ရှမ်းပြည်နယ်တောင်ပိုင်း နမ့်စန်မြို့တွင် လေတပ် ဒုတပ်ကြပ်တစ်ဦး ယမန်နေ့ (ဩဂုတ် ၃၁) က ကိုယ့်ကိုယ်ကိုယ်သတ်သေသွားကြောင်း မြို့ခံတစ်ဦးထံမှ သိရသည်။
၃၂ နှစ်အရွယ် ဒုတပ်ကြပ်ငြိမ်းချမ်းသည် နမ့်စန်လေတပ်စခန်းမှ ဖြစ်ပြီး ညနေ ၄ နာရီခန့်က နေအိမ်တွင် စိုက်ပျိုးရေးသုံး ပိုးသတ်ဆေးသောက်ကာ အဆုံးစီရင်သွားခြင်း ဖြစ်သည်ဟု လုံခြုံရေးအရ အမည်မဖော်လိုသည့် အထက်ပါ မြို့ခံအမျိုးသားက ပြောသည်။
“ဘယ်သူမှ မတွေ့အောင် သောက်လိုက်တာပါ။ သောက်ပြီးတော့ မခံစားနိုင်တော့တဲ့ အချိန်ကျမှ သူ့ယောက္ခမကို အောက်ဆင်းလာပြီး အသိပေးတာ။ အိမ်ပေါ်မှာ အရည်စိမ်းစိမ်းတွေ အန်ချထားတာ” ဟု သူက ဆိုသည်။
“(သူက) တပ်ထဲမနေဘူး။ ကျန်းမာရေးလည်းကောင်းတယ်။ မိသားစုမှာ ငွေရေးကြေးရေးပြဿနာလည်း မရှိဘူး”
နမ့်စန်မြို့ အမှတ် (၁) ရပ်ကွက်တွင် မိသားစုနှင့်အတူ နေထိုင်သည့် ဒုတပ်ကြပ်ငြိမ်းချမ်းကို အောင်ပန်းမြို့ရှိ ကုတင် ၇၀၀ ဆံ့ စစ်ဆေးရုံသို့ ပို့ဆောင်ခဲ့ပြီး ညသန်းခေါင်အချိန် ဆေးရုံ၌ သေဆုံးသွားကြောင်း တစ်ရပ်ကွက်တည်းနေသည့် အထက်ပါမြို့ခံက ပြောသည်။
သတင်းရရချင်း စစ်သားများ နေအိမ်သို့ ရောက်ရှိလာပြီး ဓာတ်ပုံများ ရိုက်ယူသွားကြောင်း၊ မိသားစုဝင်များကိုလည်း သတင်းဖုံးဖိခိုင်းသည်ဟု သိရကြောင်း ၎င်းက ဆက်ပြောသည်။
တပ်တွင်းစိုက်ပျိုးစရိတ် အလွဲသုံးစားလုပ်မှု၊ အထက်အရာရှိနှင့် ပြဿနာဖြစ်မှုတို့မှာ သတ်သေရသည့် အကြောင်းရင်းများ ဖြစ်သည်ဟု သိရကြောင်း အထက်ပါမြို့ခံက ပြောသည်။
အဆုံးစီရင်ရသည့် အကြောင်းရင်းနှင့် ပတ်သက်၍ Myanmar Now က သီးခြား အတည်ပြုနိုင်ခြင်းမရှိသေးပါ။
ဒုတပ်ကြပ်၏ ရုပ်အလောင်းကို မနက်ဖြန် (စက်တင်ဘာ ၂) တွင် အောင်ပန်းမြို့၌ သင်္ဂြိုဟ်မည်ဟု ဆိုသည်။
အသက် ၃၀ အရွယ် ဇနီး ဒေါ်သန္တာခိုင်နှင့် အသက် ၉ လအရွယ် သမီးတစ်ဦး ကျန်ရစ်သည်ဟု သိရသည်။
ရှမ်းပြည်နယ်တောင်ပိုင်းတွင် ယခုနှစ် ဧပြီအတွင်းမှစ၍ လက်နက်ကိုင်ပြောက်ကျားတော်လှန်မှုများ အားကောင်းလာရာ စစ်ကောင်စီတပ်က အပြင်းအထန် နှိပ်ကွပ်မှုများ လုပ်နေပြီး မကြာသေးမီကာက ညောင်ရွှေမြို့နယ်တွင် ဒေသခံကာကွယ်ရေးအဖွဲ့ဝင် ၂ ဦး အဖမ်းခံထားရသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်။)
