စစ်ကိုင်းတိုင်း၊ တန့်ဆည်မြို့တောင်ဘက် စိမ်းစားရွာတွင် ယနေ့ (မတ် ၁၂) နံနက်ပိုင်းက တိုက်ပွဲဖြစ်ပွားစဉ် သက်ကြီးရွယ်အိုတစ်ဦးအပါအဝင် အမျိုးသမီး ၂ ဦး သေဆုံးရခြင်းမှာ စစ်ကောင်စီတပ်ကြောင့်ဖြစ်သည်ဟု ဒေသခံကာကွယ်ရေးအဖွဲ့များက ပြောသည်။
စစ်ကောင်စီတပ်က ရွာအတွင်း လိုက်လံပစ်ခတ်စဉ် ၁၅ နှစ်အရွယ် မသဲဦးဖြူ၏ ရင်ဘတ်နှင့် ပေါင်တို့တွင် ကျည်ထိမှန်ခဲ့ကြောင်း၊ စစ်တပ်က နေအိမ်အချို့ကို မီးရှို့စဉ် အသက် ၇၀ အရွယ်အမျိုးသမီး နေအိမ်အတွင်း ရှိနေကြောင်း တန့်ဆည်မြို့နယ် ဒေသခံကာကွယ်ရေးအဖွဲ့ဝင်တစ်ဦးက အတည်ပြုသည်။
“(အဘွားအိုက) နေအိမ်မှာ မီးလောင်လို့ သေဆုံးတာ။ သူတို့က လမ်းဘေးက အိမ်တွေကို ရှို့တာ။ ပိတ်မိပြီး မပြေးနိုင်တဲ့အချိန်မှာ ဖြစ်သွားတာ” ဟု အထက်ပါ ကာကွယ်ရေးအဖွဲ့ဝင်က ပြောသည်။
ယနေ့နံနက် ၁၁ နာရီဝန်းကျင်က စိမ်းစားရွာတွင် စစ်တပ်နှင့် ဒေသခံကာကွယ်ရေးအဖွဲ့များ တစ်နာရီနီးပါးကြာ တိုက်ပွဲဖြစ်ပွားပြီး စစ်ကောင်စီတပ်ဖွဲ့ဝင်များဘက်မှ ထိခိုက်သေဆုံးမှုများရှိပြီး သေနတ် ၅ လက်နှင့် ခဲယမ်းတချို့ သိမ်းဆည်းရမိခဲ့ကြောင်း သူက ဆက်ပြောသည်။
တိုက်ပွဲ အပြင်းအထန်ဖြစ်ပွားပြီးနောက် စစ်ကောင်စီတပ်များသည် စိမ်းစားရွာမှ နေအိမ် ၅ လုံး၊ အနီးအနားရှိ ချောင်းရိုးရွာမှ ကြက်ခြံနှင့် နေအိမ်အချို့၊ ဒယ်ရောက်ကျေးရွာမှ နေအိမ်အချို့တို့ကို မီးရှို့ခဲ့ကြောင်း ဒေသခံများထံမှ သိရသည်။
ထိုရွာသုံးရွာတွင် မီးရှို့မှုကြောင့် နေအိမ် ၈ လုံးထက်မနည်း လောင်ကျွမ်းခဲ့သည်ဟု ဆိုသည်။ အသေးစိတ် အခြေအနေကို မသိရသေးသလို ယနေ့ အမျိုးသမီး ၂ ဦး သေဆုံးမှု၊ မီးလောင်မှုများနှင့် ပတ်သက်ပြီး တန့်ဆည်မြို့နယ် မြို့မရဲစခန်းကိုလည်း ဆက်သွယ်မေးမြန်း၍ မရသေးပေ။
အရပ်သားများကို သတ်ဖြတ်ခြင်း၊ တော်လှန်ရေးသမားတို့နှင့် ဆက်စပ်ဖွယ်ရှိသည့် ရပ်ကွက်ကျေးရွာတို့ကို မီးရှို့ခြင်းများနှင့် ပတ်သက်ပြီး စစ်ကောင်စီက ဆက်တိုက် ငြင်းဆိုလေ့ရှိသည်။
တန့်ဆည်မြို့တွင် အာဏာသိမ်းပြီးချိန်မှ တစ်နှစ်တာကာလအတွင်း ရွာပေါင်း ၂၀ ကျော်မှ အိမ်ခြေ ၃၀၀ မီးရှို့ဖျက်ဆီးခံခဲ့ရပြီး အရပ်သားပြည်သူ ၆၀ ကျော် အသတ်ခံခဲ့ရကြောင်း ဒေသခံကာကွယ်ရေးအဖွဲ့များထံမှ သိရသည်။
စစ်ကိုင်းတိုင်းအတွင်းရှိ မြို့နယ်ပေါင်း ၃၀ ကျော်ကို မတ်လ ၃ ရက် ညပိုင်းမှစ၍ အင်တာနက်ဖြတ်တောက်ထားသည့် စစ်တပ်က ကျေးရွာများကို စစ်ကြောင်းထိုး စီးနင်းခြင်း၊ နေအိမ်များကို မီးရှို့ခြင်း၊ စစ်ဘေးရှောင်များ စုဝေးရှောင်ပုန်းသည့်နေရာများကို လက်နက်ကြီးများ ပစ်ခတ်ခြင်းတို့ကို ခပ်စိပ်စိပ်လုပ်ဆောင်လာသည်။
အာဏာသိမ်းပြီးချိန်မှ တစ်နှစ်ကျော်ကာလအတွင်း စစ်တပ်နှင့် လက်အောက်ခံအဖွဲ့အစည်းများ၏ မီးရှို့မှုကြောင့် လူနေအိမ်ခြေ ၆၇၀၀ ကျော် ဖျက်ဆီးခံခဲ့ရပြီး ထက်ဝက်ကျော်မှာ စစ်ကိုင်းတိုင်းမှဖြစ်ကြောင်း အချက်အလက်များကောက်ယူကာ စာရင်းပြုစုနေသည့် အမှီအခိုကင်းသည့် အဖွဲ့တစ်ခုဖြစ်သည့် Data for Myanmar အဖွဲ့က မတ် ၉ ရက်နေ့တွင် ထုတ်ပြန်ထားသည်။
မတ်လအတွင်း မီးရှို့ခံရသည့်အိမ်ခြေ ၅၉၀ ကျော်ရှိကြောင်း အဆိုပါ အဖွဲ့၏ ထုတ်ပြန်ချက်တွင် ဖော်ပြထားသည်။
စစ်ကောင်စီတပ် လက်ချက်ကြောင့် သေဆုံးခဲ့သည့် အရပ်သားအရေအတွက်မှာလည်း ၁၆၅၂ ဦးထက်မနည်းရှိကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က ယမန်နေ့က ထုတ်ပြန်ထားသည်။ စစ်ကောင်စီကမူ ထိုအသင်း၏ ကိန်းဂဏန်း မှန်ကန်မှုမရှိဟု တုံ့ပြန်ထားသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်။)
