ကချင်တက်ကြွလှုပ်ရှားသူများအား လွှတ်ပေးရန် ဆန္ဒပြသဖြင့် တရားစွဲခံရသူများ ရှေ့နေမငှားဘဲ တရားရင်ဆိုင်မည်

(ရန်ကုန်) – တပ်မတော်အား အသရေဖျက်မှုဖြင့် မြစ်ကြီးနား တရားရုံးက ထောင်ချခဲ့သည့် တက်ကြွလှုပ်ရှားသူ သုံးဦးအား ပြန်လွှတ်ပေးရန် ဆန္ဒပြခဲ့သဖြင့် ငြိမ်းစုစီ ပုဒ်မ ၁၉ ဖြင့် တရားစွဲခံထားရသူများသည် ရှေ့နေ မငှားဘဲ တရားရင်ဆိုင်ရန် ယနေ့ဆုံးဖြတ်လိုက်ကြသည်။

ဦးလွမ်းဇောင်း၊ ဦးဇော်ဂျတ်၊ ဒေါ်နန်ပူတို့သည် တိုက်ပွဲများအတွင်း ပိတ်မိနေသည့် အရပ်သားများအား ကယ်ထုတ်ရန် ပြီးခဲ့သည့် မေလအတွင်းက တောင်းဆိုခဲ့သည့် လှုပ်ရှားမှုအတွင်း တပ်မတော်ကို အကြည်ညိုပျက်စေသည့် ဟောပြောချက်များ ထုတ်ဖော်ပြောဆိုသည်ဟုဆိုကာ မြစ်ကြီးနား တရားရုံးက ဒီဇင်ဘာ ၇ တွင် ထောင်ဒဏ် ၆ လ နှင့် ဒဏ်ငွေ ၅သိန်း အပြစ်ပေး ခံခဲ့ရသည်။

ယင်းဆုံးဖြတ်ချက်ကို မကျေနပ်သူ ၄၀ ခန့်က တရားရုံးနှင့် တရားရုံး အနီးတွင် ကန့်ကွက်ကြောင်း ဆန္ဒပြခဲ့ပြီး ၄င်းတို့အနက်မှ မဆွတ်ဆိုင်းထွယ်၊ ရှေ့နေဆိုင်းခွမ်အောင်နှင့် ဓမ္မဆရာ ဦးဘရန်မိုင်တို့ကို ရဲက တရားစွဲထားသည်။

ယင်းပုဒ်မသည် ပြစ်မှုထင်ရှားပါက အမြင့်ဆုံး ထောင်ဒဏ်တစ်နှစ်နှင့် ဒဏ်ငွေ ကျပ်တစ်သိန်း ချမှတ်နိုင်သည်။

ယနေ့ရုံးချိန်းတွင် စွပ်စွဲခံရသူများအနေဖြင့် အပြစ်ရှိကြောင်း ဝန်ခံခဲ့မည်ဆိုလျှင် မြို့နယ်တရားသူကြီးမှ အမိန့်ချမှတ်မည့် အခြေအနေရှိခဲ့သော်လည်း စွပ်စွဲခံရသူများက မိမိတို့ဆန္ဒဖော်ထုတ်မှုသည် တရားမျှတမှုရှိသည့်အတွက် မိမိတို့တွင် အပြစ်မရှိကြောင်း ပြောကြားခဲ့သည့်အတွက် အမှုကိုဆက်လက်ရင်ဆိုင်ကြရမည်ဖြစ်သည်။

“ကျွန်တော်တို့က အပြစ်ရှိလားဆိုတော့ အပြစ်မရှိတဲ့အတွက် ဝန်မခံဘူး။ အဲ့ဒီအတွက် ဒီနေ့ တရားလိုပြ သက်သေ ၄ ဦးကို စစ်ဆေးခဲ့တယ်။ တရားလိုပြသက်သေတွေရဲ့ ထွက်ချက်အရ နှစ်ဦးက အခင်းဖြစ်နေရာမှာ ရှိနေတဲ့သူတွေမဟုတ်ဘူး” ဟု စွပ်စွဲခံထားရသည့် ဓမ္မဆရာ ဦးဘရန်မိုင်က ဆိုသည်။

နောင်တစ်ကြိမ် ရုံးချိန်းကို ဒီဇင်ဘာ ၁၈ တွင် ထပ်မံကြားနာရန် ရုံးတော်က ချိန်းဆိုခဲ့သည်။