ယနေ့ (ဖေဖော်ဝါရီ ၂၀) နံနက်တွင် စစ်ကောင်စီလေတပ်က ကရင်အမျိုးသားအစည်းအရုံး (KNU) တပ်မဟာ ၆ နယ်မြေဖြစ်သော ကရင်ပြည်နယ်၊ ကော့ကရိတ်မြို့နယ်တောင်ပိုင်းကို ၅ ကြိမ် ဗုံးကြဲ တိုက်ခိုက်ခဲ့သည်။
ကော့ကရိတ်မြို့ တောင်ဘက် ၈ မိုင်ခန့်အကွာတွင် ရှိသည့် ဒေါက်ပလန်ကျေးရွာနှင့် ဘော့ဒိုင်းကျေးရွာအကြား ဗုံးကြဲခဲ့ခြင်းဖြစ်ပြီး အရပ်သားထိခိုက်သေဆုံးမှုအခြေအနေကို စိစစ်နေဆဲဖြစ်ကြောင်း KNU ဒူးပလာယာခရိုင် အတွင်းရေးမှူး ပဒိုစောလစ္စတန်က ပြောသည်။
“ခုကြဲတာက တောထဲတောင်ထဲဆိုတော့ ကျွန်တော်တို့ ခိုအောင်းမယ်လို့ ယူဆပြီး ပစ်ခတ်တာ ဖြစ်နိုင်သလို လူထုရှိနေတဲ့ နေရာမှာ ခိုလှုံတာမျိုး၊ လူထုက လက်မခံရဲအောင် ခြိမ်းခြောက်တာမျိုး ဖြစ်နိုင်ပါတယ်” ဟု ၎င်းက ဆိုသည်။
“လူထုကတော့ သူတို့ (စစ်ကောင်စီ) ကို အတော်ထိတ်လန့်မုန်းတီးမှုတွေ ဖြစ်နေတယ်”
စစ်ကောင်စီလေတပ်က ယနေ့ နံနက် ၉ နာရီခွဲတွင် တစ်ကြိမ်၊ ၉ နာရီ ၄၅ မိနစ်တွင် တစ်ကြိမ် ၊ ၉ နာရီ ၄၉ မိနစ်တွင် နှစ်ကြိမ်နှင့် ၁၁ နာရီ ၁၅ မိနစ်တွင် တစ်ကြိမ် ဆက်တိုက် ဗုံးကြဲတိုက်ခိုက်ခဲ့ခြင်း ဖြစ်သည်ဟု သိရသည်။
အလားတူ ယမန်နေ့ (ဖေဖော်ဝါရီ ၁၉) ကလည်း ကော့ကရိတ်တောင်ဘက် ချောင်းဖျားရှိ စစ်ဘေးရှောင်များ ခိုလှုံနေသည့်နေရာအနီး ထိုသို့ ဗုံးကြဲစဉ် ကလေးတစ်ဦးအပါအဝင် အရပ်သား သုံးဦး ထိခိုက် ဒဏ်ရာရရှိသည်။
အသက် ၁၃ နှစ်အရွယ် နော်နန္ဒာဝင်း မျက်နှာတွင် ဒဏ်ရာရရှိခဲ့သလို အသက် ၄၄ နှစ်အရွယ် စောဖားထုဒေါ ဆိုသူမှာ ဦးခေါင်းတွင် ဒဏ်ရာရခဲ့ကာ အသက် ၃၃ နှစ်အရွယ် နော်နော်လှထွေးက ခြေထောက်ထိမှန်ဒဏ်ရာများ ရရှိခဲ့သည်။
ဗုံးကြဲတိုက်ခိုက်ခံရသည့် ကော့ကရိတ်မြို့နယ်တွင် စစ်ကောင်စီဘက်က မြို့ပေါ်အခြေစိုက် ဌာနချုပ်တပ်ရင်းများအထိ KNU ပူးပေါင်းတပ်များ၏ တိုက်ခိုက်မှုကို ခံနေရပြီး စစ်အုပ်ချုပ်ရေးကြေညာထားသည့် မြို့နယ်လည်း ဖြစ်သည်။
လေတပ်က KNU တပ်မဟာ ၅ ဖာပွန်ခရိုင်နှင့် တပ်မဟာ ၆ ဒူးပလာယာခရိုင်အတွင်း ပြီးခဲ့သည့် ဇန်နဝါရီတစ်လအတွင်း လေကြောင်းတိုက်ခိုက်မှု ၅၇ ကြိမ်ပြုလုပ်ခဲ့ကြောင်း KNU ထုတ်ပြန်ထားသည့် အချက်အလက်များအရ သိရသည်။
အထက်ပါ တစ်လတာလေကြောင်းတိုက်ခိုက်မှုအတွင်း အရပ်သား ၁၃ ဦးခန့် သေဆုံးရာ နှစ်ခြင်းခရစ်ယာန် သင်းအုပ်ဆရာ ၁ ဦး၊ ကက်သလစ်ခရစ်ယာန်ဓမ္မဆရာ ၁ ဦး၊ အသက် ၂ နှစ်အရွယ် ကလေးတစ်ဦးတို့ ပါဝင်သည်၊ ၄ နှစ်အရွယ် ကလေး တစ်ဦးအပါအဝင် ၉ ဦး ဒဏ်ရာရသည်။
တပ်မဟာ ၅ ဖာပွန်ခရိုင်အတွင်း ဖေဖော်ဝါရီ ၁၄ နှင့် ၁၅ ရက် ညအချိန်များတွင် စစ်လေယာဉ် ၃ စီးက နှစ်ရက်ဆက် ဗုံးကြဲခဲ့ရာ စာသင်ကျောင်း ၁ ကျောင်း၊ နေအိမ် ၁၂ လုံး၊ ဈေးဆိုင် ၃ ဆိုင်နှင့် စပါးကျီ ၂ လုံး အပါအဝင် ပစ္စည်းတချို့ ဆုံးရှုံးခဲ့သည်။ အလားတူ ဖေဖော်ဝါရီ ၁၅ ညနေကလည်း စစ်လေယာဉ် နှစ်စီးက တပ်မဟာ ၃ ညောင်လေးပင်ခရိုင်အတွင်း ဗုံးကြဲခဲ့သေးသည်။
အဆိုပါလေကြောင်းမှ ဗုံးကြဲတိုက်ခိုက်မှုများနှင့် ပတ်သက်ပြီး စစ်ကောင်စီဘက်က တစ်စုံတစ်ရာ သတင်းထုတ်ပြန်ခြင်း မရှိပေ။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
