မန္တလေးမြို့နှင့်အနီးတစ်ဝိုက်တွင် အကောင်အထည်ဖော်နေသည့် အကြီးစားစီမံကိန်းများနှင့် ဒေသခံတို့အကြား ဖြစ်နေသည့်ပြဿနာရပ်များကိုကူညီဖြေရှင်းပေးရန် မန္တလေးရှိ အဖွဲ့အစည်း အသီးသီးနှင့် နိုင်ငံရေးတက်ကြွလှုပ်ရှားသူများက ယနေ့ ဇွန်လ ၁၆ ရက်နေ့တွင် ကော်မတီတစ်ရပ် ဖွဲ့စည်းလိုက်သည်။
“တရားမျှတမှုနှင့် အမှန်တရား ဖော်ထုတ်ရေးကော်မတီ”သည် အယ်လ်ဖာဘိလပ်မြေ စက်ရုံစီမံကိန်းနှင့် ပတ်သက်ပြီး နစ်နာမှုများ ရင်ဆိုင်နေရသော ပုသိမ်ကြီးမြို့နယ် အောင်သပြေ ကျေးရွာ ဒေသခံ ပြည်သူတို့၏ အခက်အခဲများ အပါအဝင်အခြားသော ပြည်သူ့နစ်နာမှုများကို ကူညီဖြေရှင်းပေးမည်ဖြစ်သည်။
“မန္တလေးနဲ့ အနီးတစ်ဝိုက် စီမံကိန်းတွေအများစုမှာ အချို့စီမံကိန်းတွေဟာ ဒေသခံတွေနဲ့ ပဋိပက္ခ ပြဿနာတွေ ရှိနေတာတွေ့ရတယ်၊ အဲဒီပြဿနာတွေကို လေ့လာလိုက်တဲ့အခါ ဒေသခံတွေဟာ နစ်နာမှုတွေ ရှိနေတယ်၊ အဲဒီအတွက် မန္တလေးမှာရှိတဲ့ နိုင်ငံရေးအင်အားစုတွေ စုပေါင်းပြီး ကူညီဖို့ ဖွဲ့စည်းလိုက်တာပါ” ဟု တရားမျှတမှုနှင့် အမှန်တရား ဖော်ထုတ်ရေး ကော်မတီ၏ သတင်းပြန်ကြားရေး ယခင်ဗကသကျောင်းသားဟောင်း ဦးရဲရင့်ကျော်က ပြောသည်။
အဆိုပါကော်မတီပေါ်ပေါက်ရန် နိုင်ငံရေးအကျဉ်းသားဟောင်းများ၊ မြေယာအရေး တက်ကြွလှုပ်ရှားသူများ၊ ပြည်သူ့ပါတီ၊ အမျိုးသားညီညွတ်သော ဒီမိုကရက်တစ်ပါတီ၊ နိုင်ငံရေး အကျဉ်းသားများ ကာကွယ်ရေးကွန်ရက်၊ တရားလွှတ်တော် ရှေ့နေများ၊ နိုင်ငံရေး တက်ကြွလှုပ်ရှားသူများက တက်ရောက်ဆွေးနွေးခဲ့ကြသည်။
“ဖိအားပေးဖို့မဟုတ်ဘူး၊ အကျပ်ကိုင်ဖို့မဟုတ်ဘူး၊ အစိုးရကို ကူညီရာလည်းရောက်ပါတယ်၊ ဒေသခံတွေကို ကူညီရာလည်းရောက်ပါတယ်၊ ငြိမ်းငြိမ်းချမ်းချမ်းနဲ့ တရားမျှတဖို့ ကူညီသွားမှာပါ” ဟု ၎င်းက ဆက်ပြောသည်။
အဆိုပါကော်မတီကို မည်သည့်နိုင်ငံရေးအဖွဲ့အစည်းကမှ ကိုယ်စားပြုဦးဆောင်ခြင်းမဟုတ်ဘဲ မတရားမှုများဖော်ထုတ်ရန် ပုဂ္ဂိုလ်ရေးအရ ဖွဲ့စည်းထားခြင်းဖြစ်ပြီး အဖွဲ့ဝင် ၅ဝ ဖြင့် ဦးဆောင်ဖွဲ့စည်းသည်ဟု ဆိုသည်။
လတ်တလောဖြစ်ပွားနေသည့် မန္တလေးတိုင်းပုသိမ်ကြီးမြို့နယ်ရှိ ကျောက်မီးသွေး စွမ်းအင်သုံး အယ်လ်ဖာ ဘိလပ်မြေစက်ရုံစီမံကိန်းကိုကန့်ကွက်သူရွာသားများနှင့် ကုမ္ပဏီအကြား ပဋိပက္ခတွင် အဖမ်းခံရပြီး ထောင်ထဲမှာ အငြင်းပွားဖွယ်သေဆုံးသွားခဲ့သော ကိုထွန်းမြင့်ဝင်း၏ အမှုမှန် ပေါ်ပေါက်ရေး ကိစ္စရပ်များကို ယနေ့ ဆွေးနွေးခဲ့ကြသည်။
