ချင်းပြည်နယ် ပလက်ဝမြို့နယ်အတွင်း နိုဝင်ဘာ ၁၉ ရက်က ဖြစ်ပွားသည့် တိုက်ပွဲတွင် တပ်မတော်သား ၁၃ ဦးနှင့် လက်နက်၊ ခဲယမ်းများ ဖမ်းဆီးရမိကြောင်း ဓာတ်ပုံများနှင့်တကွ ရက္ခိုင့်တပ်တော် AAက ယနေ့ထပ်မံထုတ်ပြန်လိုက်သည်။
နိုဝင်ဘာ ၁၉ ရက်နေ့က ချင်းပြည်နယ်၊ ပလက်ဝမြို့နယ် ပကာဝရွာ၊ အနောက်ဘက်(၃ဒသမ၇)ကီလိုမီတာ ကာမချောင်း (ဒေသအခေါ်-ကာရမချောင်း) အနောက်ဘက်ရှိ တောင်တန်းပေါ်တွင် တပ်မတော်နှင့် AA တို့အကြား တိုက်ပွဲဖြစ်ခဲ့ကြောင်း ယင်းထုတ်ပြန်ချက်က ဆိုသည်။
သို့သော် အနောက်ပိုင်းတိုင်းစစ်ဌာနချုပ် တိုင်းဦးစီး ဗိုလ်မှူးကြီးဝင်းဇော်ဦးက AA ကထုတ်ပြန်သည့် တပ်မတော်သား ၁၃ ဦးနှင့် ပတ်သက်၍ အတည်ပြု၍ မရသေးကြောင်း အသေးစိတ်အချက်အလက်များကို စိစစ်ဆဲဖြစ်ကြောင်း ဆိုသည်။
“ ထုတ်ပြန်ချက်ကို တွေ့ပါတယ်။ ဒါပေမဲ့ သူတို့ပြောတဲ့နေ့က တိုက်ပွဲဖြစ်တာ မရှိတော့ ဘယ်လိုဖြစ်လဲဆိုတာကို ထပ်ပြီးစစ်ဆေးနေတယ် ” ဟု ဗိုလ်မှူးကြီးဝင်းဇော်ဦးက Myanmar Now ကို ယနေ့ ပြောဆိုသည်။
သုံ့ပန်း ၁၃ ဦး ရရှိကြောင်းကို တိုက်ပွဲဖြစ်ပွားသည့် နိုဝင်ဘာ ၁၉ ရက်က ပထမအကြိမ်အဖြစ် ထုတ်ပြန်ခဲ့ပြီး AA၏ အဆိုအရ ၎င်းတို့နှင့် တိုက်ခိုက်ခဲ့သူများမှာ မြန်မာ့တပ်မတော် တပ်မ ၇၇ လက်အောက်ခံ၊ မှော်ဘီအခြေစိုက်၊ ခမရ-၃၁၃ တပ်ရင်းမှ ဖြစ်သည်ဟု ဆိုသည်။
နာရီဝက်ခန့် ကြာမြင့်ခဲ့သည့် အဆိုပါတိုက်ပွဲတွင် တပ်မတော်ဘက်က ကိုးဦးကျဆုံးခဲ့ပြီး လက်နက်ချ အညံ့ခံသော ဗိုလ်နှင့် အရာခံဗိုလ်အပါအဝင် သုံ့ပန်းစုစုပေါင်း ၁၃ ဦးကိုလည်း လက်ရဖမ်းဆီးရမိခဲ့သည်ဟု AA ၏ အဆိုပါထုတ်ပြန်ချက်တွင် ဖော်ပြထားသည်။
AA ၏ပထမအကြိမ်ထုတ်ပြန်ချက် ထွက်ပေါ်စဉ်ကပင် ယင်းသတင်းအပေါ် တပ်က ငြင်းဆိုထားပြီး အဆိုပါနေရာတွင် တိုက်ပွဲဖြစ်ပွားခြင်း မရှိသလို သုံ့ပန်း ၁၃ ယောက် ဖမ်းဆီးခံရသည့် သတင်းမှာလည်း လုပ်ကြံဖန်တီးမှုသာဖြစ်ကြောင်း ဗိုလ်မှူးကြီးဝင်းဇော်ဦးက ပြောကြားထားသည်။
