ချင်းပြည်နယ်မြောက်ပိုင်း၊ မြို့လုံးကျွတ်စစ်ရှောင်နေရသည့် ထန်တလန်မြို့တွင် ယနေ့ (အောက်တိုဘာ ၂၉) မနက်က စစ်သားတစ်ဦး ပစ်သတ်ခံရပြီးနောက် စစ်တပ်က မီးရှို့သောကြောင့် လူနေအိမ် ၇၀ ခန့် မီးလောင်သွားကြောင်း ချင်းဒေသကာကွယ်ရေးတပ်ဖွဲ့ (CDF ထန်တလန်) ၏ ပြောရေးဆိုခွင့်ရှိသူက ပြောသည်။
မနက် ၉ နာရီခွဲခန့်၌ မြို့တွင်းအခြေအနေကို စောင့်ကြည့်နေသည့် CDF တပ်ဖွဲ့ဝင်များက ဗိုလ်ချုပ်လမ်းပေါ်ရှိ ဈေးဆိုင်တစ်ခုကို ဖောက်ထွင်းနေသော စစ်ကောင်စီတပ်သားတစ်ဦးကို ပစ်သတ်ခဲ့သည်ဟု ဆိုသည်။
၎င်းစစ်သား ပစ်သတ်ခံရပြီးနောက် စစ်တပ်က လက်နက်ကြီးဖြင့် မြို့ပေါ်ကို ၁၀ ချက်ခန့် ပစ်ခတ်ခဲ့ကြောင်း၊ မနက် ၁၀ နာရီခွဲခန့်တွင် စစ်သားသေဆုံးသည့် နေရာသို့ စစ်ကြောင်းရောက်လာကာ နေအိမ်များကို မီးစရှို့ခဲ့ကြောင်း ၎င်းက ဆက်ပြောသည်။
“သူတို့ (စစ်သားများ) က သက်သက်မဲ့ အိမ်တွေကို မီးရှို့တာဗျ။ မနက် ၁၀ နာရီခွဲလောက်မှာ မြို့ထဲကို လမ်းလျှောက်လာပြီးတော့ အိမ်တွေကို မီးရှို့တာပေါ့” ဟု CDF ထန်တလန်အဖွဲ့၏ ပြောရေးဆိုခွင့်ရှိသူက ပြောသည်။
မနက် ၁၀ နာရီခန့်ခွဲမှ ညနေ ၅ နာရီခန့်အတွင်း နေအိမ် ၄၀ ခန့်အထိ လောင်ကျွမ်းသွားသည်။ ညနေ ၅ နာရီခန့်အထိ မြို့ပေါ်တွင် မီးဆက်လောင်နေဆဲဖြစ်ပြီး ဗိုလ်ချုပ်လမ်းမပေါ်ရှိ CB ဘဏ်နှင့် ခရစ်ယာန်ဘုရားကျောင်းတစ်ခုလည်း မီးဒဏ်အနည်းငယ် ခံခဲ့ရသည်ဟု သိရသည်။
မြို့ပေါ်တွင် အသက်ကြီးပိုင်းအမျိုးသမီးနှစ်ဦး အပါအဝင် ၃ ဦး ဆက်လက်နေထိုင်နေသည်ဟု သိရပြီး ၎င်းတို့ကို Myanmar Now က ဆက်သွယ်ရာတွင် ဖုန်းပိတ်ထားသည်။
ထန်တလန်မြို့အနီးနေထိုင်သူ ဒေသခံ အမျိုးသားတစ်ဦးက မီးလောင်နေသည့်အခြေအနေများကို အဝေးမှသာ လှမ်းမြင်နေရပြီး မြို့ပေါ်တွင် နေထိုင်သူ အမျိုးသမီးနှစ်ဦးနှင့် အဆက်အသွယ်မရသေးကြောင်း ညနေ ၅ နာရီခန့်က ပြောသည်။
“မီးခိုးတော့ ကျွန်တော်မြင်ပါတယ်။ ကျွန်တော်တို့က မြို့အပြင်နားမှာနေတာဆိုတော့ မီးခိုးပဲ မြင်ရတယ်။ အခုထိလည်း မီးခိုးတွေထွက်နေတုန်းပဲ” ဟု အဆိုပါမြို့ခံက ပြောသည်။
ယနေ့ည ၇ နာရီတွင် နေအိမ်အလုံး ၇၀ ကျော်ခန့် လောင်ကျွမ်းသွားပြီဖြစ်ကြောင်း CDF ထန်တလန်က ပြောသည်။
ချင်းပြည်နယ်စည်ပင်ဝန်ကြီးဟောင်း ဆလိုင်းအိုက်ဇက်ခင်က စစ်ကောင်စီတပ်၏ လုပ်ရပ်ကို ရှုတ်ချလိုက်သည်။
“ချင်းတောင်မှာ အိမ်တစ်လုံးဖြစ်လာဖို့ မလွယ်ပါ။ ချင်းတွေက ကိုယ့်အိမ်ကိုယ် မီးရှို့စရာအကြောင်း မရှိပါ။ ယနေ့ဖြစ်ပွားသည့် ထန်တလန်မြို့ပေါ်က မီးလောင်မှုများအတွက် စစ်ကောင်စီတွင် ကြီးမားစွာ သမိုင်းနှင့်ချီ၍ တာဝန်ရှိသွားပါပြီ” ဟု ဝန်ကြီးက facebook တွင် ညနေ ၆ နာရီခန့်က ရေးသားလိုက်သည်။
“စစ်ကောင်စီ၏ ချင်းပြည်နယ်အစိုးရအဖွဲ့ယန္တရားတွင် ပါဝင်ထောက်ကူနေကြသည့် ချင်းလူမျိုးများ ချက်ချင်းနုတ်ထွက်သင့်ကြပါပြီ”
ထန်တလန်အခြေအနေနှင့် ပတ်သက်ပြီး စစ်ကောင်စီ ပြန်ကြားရေးတာဝန်ရှိသူ ဗိုလ်ချုပ်ဇော်မင်းထွန်း၊ စစ်တပ် သတင်းပြန်ကြားရေးအဖွဲ့ ဗိုလ်ချုပ်စိုးနိုင်ဦးတို့ကို ယနေ့ ညနေပိုင်းတွင် မေးမြန်းရန် ကြိုးစားသော်လည်း ဖုန်းပြန်လည်ဖြေဆိုကြခြင်း မရှိပေ။
ထန်တလန်မြို့တွင် အိမ်ခြေ ၂,၀၀၀ ခန့်ရှိပြီး စက်တင်ဘာလလယ်မှစ၍ ဖြစ်ပွားသည့် မြို့ပေါ်တိုက်ပွဲများကြောင့် ထိုစဉ်က နေအိမ် ၁၉ လုံးမီးလောင်ကျွမ်းခဲ့ပြီးဖြစ်သည်။
မြို့လုံးကျွတ် စစ်ရှောင်ခဲ့ကြရာ ၇,၇၀၀ ကျော်မှာ နယ်စပ်တစ်လျှောက်ရှိ တောင်ကြောများပေါ်မှ ရွာပေါင်း ၅၀ ကျော်တွင် ခိုလှုံနေကြပြီး ၄၀၀၀ ကျော်မှာ အိန္ဒိယနိုင်ငံ မီဇိုရမ်ပြည်နယ်ထဲသို့ တိမ်းရှောင်နေကြသည်။
စက်တင်ဘာလကုန်ပိုင်းက ထန်တလန်ရပ်မိရပ်ဖများ စီးနင်းလာသည့် ကားကို ထန်တလန်မြို့အဝင်တွင် စစ်တပ်က ပစ်ခတ်ခဲ့သည့်အတွက် နှစ်ဦးသေပြီး နှစ်ဦး ဒဏ်ရာရခဲ့သည်။
CDF အဖွဲ့၏ အချက်အလက်များအရ ထန်တလန်မြို့ပေါ်တွင် ဟားခါးအခြေစိုက် ခလရ ၂၆၉၊ တပ်မ ၁၁ ၏ လက်အောက်ခံတပ်များ ရှိနေပြီး အင်အား ၂၀၀ ခန့်ဖြင့် မြို့ကို အပေါ်စီးကနေမြင်ရသည့် တောင်ကုန်းတွင် တပ်စွဲထားကြသည်။
(လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့အကူအညီကို လိုအပ်နေပါတယ်။ ဒီနေရာကိုနှိပ်၍ လှူဒါန်းနိုင်ပါတယ်။)
