သတင်းမှားဖြန့်ဝေသူများသည် သတင်းဌာနများကဲ့သို့ အယောင်ဆောင်ကြသည့်အပြင် လူအများအပြား အားပေးကြသည့် နာမည်ကြီးအနုပညာရှင်များ အယောင်ဆောင်ကာ သတင်းမှားဖြန့်ကြသည်များလည်း ရှိသည်။ လတ်တလောတွင် အနုပညာရှင်များအယောင်ဆောင်ကာ သတင်းမှားဖြန့်ဝေနေသည့် Facebook Page ပေါင်း ၃၀ ကျော်ကို Myanmar Now က တွေ့ရှိထားသည်။
အဆိုပါ Page များတွင် သရုပ်ဆောင်မြင့်မြတ် အယောင်ဆောင်ထားည့် မြင့်မြတ် ဆိုသည့် Page သည် Follower အများဆုံးဖြစ်ပြီး ၈ သိန်းကျော်အထိ ရှိသည်။ အဆိုပါ Page သည် Cele Media ဆိုသည့် ဝက်ဘ်ဆိုက် နှင့်ချိတ်ဆက်ထားသည်။ Myanmar Idol မှ နာမည်ကြီးပြိုင်ပွဲဝင်များ၏ နာမည်များကိုအသုံးပြုပြီး ပြိုင်ပွဲဝင်များကို အားပေးသည့် ပရိသတ်များကို ရန်တိုက်ပေးသည့် သတင်းတုများကိုလည်း ဖြန့်ဝေနေသည်။
ထို့ပြင် Sport News Myanmar, Sport Myanmar News, Iteach Media နှင့် Every Time Story ဝက်ဘ်ဆိုက်များသည်လည်း အနုပညာရှင်များ၏ နာမည်များကို အသုံးပြုထားသည့် Facebook Page များတွင် သတင်းမှားဖြန့်ဝေနေသည်ကိုလည်း တွေ့ရသည်။ အဆိုပါ ဝက်ဘ်ဆိုက် များသည် Facebook ၏ ထုတ်ကုန်တစ်ခုဖြစ်သည့် Instant Articles ချိတ်ဆက်ထားသည့် ဝင်ငွေရရှိသည့် ဝက်ဘ်ဆိုက် များဖြစ်သည်။
Cele Media ဆိုသည့် ဝက်ဘ်ဆိုက် သည် အနုပညာရှင်နာမည်အသုံးပြုထားသည့် Page အတုပေါင်း ၂၀ တွင် သတင်းမှားများဖြန့်ဝေနေသည်ကို တွေ့ရသည်။ အဆိုပါ ဝက်ဘ်ဆိုက်၏ မျှဝေမှုအများဆုံးဖြစ်သည့် “ဝူဟန်ဗိုင်းရပ်စ် နေပြည်တော်အထိ ကူးစက်လာပါပြီ (ရုပ်သံ)” ဆိုသည့် သတင်းမှားသည် Facebook တွင် မျှဝေသူ ၂ သောင်း ၈ ထောင်ကျော်အထိရှိခဲ့သည်။ အဆိုပါသတင်း ကို Aye Mya Phyu , Aye Mya Phyu – Moe Tho, Saw Chris Moolar, Esther Dawt Chin Sung – Sung Sung, Tan Khun Kyaw ဆိုသည့် အယောင်ဆောင် Page အတုများတွင် မျှဝေခဲ့သည်ကို တွေ့ရသည်။
Myanmar Now ၏အချက်အလက်စစ်ဆေးမှုအရ အဆိုပါသတင်းသည် သတင်းမှားတစ်ခုသာဖြစ်သည်။ ကျန်းမာရေးနှင့်အားကစားဝန်ကြီးဌာန၏ သတင်းထုတ်ပြန်မှုများတွင် မြန်မာနိုင်ငံ၌ ကိုရိုနာဗိုင်းရပ်နှင့်ပတ်သက်ပြီး သံသယလူနာများသာရှိပြီး ကူးစက်ခံရသူမရှိသေးပေ။
Iteach Media ဆိုသည့် ဝက်ဘ်ဆိုက်သည် Aye Mya Phyu, Phyo Myat Aung, ဖိုးချစ် ဆိုသည့် အယောင်ဆောင် Page များတွင် ဖြန့်ဝေလေ့ရှိသည်။ အဆိုပါ ဝက်ဘ်ဆိုက်၏ မျှဝေမှုအများဆုံးဖြစ်သည့် ‘ကိုရိုနာဗိုင်းရပ်စ်ပျောက်ဆေးရပြီတဲ့???????? ဝမ်းသာစရာသတင်းလေးမို့ဖြန့်ဝေပေးကြပါအုံးရှင့်…’ ဆိုသည့် သတင်းမှားသည် Facebook တွင် မျှဝေသူ ၁ သောင်း ၇ ထောင်ကျော်အထိ ရှိခဲ့သည်။
Sport News Myanmarဆိုသည့် ဝက်ဘ်ဆိုက်သည် Lulu Aung, May Myint Mo, စံရတီမိုးမြင့် စသည့် အယောင်ဆောင် Page များတွင် ဖြန့်ဝေလေ့ရှိသည်။ Sport Myanmar News ဆိုသည့် ဝက်ဘ်ဆိုက်သည် Cele Media ဆိုသည့် ဝက်ဘ်ဆိုက်က ဖြန့်ဝေလေ့ရှိသည့် Page များတွင် ဖြန့်ဝေလေ့ရှိသည်။ Every Time Story ဝက်ဘ်ဆိုက်အကြောင်း ကိုမူ Myanmar Now အနေဖြင့် ရေးသားထားပြီးဖြစ်သည်။
အဆိုပါ အယောင်ဆောင် Page များတွင် အချို့သည် Fan Page ဟု ဆိုထားသော်လည်း အနုပညာရှင်အကြောင်းထက် ဝက်ဘ်ဆိုက် တစ်ခု၏ သတင်းများကိုသာ စဉ်ဆက်မပျက် မျှဝေနေခြင်းဖြင့် လူအများကို လှည့်ဖြားနေခြင်းဖြစ်သည်။
Myanmar Now က တွေ့ရှိထားသည့် အနုပညာရှင်နာမည်သုံးထားသည့် Page အတုများကို ဖော်ပြပေးလိုက်ပါသည်။
|
(ဤဆောင်းပါးကို Myanmar Now ၏ အချက်အလက်စစ်ဆေးသည့် သတင်းထောက် မျိုးဆက်ပိုင်က ကူညီရေးသားထားသည်။)
