ပြီးခဲ့သည့် ရှစ်နှစ်အတွင်း ရွေးကောက်ပွဲကုန်ကျစရိတ် တင်သွင်းရန် ပျက်ကွက်သည့် အမတ်လောင်း ၂၇၃ ဦးကို အရည်အချင်းပျက်ယွင်းသူများအဖြစ် ပြည်ထောင်စုရွေးကောက်ပွဲ ကော်မရှင်က သတ်မှတ်ထားကြောင်း သိရသည်။
၎င်းတို့သည် သက်ဆိုင်ရာ ရွေးကောက်ပွဲအပြီး ပေါ်ထွက်လာသည့် လွှတ်တော်များ၏ သက်တမ်းအတွင်း ကျင်းပသည့် ရွေးကောက်ပွဲတို့တွင် ဝင်ရောက်ယှဉ်ပြိုင်ခွင့်မရှိဟုလည်း ကော်မရှင်၏ထုတ်ပြန်ချက်က ဆိုသည်။
အဆိုပါ အရေအတွက်ကို ပြည်ထောင်စုရွေးကောက်ပွဲကော်မရှင်မှ ဦးစီးအရာရှိ ဒေါ်မြသန္တာထွန်းက ထုတ်ဖော်ပြောကြားခြင်း ဖြစ်ကြောင်း ယနေ့ထုတ် အစိုးရပိုင်သတင်းစာများတွင် ပါဝင်သည့် “ ရွေးကောက်ပွဲကုန်ကျစရိတ် တင်သွင်းခြင်းနှင့် ဥပဒေစကားဝိုင်း” တွင် ဖော်ပြထားသည်။
၂ဝ၁၅ အထွေထွေရွေးကောက်ပွဲပြီးနောက် ရွေးကောက်ပွဲကုန်ကျစရိတ် မသွင်းသည့် ရွေးကောက်ပွဲဝင်အမတ်လောင်း အများဆုံးဖြစ်ပြီး ၁၅၉ ဦးအထိ ရှိခဲ့ကြောင်းလည်း ကော်မရှင်က ဆိုသည်။
၂ဝ၁ဝ ရွေးကောက်ပွဲဝင်အမတ်လောင်း ၁၁၂ ဦး၊ ယမန်နှစ် ကြားဖြတ်ရွေးကောက်ပွဲဝင် အမတ်လောင်း ၂ ဦးတို့လည်း အရည်အချင်းပျက်ယွင်းသူအဖြစ် စာရင်းသွင်းခံထားရသည်။
ရွေးကောက်ပွဲဥပဒေအရ ကော်မရှင်က အနိုင်ရအမတ်များကို အတည်ပြုပြီး ရက်ပေါင်း (၃ဝ) အတွင်း သတ်မှတ်ထားသည့် ရွေးကောက်ပွဲကုန်ကျစရိတ် တင်သွင်းရမည်ဖြစ်သည်။
အမတ်လောင်းတစ်ဦးလျှင် ရွေးကောက်ပွဲ ကုန်ကျစရိတ် သိန်း ၁ဝဝ အထိ အသုံးပြုခွင့်ပေးထားသည်။
