“(Facebook ရုပ်သံတိုက်ရိုက် လွှင့်တဲ့ဖုန်းကို) ထောင်ဝန်ထမ်းက နားလည်မှုနဲ့ ရောင်းလိုက်တာ”

အကျဉ်းသား ၄ ဦး သေဆုံးပြီး ၂ ဦး ဒဏ်ရာရခဲ့သည့် ရွှေဘိုထောင် ၂၄ နာရီကြာ ဆူပူမှုသည် ယမန်နေ့ ညနေပိုင်းတွင် အခြေအနေ ပြန်လည်တည်ငြိမ်သွားပြီ ဖြစ်သည်။
မငြိမ်မသက်ဖြစ်နေစဉ်တုန်းက ရွှေဘိုထောင်တွင်းမှ ထွက်ပေါ်လာသည့် Facebook တိုက်ရိုက်ထုတ်လွှင့်မှုအကြောင်းအပါအဝင် ထောင်၏နောက်ဆုံးအခြေအနေကို ရွှေဘိုထောင်မှူး ဦးဇော်ထွန်းက ယနေ့နံနက်ပိုင်းတွင် သတင်းထောက်များအား တွေ့ဆုံရှင်းပြခဲ့သည်။ အဆိုပါတွေ့ဆုံမေးမြန်းခန်းမှ မေးခွန်းနှင့်အဖြေအချို့ကို ကောက်နုတ်တင်ပြလိုက်ပါသည်။

မေး။        ။ ဆူပူမှုဖြစ်စဉ်မှာ ဦးဆောင်တဲ့သူတွေကို ထောင်တွင်းစည်းကမ်းအရ အရေးယူဖို့ရှိသလား။
ဖြေ။        ။ ကျွန်တော်တို့ ဥပဒေအတိုင်း ဆောင်ရွက်မှာပါ။

မေး။        ။ ဘယ်နှဦးလောက် အရေးယူဖို့လုပ်ထားလဲ။
ဖြေ။        ။ လေးဦး ငါးဦးပါ။

မေး။    ။ Liveလွှင့်တဲ့ဖုန်းက အကျဉ်းထောင်ဝန်ထမ်းတစ်ဦးစီက ရောက်သွားတယ်လို့ သိရတယ်။ ဘယ်လိုရောက်သွားတာလဲ။
ဖြေ။    ။ ထောင်ဝန်ထမ်းက နားလည်မှုနဲ့ ရောင်းလိုက်တာ။

မေး။        ။ အဲဒီဝန်ထမ်းကို သိရှိပြီးပြီလား။
ဖြေ။        ။ သိပြီးပါပြီ၊ ဖုန်းကိုလည်း သိမ်းဆည်းပြီးပါပြီ။

မေး။        ။ အဲဒီဝန်ထမ်းကိုရော ဘယ်လိုအရေးယူမှုတွေ လုပ်သွားမလဲ။
ဖြေ။        ။ ဝန်ထမ်းစည်းမျဉ်းစည်းကမ်းနဲ့ အရေးယူသွားမှာပါ။

မေး။        ။ ဒဏ်ရာရတဲ့နှစ်ဦးက တစ်ဦး ပြင်းထန်တယ်လို့ သိရတယ်၊ ဘယ်လိုဒဏ်ရာတွေလဲ။
ဖြေ။        ။ အဲဒီလောက်ကြီးမဟုတ်ပါဘူး၊ မပြင်းထန်ပါဘူး။

မေး။        ။ ဆူပူမှုကို ငြိမ်သက်သွားအောင် ဘယ်လိုနည်းနဲ့ ထိန်းသိမ်းခဲ့တာလဲ။
ဖြေ။        ။ အစက အေးအေးဆေးဆေးနေကြဖို့ ပြောတာပေါ့၊ မရတော့ ကျွန်တော်တို့ဆီက ဝန်ထမ်းတွေနဲ့ မြန်မာနိုင်ငံရဲတပ်ဖွဲ့ နဲ့ပေါင်းပြီး ခြောက်လှန့်ပြီး ထိန်းသိမ်းခဲ့တာပါ။

မေး။       ။ နောက်ထပ်ဆက်မဖြစ်ဖို့ ဘယ်လိုဆောင်ရွက်ထားလဲ။
ဖြေ။        ။ ဒါကတော့ ပုံမှန်အတိုင်းပဲ ဆောင်ရွက်သွားမှာပါ။ ခေါင်းဆောင်ပိုင်းတွေ ရွေးထုတ်ပြီး  အရေးယူလိုက်ရင် တည်ငြိမ်သွားမှာပါ။

မေး။     ။ ဦးဆောင်သူတွေက ဘယ်သူတွေလဲ။
ဖြေ။    ။ ကျွန်တော်တို့ စုံစမ်းစစ်ဆေးနေဆဲပါ။