(ရန်ကုန်) — ရန်ကုန်တိုင်းဒေသကြီးတွင် ၂ဝ၁၆ ခုနှစ် ဧပြီလမှ ၂ဝ၁၇ ခုနှစ် ဒီဇင်ဘာလအထိ ကာလအတွင်း ရာဇဝတ်မှုကြီးပေါင်း ၈၅၆ မှု ဖြစ်ပွားခဲ့ပြီး မုဒိမ်းမှုသည် အမှုပေါင်း ၄၆ဝ ဖြင့် အများဆုံးဖြစ်ကြောင်း ရန်ကုန်တိုင်းဒေသကြီးအစိုးရ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး အောင်စိုးမိုးက ပြောသည်။
“မုဒိမ်းမှုအနေနဲ့ အမှုပေါင်း ၄၆ဝ ဖြစ်ပွားခဲ့ပြီးတော့ တရားစွဲတင်တာ ၄၅၆ မှု၊ ပိတ်သိမ်း နှစ်မှုနဲ့ လက်ကျန် နှစ်မှု ဖြစ်ပါတယ်။ ကျွန်တော်တို့ (ဖော်ထုတ်ဖမ်းဆီးနိုင်တာ) ၉၉ ရာခိုင်နှုန်း ရှိပါတယ်”ဟု ၎င်းက ဆိုသည်။
မေ ၂၂ ရက်က ကျင်းပသည့် ရန်ကုန်တိုင်းဒေသကြီးလွှတ်တော် အစည်းအဝေးတွင် လသာမြို့နယ် မဲဆန္ဒနယ် အမှတ် (၁) မှ လွှတ်တော်ကိုယ်စားလှယ် ဦးဇော်ဝင်းနိုင်၏မေးခွန်းကို ဖြေကြားခဲ့ခြင်းဖြစ်သည်။
အဆိုပါအမှုကြီး ၈၅၆မှုတွင် မုဒိမ်းမှု ၄၆ဝ၊ လူသတ်မှု ၃ဝဝ၊ ဓားပြမှုတစ်မှု၊ လုယက်မှု ၈၄ မှု၊ ဖောက်ထွင်းမှု သုံးမှု၊ ပြန်ပေးတစ်မှု၊ တိရစ္ဆာန်ခိုးမှုငါးမှု၊ မတရားအသင်း ဖြစ်ပွားတိုင်တန်းမှု နှစ်မှု ဖြစ်ပွားခဲ့ကြောင်း၊ သို့သော် ရာဇဝတ်မှုကြီး ၁ဝ မျိုးတွင် အပါအဝင်ဖြစ်သော နိုင်ငံတော်သစ္စာဖောက်ဖျက်မှုနှင့် လက်နက်မှုတို့ ဖြစ်ပွားခဲ့ခြင်းမရှိကြောင်း ဖြေကြားခဲ့သည်။
“ဖော်ထုတ်ဖို့ကျန်ရှိတဲ့အမှုတွေနဲ့ ပတ်သက်လို့ ဖော်ထုတ် ဖမ်းဆီးရနိုင်ရေးကို အပတ်စဉ် လစဉ် သုံးသပ်အစည်းအဝေးတွေ ပြုလုပ်ပြီးတော့ အရေးတယူဆောင်ရွက်လျက်ရှိပါတယ်” ဟု နယ်/လုံ ဝန်ကြီးက ဆိုသည်။
ထို့အပြင် ယင်းကာလအတွင်း ရာဇဝတ်မှု ၈၅,၆၈၅ မှုကို မဖြစ်ပွားမီ ကြိုတင်ကာကွယ် စစ်ဆေးဆောင်ရွက်နိုင်ခဲ့သည်ဟု ၎င်းက ပြောသည်။
၂ဝ၁၆ ခုနှစ် ဇွန်လ ၁၄ ရက်မှစ၍ ရပ်ရွာအခြေပြုရဲလုပ်ငန်းစနစ်ကို ရဲတပ်ဖွဲ့နှင့်အတူ အုပ်ချုပ်ရေးအဖွဲ့များ၊ ရပ်ရွာနေပြည်သူများ ပူးပေါင်းဆောင်ရွက်လျက်ရှိပြီး ဖြစ်ပွားသော အမှုများနှင့် ပတ်သက်ဆက်နွှယ်သည့် သတင်းများရရှိရန် ထောက်လှမ်းခြင်း၊ ပြစ်မှုကျူးလွန်သူများ ဖော်ထုတ်နိုင်ရေးအတွက် ပြစ်ချက်ဟောင်းရှိ တရားခံများအား ဥပဒေနှင့်အညီ စစ်ဆေးခြင်းများ ပြုလုပ်လျက်ရှိသည်ဟု ဝန်ကြီးက ဖြေကြားသည်။
