(ရန်ကုန်) – ထင်ရှားသည့် ကက်သလစ် ဘုန်းတော်ကြီး ကာဒီနယ်ချားလ်စ်ဘိုက သူ၏ သက်တော် (၇၀) ပြည့် မွေးနေ့အတွက် ရရှိခဲ့သည့် အလှူငွေများကို မြန်မာပြည်မြောက်ပိုင်းရှိ စစ်ဘေးရှောင်များအတွက် ပြန်လည် လှူဒါန်းသွားမည်ဟု ဒီဇင်ဘာ ၁၇ တွင်ကြေညာခဲ့သည်။
ဆရာတော်ဝါ (၂၈) ၀ါရှိသည့် ဘုန်းတော်ကြီး၏ မွေးနေ့အတွက် မြန်မာငွေ ကျပ် ၄၆၇ သိန်းကျော်၊ ယူရို ၆၇၅ နှင့် စင်ကာပူဒေါ်လာ ၁၀၀ တို့ ရရှိခဲ့သည်ဟု အဆိုပါကြေညာချက်တွင်ဖော်ပြထားသည်။
အဆိုပါ ငွေကြေးများကို မူလရည်ရွယ်ထားသည့်အတိုင်း ဗန်းမော်၊ မြစ်ကြီးနား၊ လားရှိုးမြို့များရှိ ကက်သလစ်ဂိုဏ်းအုပ် သာသနာများအောက်တွင်ရှိနေသော စစ်ဘေးရှောင်များအတွက် လှူဒါန်းမည်ဖြစ်သည်။
ကာဒီနယ်ချားလ်စ်ဘိုအား ၂၀၁၅ နှစ်ဆန်းပိုင်းတွင် ကက်သလစ်ဘာသာ၏ ရုံးစိုက်ရာ ဗာတီကန်က ရဟန်းအမတ်အဖြစ် ခန့်အပ်ခဲ့သည်။ ဆရာတော်သည် မြန်မာနိုင်ငံ၏ ပြုပြင်ပြောင်းလဲရေး လုပ်ငန်းများကို စိတ်ရှည်ရန် နိုင်ငံတကာသို့ မကြာခဏ မေတ္တာရပ်ခံလျက်ရှိပြီး ငြိမ်းချမ်းရေးနှင့် အမုန်းတရားမပြန့်ပွားရေးတို့ကို တက်တက်ကြွကြွလုပ်ဆောင်နေသူ ဖြစ်သည်။
ကာဒီနယ် ချားလ်စ်ဘိုအား ၁၉၄၈ အောက်တိုဘာ ၂၉ တွင် မွေးဖွားသည်။
