တရားလွှတ်တော်ချုပ် အရာရှိကြီးထံမှ ကျပ်သိန်း ၂၀,၀၀၀ ရလိုမှုဖြင့် တရားစွဲသည်ကို တိုင်းတရားလွှတ်တော် လက်မခံ

ရန်ကုန်-  ပြည်ထောင်စုတရားလွှတ်တော်ချုပ်ရုံး၏ အမြဲတမ်းအတွင်းဝန်လည်းဖြစ်၊ ညွှန်ကြားရေးမှူးချုပ်လည်း ဖြစ်သူ ဦးကိုကိုနိုင်ထံမှ ၎င်းဌာနမှပင် အငြိမ်းစားယူသွားသည့် အရာရှိဟောင်းကြီးတစ်ဦးက အထွေအထွေ လျော်ကြေး နစ်နာကြေး ကျပ်သိန်း ၂ဝ,ဝဝဝ ရလိုမှုဖြင့် မန္တလေးတိုင်းဒေသကြီး တရားလွှတ်တော်တွင် စွဲဆိုသည့်အမှုကို တိုင်းတရားလွှတ်တော်က လက်မခံဘဲ ယနေ့ ဩဂုတ် ၃၁ ရက်တွင် ပယ်ချခဲ့သည်။

တရားလိုဖြစ်သူ ပြည်ထောင်စုတရားလွှတ်တော်ချုပ်ရုံး အငြိမ်းစား ညွှန်ကြားရေးမှူး ဦးမြင့်ဌေးက ဦးကိုကိုနိုင် သည် ၎င်းကို ဂုဏ်သိက္ခာညှိုးနွမ်းအောင် ပြောဆိုခဲ့ခြင်းကြောင့်ဟုဆိုကာ ယမန်နေ့ (၃ဝရက်ဩဂုတ်လ) က တရားစွဲဆိုခဲ့ခြင်းဖြစ်သည်။

သက်သေအထောက်အထားများဖြင့် တင်ပြထားသည့် တရားစွဲဆိုမှုအား တိုင်းဒေသကြီးတရားလွှတ်တော် အနေဖြင့် အမှုအား စစ်ဆေးကြားနာမှု မပြုလုပ်ဘဲ ဆိုလွှာအားပြန်ပေးခြင်းသည် တရားစီရင်ရေး၌ ဖိအားများ ရှိနေသည့် ပုံစံဖြစ်နေသည်ဟု တရားလိုရှေ့နေ ဦးနေလက Myanmar Now ကို ပြောသည်။

“ခိုင်ခိုင်မာမာ အထောက်အားတွေနဲ့ တင်ပြတဲ့ကိစ္စမှာ တရားပြိုင်(ဦးကိုကိုနိုင်)ကို ဆင့်ခေါ်ခြင်းမရှိဘဲ အမှုတွဲကို ပယ်ချခြင်းက အရင်ခေတ်တွေ တုန်းကလို ဖိအားနဲ့ တရားစီရင်ရေးပုံစံ ဖြစ်နေတယ်။ ဒီဖိအားတွေက တရားလွှတ်တော် ချုပ်က လာတာဖြစ်နိုင်တယ်။ ဒါ့ပြင် တရားစွဲဆိုခြင်းခံရတဲ့ ဦးကိုကိုနိုင်က ပြည်ထောင်စုတရားလွှတ်တော်ချုပ်ရုံးက အကြီးအကဲဖြစ်နေတော့ တိုင်းတရားလွှတ်တော်က လက်မခံလို့ နောက်ထပ် အဆင့်မြင့် တရားရုံးဖြစ်တဲ့ ပြည်ထောင်စု တရားလွှတ်တော်ချုပ်ရုံးကို တက်ရင်ရော အကျိုးထူးပါ့မလားလို့ စဉ်းစားစရာဖြစ်လာတယ်” ဟု ဦးနေလက ဆိုသည်။