ယမန်နေ့ (ဧပြီ ၈) နံနက်ပိုင်းက မန္တလေးတိုင်း ကျောက်ပန်းတောင်းမြို့၌ စစ်ကောင်စီလက်နက်ကိုင်များက လူတစ်ဦးကို ပစ်သတ်သွားကြောင်း သိရသည်။
ယမန်နေ့ နံနက် ၁၁ နာရီခွဲအချိန်ခန့်က ကျောက်ပန်းတောင်းမြို့၊ စံပြရပ်ကွက်အတွင်း ရောက်ရှိလာသော စစ်ကောင်စီတပ်ဖွဲ့ဝင်များ၏ ပစ်ခတ်မှုကြောင့် အသက် ၅၀ ကျော်အရွယ် အမျိုးသားတစ်ဦး ကျဆုံးခဲ့ကြောင်း မျက်မြင်တွေ့ရှိသူများက ပြောသည်။
“ခြေသလုံးကို အရင်ပစ်တာ၊ သူကပြေးတော့ တစ်ဖက်အိမ်ဝိုင်းကို ရောက်တဲ့အချိန်မှာ ထပ်ပစ်တာ နောက်ကျောကို မှန်သွားတယ်” ဟု မျက်မြင်တွေ့ရှိသူတစ်ဦးက Myanmar Now ကို ပြောသည်။
စစ်ကောင်စီတပ်ဖွဲ့ဝင်များ၏ ပစ်ခတ်ခံခဲ့ရသူမှာ ကျောက်ပန်းတောင်းမြို့ခံ ဦးတင်မိုးဆိုသူဖြစ်ပြီး သေနတ်ဒဏ်ရာရရှိပြီးနောက် ၎င်းကို ကားပေါ်တင်ကာ သယ်ယူသွားသည်ဟု မျက်မြင်တွေ့ရှိသူက ဆိုသည်။
မွန်းလွဲပိုင်းတွင် ဦးတင်မိုးကျဆုံးသည့်သတင်းကို ရပ်ကွက်အတွင်းရှိ ၎င်း၏ဆွေမျိုးများမှတစ်ဆင့် ကြားသိရပြီးနောက် ညနေ ၅ နာရီခန့်တွင် မီးသင်္ဂြိုဟ်ခဲ့သည်ဟု ရပ်ကွက်နေပြည်သူများက ပြောသည်။
ကျဆုံးခဲ့သူ ဦးတင်မိုးသည် ပေါက်စီရောင်း အသက်မွေးဝမ်းကျောင်းပြုသူတစ်ဦးဖြစ်ကာ ကျောက်ပန်းတောင်းမြို့တွင် ပြုလုပ်သော စစ်အာဏာရှင်ဆန့်ကျင်ရေး သပိတ်စစ်ကြောင်းများတွင် တက်ကြွစွာ ပါဝင်လေ့ရှိသူဖြစ်ကြောင်း သိရသည်။
၎င်း၏အိမ်ကို စစ်ကောင်စီတပ်များ လာရောက်ရှာဖွေခဲ့သဖြင့် စံပြရပ်ကွက်တွင် ခေတ္တတိမ်းရှောင်နေစဉ် စစ်ကောင်စီလက်နက်ကိုင်များက လာရောက်သတ်ဖြတ်ခဲ့ခြင်းဖြစ်ကြောင်း ရပ်ကွက်နေပြည်သူတစ်ဦးက ဆိုသည်။
တစ်နိုင်ငံလုံးအတိုင်းအတာဖြင့် အရပ်ပြည်သူ ၁၀၀ ကျော် သေဆုံးခဲ့ရသော မတ်လ ၂၇ တွင်လည်း ကျောက်ပန်းတောင်း၌ စစ်ကောင်စီတပ်များ ပစ်ခတ်မှုကြောင့် ဆန္ဒပြသူနှစ်ဦးကျဆုံးခဲ့ပြီး စစ်သားများက အလောင်းကို ကားဖြင့် သယ်ယူသွားကာ ချက်ချင်းမီးသင်္ဂြိုဟ်ခဲ့ကြသည်။
အာဏာသိမ်းစစ်ကောင်စီ၏ အကြမ်းဖက်ပစ်ခတ်မှုများနှင့် ရိုက်နှက်နှိပ်စက်မှုများကြောင့် ဧပြီ ၈ ရက်အထိ အနည်းဆုံး ၆၁၄ ဦး ကျဆုံးခဲ့ကြောင်း နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP) ၏ ထုတ်ပြန်ထားသည်။
