တပ်ဘက်ကတရားစွဲခဲ့သည့် ကချင်တက်ကြွလှုပ်ရှားသူများ ထောင်ဒဏ် ၆ လနှင့် ငွေ ၅သိန်း အပြစ်ပေးခံရ

(ရန်ကုန်) – တိုက်ပွဲများအတွင်း ပိတ်မိနေသူများ လွတ်မြောက်ရေးအတွက် ပြီးခဲ့သည့် မေလအတွင်းက မြစ်ကြီးနားမြို့တွင် ဆန္ဒပြခဲ့ကြသော လူငယ် သုံးဦးကို တပ်မတော်အား အသရေဖျက်မှု ပုဒ်မ ၅၀၀ ဖြင့် မြစ်ကြီးနားမြို့နယ် တရားရုံးက ယနေ့တွင် ထောင်ဒဏ် ၆ လ နှင့် ငွေဒဏ် ၅ သိန်းချမှတ်ခဲ့သည်။

ကိုလွမ်းဇောင်း၊ ကိုဇော်ဂျတ်နှင့် ဒေါ်နန်ပူတို့သည် ကချင်ပြည်နယ်အတွင်းမှ စစ်ပြေးဒုက္ခသည်များအကြောင်း ဟောပြောရာတွင် တပ်မတော်ကို ထိခိုက်နစ်နာစေခဲ့သည်ဟုဆိုကာ မြောက်ပိုင်းတိုင်း စစ်ဌာနချုပ်မှ ဒုတိယဗိုလ်မှူးကြီး မျိုးမင်းဦးက တရားလိုလုပ်ကာ တရားစွဲဆိုခဲ့ခြင်းဖြစ်သည်။

တရားခံများ၏ ရှေ့နေများက တရားရုံး၏ ဆုံးဖြတ်ချက်သည် မမျှတဟု ဝေဖန်ကြသည်။

“အမှုက လွတ်ရမဲ့အမှုပါ။ အပြစ်မရှိဘူးလို့ ခံစားရတဲ့အမှုက ထောင်ကျသွားတော့ ကျွန်မတို့က ဘယ်ကျေနပ်မလဲ ” ဟု ဒေါ်နန်ပူ၏ ရှေ့နေ ဒေါ်ဒွဲဘူက ပြောသည်။

၎င်းတို့ သုံးဦးအား အမိန့်ချပြီးနောက် တရားရုံးဆုံးဖြတ်ချက်ကို မကျေမနပ်ဖြစ်ခဲ့သူများ မြစ်ကြီးနားမြို့နယ်တရားရုံးမှ မနောကွင်းအထိ လမ်းလျှောက် ဆန္ဒဖော်ထုတ်ခဲ့ကြသည်။

အဆိုပါ ဆန္ဒပြပွဲတွင် ပါဝင်သည့် မဆွတ်ဆိုင်းထွယ်က တရားရုံး၏ ဆုံးဖြတ်ချက်သည် ၎င်းတို့၏ တိုက်ပွဲအတွင်း ပိတ်မိသူများကို လူသားချင်းစာနာထောက်ထားမှုအရ အကူအညီပေးရေးလုပ်ငန်းနှင့် မတရားမှုများအတွက် ဝေဖန်မှုများကို ရပ်တန့်နိုင်မည်မဟုတ်ဟု ဆိုသည်။

“စိတ်မပျက်ဘူး ရှေ့ဆက်ပြီး ဝေဖန်သင့်ရင်လည်း ဆက်ဝေဖန်ရမှာပဲ ” ဟု ၎င်းကပြောသည်။