ဧရာဝတီတိုင်း၊ လေးမျက်နှာမြို့နယ်မှာ ငဝန်မြစ်ရေကာတာ ကျိုးပေါက်မှုကြောင့် မြို့ပေါ်ရပ်ကွက်တွေနဲ့ ကျေးရွာအများအပြား ရက်သတ္တပတ်နီးပါး ရေနစ်မြုပ်နေပြီး လူသောင်းနဲ့ချီ ရေဘေးသင့်နေပါတယ်။ ဒေသခံတွေကတော့ ဒီရေဘေးဟာ လွန်ခဲ့တဲ့ နှစ်ပေါင်း ၃၀ ကျော် ၁၉၉၁ခုနှစ်က ထိန်ငူတာကျိုးပြီးနောက်ပိုင်း အဆိုးရွားဆုံး ရေကြီးမှုလို့ ပြောဆိုနေကြပါတယ်။
ရေကာတာကျိုးပေါက်ရာကနေ ရေတွေ ဆက်လက်ဝင်ရောက်နေသေးတာကြောင့် ရေလွှမ်းဧရိယာ ပိုမိုကျယ်ပြန့်လာနေပြီး ငါးသိုင်းချောင်းမြို့နဲ့ ကျုံပျော်မြို့နယ်ဘက်က ကျေးရွာတချို့အထိပါ ရေဝင်ရောက်နေပါတယ်။ ဒေသခံအများစုဟာ ဘုန်းကြီးကျောင်းတွေ၊ ကယ်ဆယ်ရေးစခန်းတွေနဲ့ ဆွေမျိုးအိမ်တွေမှာ ယာယီခိုလှုံနေကြရသလို အစားအသောက်၊ ဆက်သွယ်ရေးနဲ့ ကယ်ဆယ်ရေးလုပ်ငန်းတွေမှာလည်း အခက်အခဲတွေ ဆက်လက်ရှိနေပါတယ်။
စစ်အစိုးရရဲ့ ဩဂုတ် ၅ ရက် ထုတ်ပြန်ချက်အရ လေးမျက်နှာမြို့ပေါ် ရပ်ကွက် ၅ ခုနဲ့ ကျေးရွာ ၁၀ ကျော်၊ အိမ်ထောင်စု ၇,၀၀၀ ကျော်၊ လူဦးရေ ၃၂,၀၀၀ ကျော် ရေဘေးသင့်ခဲ့တယ်လို့ သိရပါတယ်။ ကျွမ်းကျင်သူတချို့ကတော့ ရေပြန်ကျဖို့ နှစ်လကနေ သုံးလအထိ ကြာမြင့်နိုင်တယ်လို့ သတိပေးထားပြီး အရပ်ဘက်ကယ်ဆယ်ရေးအဖွဲ့တွေကလည်း ရေအန္တရာယ်ကျရောက်နိုင်တဲ့ ဒေသတွေအနေနဲ့ ကြိုတင်ပြင်ဆင်ထားကြဖို့ တိုက်တွန်းထားပါတယ်။
ကိုလှိုင်း/ Myanmar Now
