပြောလိုက်တယ်။ သမီး ပိုက်ဆံ ၁၀ သိန်းထုတ်ချင်လို့ လိုက်ပေးပါတဲ့။ ပိုက်ဆံ ၁၀ သိန်းထုတ်မယ်၊ သူ (ကေသီမိုး) ထုတ်ဖို့ ပြောတာနော်။ အဘွား ထုတ်ဖို့ ပြောတာမဟုတ်ဘူး။ လိုက်ပေးရင် ၃၀,၀၀၀ မုန့်ဖိုးပေးမယ်တဲ့။ ကိုယ်ဈေးရောင်းတော့လည်း ၃၀,၀၀၀ ရဖို့မလွယ်လို့ လိုက်ပေးလိုက်တာ။ အဘွားအမှားတွေ ဖြစ်နေပါတယ်”ဟု ဒေါ်ခင်မာဦးက ပြောသည်။
ဒေါ်ခင်မာဦးကို ရန်ကုန်တိုင်း လသာမြို့နယ် ဗိုလ်ရွဲလမ်းရှိ Easy Microfinance ကုမ္ပဏီရုံးခွဲသို့ မကေသီမိုးက ခေါ်ဆောင်သွားခဲ့သည်။ သို့သော် မကေသီမိုးက ကုမ္ပဏီအထိ မလိုက်ဘဲ လမ်း ၂၀ ထိပ်ရှိ လက်ဖက်ရည်ဆိုင်တစ်ဆိုင်၌ နေရစ်ခဲ့သည်။ သို့သော် ‘တာဝန်ခံနာမည် ခင်ရတနာသက်၊ ထုတ်မည့်ငွေ ကျပ် ၁၀ သိန်း၊ ချေးငွေကာလ ၉ လ’ ဟူသည့် အချက်များကို မကေသီမိုးက ဒေါ်ခင်မာဦးလက်ဖဝါးတွင် ရေးပေးပြီး ကျပ် ၆၅,၀၀၀ ထည့်ပေးလိုက်သည်ဟု ဆိုသည်။
“(ကုမ္ပဏီမှာ) မေးလို့ရှိရင် ပွဲစားမရှိဘူး။ သူရေးပေးလိုက်တဲ့အတိုင်းပဲ ဖြေခိုင်းတယ်။ ပြီးတော့ လက်မှတ်ထိုးခိုင်းတယ်။ ပြီးတော့ ပိုက်ဆံကို ဘယ်လိုဆပ်ရမယ်။ ဘယ်လောက်ကြာအောင်ဆပ်ရမယ်ဆိုတာ တွေပြောတယ်။ ကိုယ်က မသိတော့ ခေါင်းပဲညိတ်လိုက်တယ်လေ။ ကိုယ်ထုတ်တာလည်းမဟုတ်တော့”ဟု ဒေါ်ခင်မာဦးက ပြောသည်။
ဒေါ်ခင်မာဦး လက်မှတ်ထိုးပြီး ထုတ်ယူလာသည့် ငွေ ၁၀ သိန်းနှင့် စာရွက်စာတမ်းများကို မကေသီမိုးအား ပေးခဲ့သည်ဟု ဒေါ်ခင်မာဦးက ပြောသည်။ ကုမ္ပဏီက ရွာကိုလိုက်လာမှ ကေသီမိုးနာမည်ဖြင့် မဟုတ်ဘဲ ဒေါ်ခင်မာဦးနာမည်ဖြင့် ချေးထားပြီးမှန်း ဖြစ်နေကြောင်း သိရသည်ဟု ပြောသည်။
“(အဲဒီတုန်းက) ပေါက်စီလေးစားချင်တယ်ဆိုလို့ တစ်လုံးဝယ်ကျွေးတယ်။ ဒါပဲရလိုက်တယ်။ ကုမ္ပဏီက ပေးလိုက်တဲ့စာရွက်တွေလည်း သူ့ကို ပေးခဲ့တာ။ အဲဒါတွေပြီးတော့ သူသွားစရာ ရှိသေးလို့ဆိုပြီး ထွက်သွားတယ်။ မန်နေဂျာတွေ (ရွာကို) ဆင်းလာတော့မှ ပြဿနာတက်တာ သိတာ”ဟု ၎င်းက ပြောသည်။
အုပ်ချုပ်ရေးမှူး၏ လက်မှတ်အတု
ငွေချေးလိုသူများအနေနှင့် ကုမ္ပဏီထံမှ ငွေချေးလိုကြောင်း လျှောက်လွှာတင်ရာတွင် အိမ်ထောင်စုစာရင်း၊ စီးပွားရေးလုပ်ငန်းနှင့်အတူ လိုအပ်သည့် ရပ်ကွက်ထောက်ခံစာအတွက် ရပ်ကွက် အုပ်ချုပ်ရေးမှူး၏ လက်မှတ်ကိုလည်း မကေသီမိုးက အတုပြုလုပ်အသုံးချခဲ့သည်။
လိမ်လည်မှုအများဆုံးခံရသည့် မှော်စက်ရပ်ကွက်၏ အုပ်ချုပ်ရေးမှူးမှာ ဦးတင်ရှိန်ဖြစ်သည်။ သို့သော် ၎င်း၏ လက်မှတ်ကို အတုလုပ် အသုံးပြုပြီး လိမ်လည်နေသည့်အကြောင်းကို Easy Microfinance ကုမ္ပဏီ၏ လသာရုံးခွဲမှ တာဝန်ရှိသူများ ဇန်နဝါရီ လကုန်ပိုင်းက လာရောက်မှသာ သိရတော့သည်။
“ကျွန်တော့်လက်မှတ်ဆိုပြီး ယူလာတဲ့စာရွက်ထဲမှာ လက်မှတ်တွေက တစ်ထပ်တည်း ကျနေတာ။ ကျွန်တော်ထိုးတာလည်း မဟုတ်ဘူး။ အဲဒီဝန်ထမ်းကို ပြောလိုက်တယ်။ စာရွက်နှစ်ရွက်ပေါ်မှာထိုးပြီး နေရောင်နဲ့ ကြည့်ပြီး တူမတူကြည့်လို့ ပြောလိုက်တယ်။ ကျွန်တော့်ဆီကို တရားဝင် လာယူတာတစ်ယောက်မှ မရှိဘူး”ဟု ဦးတင်ရှိန်က ပြောသည်။
ဦးတင်ရှိန်က ၎င်း၏ရပ်ကွက်နေပြည်သူများ အလိမ်ခံထားရသည့်အပြင် ပြေလည်သူများမဟုတ်တာကြောင့် ထုတ်ယူထားသည့် ချေးငွေကို ချက်ချင်းပြန်မပေးခိုင်းဘဲ တစ်လ ကျပ် ၃၀,၀၀၀ နှုန်းဖြင့် သုံးနှစ် ပြန်ဆပ်ရန် ဇန်နဝါရီလကုန်ပိုင်းက ညှိနှိုင်းပေးခဲ့ရသည်ဟု ပြောသည်။
ကျူးကျော်နေထိုင်သူ ဦးရေ ၁၄၀၀ ရှိပြီး အိမ်ထောင်စု ၁၈၀၀ ကျော်ရှိသည့် မှော်စက်ရပ်ကွက်အပြင် ဆာပါဂျောင်ကျောင်းစုရပ်ကွက်နှင့် တပင်ရွှေထီးရပ်ကွက်၊ ကမာကဆစ်ရပ်ကွက်တို့မှ ချေးငွေလျှောက်ထားသူများကို လိမ်လည်ရာတွင်ပါ ၎င်း၏ လက်မှတ်ကိုအသုံးပြုထားပြီး အုပ်ချုပ်ရေးမှူးရုံး၏ စာအမှတ်၊ အကြောင်းအရာများလည်း မပါဝင်ဟု ဆိုသည်။
“ကုမ္ပဏီဘက်က ယူလာတဲ့ ကျွန်တော့်လက်မှတ်နဲ့ စာရွက်နှစ်ရွက်မှာ ပါတဲ့လူတွေကို သွားရှာတယ်။ ဆာပါချောင်ဘက်က လူတွေ။ အဲဒီလူတွေကို ကျွန်တော်ထောက်ခံစာထုတ်ပေးဖူးလား သွားတွေ့မေးတယ်။ အုပ်ချုပ်ရေးမှူးကို မြင်လည်း မမြင်ဖူးဘူး။ ကျွန်မတို့လည်း လာမတောင်းဖူးဘူးလို့ပြောတယ်။ ကေသီမိုးက အကုန်လုံးလုပ်ထားတာလို့ ငွေချေးသူတွေက ပြောတယ်” ဟု ဦးတင်ရှိန်က ဆိုသည်။
ထို့ကြောင့် ဖြစ်စဉ်ကို စုံစမ်းကြည့်ရာ မကေသီမိုးက ၎င်း၏ လက်မှတ်တစ်ခုကို ယူပြီး ကြည်မြင်တိုင် ကမ်းနားမှ ဆိုင်တစ်ဆိုင်တွင် မိတ္တူဆွဲ၍ အသုံးပြုနေကြောင်း သိရှိရသည်ဟု ဆိုသည်။ အဆိုပါကိစ္စကို အရေးယူရန် လက်မှတ်အတုဖြင့် လူဘယ်နှယောက်ကို ထောက်ခံစာလုပ်ပေးထားကြောင်းကို စုံစမ်းနေဆဲဖြစ်ကြောင်း ဦးတင်ရှိန်က ပြောသည်။
အဆိုပါကိစ္စများနှင့်ပတ်သက်၍ Myanmar Now အနေဖြင့် မကေသီမိုးကို ဆက်သွယ်၍ မရသေးပေ။ မည်သည့်နေရာသို့ ရောက်နေသည်ကိုလည်း နစ်နာသူများက မသိကြပေ။ အချို့ကမူ မကေသီမိုးသည် အိမ်တွင် ပုန်းအောင်းနေသည်ဟု ဆိုကြသည်။
ထို့အပြင် လိမ်လည်မှုများ တစုတဝေးတည်းဖြစ်ပွားခဲ့သည့် Easy Microfinance ကုမ္ပဏီ လသာရုံးသို့ Myanmar Now က ဖေဖော်ဝါရီလ ၁၀ ရက်က သွားရောက်ပြီး ဒေါ်ခင်ရတနာသက်သည် ကုမ္ပဏီဝန်ထမ်းဟုတ်မဟုတ်မေးခွန်းအပါအဝင် အခြေအနေ အရပ်ရပ်ကိုမေးမြန်းရာ “ဖြေဖို့မရှိသေးဘူး” ဟုသာ ရုံး၏ ရန်ကုန်တိုင်းမန်နေဂျာ ဦးသန့်ဇင်ဦးက ပြောသည်။
မြန်မာနိုင်ငံရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန (DICA)၏ အချက်အလက်များအရ MC Easy Microfinance Company Limited သည် ၂၀၁၆ ခုနှစ်တွင် ကုမ္ပဏီကို မှတ်ပုံတင်ခဲ့ပြီး ဒါရိုက်တာငါးယောက်စာရင်း၌ မြန်မာလူမျိုးဟု ယူဆရသည့် Yee Latt Aye (ရီလတ်အေး) ဆိုသူကို တွေ့ရပြီး တခြားအဖွဲ့ဝင်များမှာ အင်္ဂလန်နိုင်ငံသားသုံးဦး၊ နယ်သာလန်နိုင်ငံသားတစ်ဦးတို့ ပါဝင်သည်။
MC Easy Microfinance Company Limited သည် ပြည်နယ် ၇ ခုတွင် ရုံးခွဲပေါင်း ၂၂ ခုဖွင့်လှစ်၍ လူဦးရေ တစ်သိန်းခွဲကျော်ကို ချေးငွေထုတ်ပေးလျက်ရှိသည်ဟု ၎င်းတို့၏ ဝက်ဘ်ဆိုက် (easy.com.mm/) တွင် တွေ့ရသည်။
ကုမ္ပဏီကို Myanmar Now က မေးမြန်းပြီးနောက် တစ်ရက်အကြာတွင် Easy Microfinance ကုမ္ပဏီဝန်ထမ်းခြောက်ယောက်ကျော်က ဒလမြို့ မှော်စက်ရပ်မှ ငွေချေးသူများထံ လာရောက်ပြီး ချေးငွေပြန်ဆပ်ကြရန်နှင့် မဆပ်ပါက တစ်ရက် ကျပ် ၅၀၀ ဒဏ်ရိုက်မည်ဖြစ်ကြောင်း လာရောက်သတိပေးသွားသည်ဟု ဒေါ်ဇာခြည်မိုးက ပြောသည်။
“သူတို့ပိုက်ဆံကို ရအောင်ပြန်လာတောင်းတာပေါ့။ မရှိ ရှိတာပေး။ မပေးရင် အိမ်ပေါ်မှာရှိတဲ့ပစ္စည်းယူမယ်ပေါ့။ မဖြစ်မနေပေးခိုင်းနေတာ။ ကျွန်မတို့လက်မှတ်၊ ကျွန်မတို့လက်ဗွေနဲ့မို့လို့ ကျွန်မတို့က ပေးရမယ်ပေါ့" ဟု ၎င်းက ပြောသည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
