အင်တာဗျူး- ကမ္ဘာ့နိုင်ငံတွေနဲ့ NUG သံခင်းတမန်ခင်း တိုးတက်မှုရှိနေပြီ 

တစ်ကျော့ပြန် စစ်အာဏာသိမ်းမှု ၉ လနီးပါးရှိလာချိန်အတွင်း နိုင်ငံတကာမျက်နှာစာတွင် နိုင်ငံကိုယ်စားပြုမှု၊ တရားဝင်မှုတို့အတွက် စစ်ကောင်စီနှင့် ယှဉ်ပြိုင်နွှဲနေသည့် အမျိုးသားညီညွတ်ရေးအစိုးရ (NUG) ၏ ခြေလှမ်းများ ပို၍ စိပ်နေသည်။

အွန်လိုင်းမှတစ်ဆင့် အောက်တိုဘာ ၂၆ တွင် စတင်ပြုလုပ်သည့် အရှေ့တောင်အာရှနိုင်ငံများအသင်း (အာဆီယံ) ထိပ်သီးအစည်းအဝေးသို့ စစ်ခေါင်းဆောင်တက်ရောက်ခွင့် ငြင်းပယ်ခံရချိန်တွင် NUG ယာယီသမ္မတ ဒူးဝါးလရှီးလနှင့် နိုင်ငံခြားရေးဝန်ကြီး ဒေါ်ဇင်မာအောင်တို့က အမေရိကန်သမ္မတ၏ အမျိုးသားလုံခြုံရေးအကြံပေးနှင့် ဆွေးနွေးခွင့်ရခဲ့သည်။

ကမ္ဘာ့အင်အားကြီး အမေရိကန်နိုင်ငံထံမှ မည်သို့သော ပူးပေါင်းဆောင်ရွက်မှု ရရန်ရှိသည်၊ စစ်ခေါင်းဆောင်များအပေါ် ဩဇာလွှမ်းမိုးနိုင်စွမ်းရှိသည့် တရုတ်၊ ရုရှားတို့နှင့် NUG ၏ ဆက်ဆံရေး မည်သို့ရှိသည်၊ ကုလသမဂ္ဂနှင့် အာဆီယံတို့တွင် NUG ဘက်မှ နိုင်ငံကိုယ်စားပြုခွင့်ရရေး မည်သို့ကြိုးပမ်းနေသည်တို့ကို သိရှိနိုင်ရန် ဒေါ်ဇင်မာအောင်နှင့် ဆက်သွယ်မေးမြန်းထားပါသည်။

မေး – အာဏာသိမ်းခေါင်းဆောင်ကို အာဆီယံက ထိပ်သီးအစည်းအဝေးမဖိတ်သလို အစည်းအဝေးမှာလည်း နိုင်ငံ့ခေါင်းဆောင်တွေက စစ်ကောင်စီအပေါ် ပြစ်တင်သွားကြတာ တွေ့ရပါတယ်။ NUG ဘက်က အမြင်ကရော ဘယ်လိုရှိပါသလဲ။

ဖြေ – ဒေသတွင်းအဖွဲ့အစည်း၊ မြန်မာပြည်နဲ့လည်း အနီးစပ်ဆုံးဖြစ်တယ်၊ ဒါ မြန်မာပြည်သူလူထုရဲ့ အာဆီယံအပေါ်မှာ ရှိနေတဲ့ အမြင်က ဘာပဲပြောပြော ကောင်းတဲ့ဘက်ပေါ့၊ စစ်ခေါင်းဆောင်တွေကို လက်မခံတဲ့အတွက်ကြောင့်မို့လို့ အာဆီယံကလည်း မြန်မာပြည်သူလူထုရဲ့ အသံကို နားထောင်တယ်၊ အတူတူရှိနေတယ်ဆိုတဲ့ အမြင်ပေါ့၊ အကောင်းဘက်ကို ပြောင်းလဲသွားစေတဲ့ အမြင်တစ်ခု ရစေတယ်လို့ မြင်ပါတယ်။ ဘယ်လောက်သက်ရောက်မှုရှိလဲဆိုတော့ ဒါက အစပဲပေါ့နော်။ အာဆီယံရဲ့ သမိုင်းမှာလည်း ဒါက အင်မတန်မှ သတ္တိရှိတဲ့အချက်လို့ ပြောလို့ရပါတယ်။ နောက်တစ်ခုက ကမ္ဘာမှာဖြစ်ပေါ်နေတဲ့ အာဏာသိမ်းမှုတွေ၊ အာဏာရှင်တွေရဲ့ စိန်ခေါ်မှုတွေကို ရှိပြီးသား အတွေးအခေါ်ဟောင်းတွေနဲ့ ချဉ်းကပ်ပုံအဟောင်းတွေနဲ့ မရတော့ဘူးဆိုတာကို သက်သေပြရာရောက်တယ်လို့ မြင်ပါတယ်။

မေး – ဒီထိပ်သီးအစည်းအဝေးမှာ ပါဝင်ခွင့်ရဖို့ NUG ဘက်က တောင်းဆိုခဲ့တာမျိုးရှိတယ်။ လက်တွေ့တော့ တက်ခွင့် မရခဲ့ဘူး။ ဒီအပေါ်မှာရော ဘာများမှတ်ချက်ပြုချင်ပါသလဲ။

ဖြေ – အာဆီယံထိပ်သီးအစည်းအဝေးနဲ့ ပတ်သက်လို့ ကြေညာချက်ထုတ်ပြန်ခဲ့တာရှိပါတယ်။ နှစ်ချက်ပါပါတယ်။ တစ်က စစ်ကောင်စီရဲ့ ခေါင်းဆောင်ကို အသိအမှတ်ပြုပြီး ဖိတ်ကြားခြင်းမပြုဖို့၊ တက်ရောက်ခွင့်မပြုဖို့၊ ဒုတိယအချက်က NUG ကို ဖိတ်ကြားဖို့ဆိုတော့ တစ်ဝက်တော့ ပြည့်မြောက်သွားတယ်လို့ ပြောလို့ရပါတယ်။ 

မေး – ထိပ်သီးအစည်းအဝေးစတဲ့နေ့မှာပဲ NUG က အာဆီယံဆိုင်ရာ သံအမတ်ခန့်တာတွေ့ပါတယ်။ ကိုယ်စားပြုခွင့်အတွက် ထပ်ကြိုးစားတဲ့ သဘောလား။

ဖြေ – အကယ်၍များ နိုင်ငံရေးရာထူးမဟုတ်တဲ့သူကို ကိုယ်စားပြုခွင့်ရမယ်ဆိုရင် NUG ကလည်း တက်ရောက်ခွင့်ရမယ်ဆိုရင် ကျွန်မတို့မှာ ကိုယ်စားလှယ်အဆင်သင့်ရှိပါတယ်လို့ သတင်းစကားပေးပို့ခဲ့တာ ဖြစ်ပါတယ်။ ဒီအစည်းအဝေးမှာ တက်ရောက်ခွင့်မရဘူးဆိုရင်တောင်မှ ကျွန်မတို့ ဆက်သွယ်ဆောင်ရွက်သွားမယ့် ကိုယ်စားလှယ်မျိုးကို လိုအပ်ပါတယ်။ ဒါကြောင့်မို့ ခန့်တာဖြစ်ပါတယ်။

မေး – အာဆီယံနဲ့ NUG ရဲ့ ဆက်ဆံရေး ဘယ်လိုရှိပါသလဲ။ မြန်မာ့အရေးဖြေရှင်းဖို့ ချမှတ်ထားတဲ့ အာဆီယံရဲ့ ဘုံသဘောတူညီမှု ၅ ရပ်မှာ ဘက်ပေါင်းစုံနဲ့ တွေ့ဆုံရေးဆိုတာလည်းပါတော့ အထူးကိုယ်စားလှယ်နဲ့ ဆွေးနွေးဖြစ်ကြလား။

ဖြေ – တရားဝင်တွေ့ဆုံမှုမရှိသေးဘူး။ သဘောထားတီးခေါက်တဲ့ သဘောမျိုးတွေတော့ရှိတယ်။ ဘာဖြစ်လို့ တရားဝင်တွေ့ဆုံမှုမရှိသေးတာလဲဆိုတော့ ဒီအာဆီယံသဘောတူညီချက် ၅ ရပ်ကို သဘောတူခဲ့တဲ့ တာဝန်အရှိဆုံးသူက ဗိုလ်ချုပ်မှူးကြီးမင်းအောင်လှိုင်ဖြစ်တယ်။ သူသဘောတူခဲ့တာ ဒီ ၅ ချက်က သူကိုယ်တိုင် အစည်းအဝေးတက်ရောက်ခဲ့တာဖြစ်တယ်။

ဒီထက်ပိုတဲ့ တောင်းဆိုချက်တွေရှိတယ်။ ဖမ်းဆီးထိန်းသိမ်းထားတဲ့ ခေါင်းဆောင်တွေ ပြန်လွှတ်ပေးဖို့ အချို့နိုင်ငံတွေက တောင်းဆိုခဲ့တာရှိတယ်။ သို့သော်လည်း အဲဒီအချက်အလက်တွေမရဘဲနဲ့ အာဆီယံသဘောတူညီချက် ၅ ရပ်ဆိုတာ ဖြစ်လာတယ်။ ဒါ အာဆီယံခေါင်းဆောင်ပိုင်းမှာကို အလျှော့အတင်းတွေလုပ်၊ သေချာဆွေးနွေးပြီးတော့မှ ရတဲ့ ၅ ချက်ကို စစ်ခေါင်းဆောင်ကိုယ်တိုင် သဘောတူခဲ့တာဖြစ်တယ်။ ဒါကြောင့်မို့လို့ ဒီ ၅ ချက်ကို လိုက်နာဆောင်ရွက်ဖို့ အဓိကတာဝန်အရှိဆုံးသူကလည်း သူပဲဖြစ်တယ်။

မေး – အိမ်နီးချင်းလည်းဖြစ်၊ မြန်မာနဲ့ စီးပွားရေး၊ စစ်ရေးစသဖြင့် ပတ်သက်ဆက်နွှယ်မှုတွေလည်းရှိတဲ့ အင်အားကြီး တရုတ်နိုင်ငံနဲ့ NUG ရဲ့ ဆက်ဆံရေးအခြေအနေကိုရော ပြောပြလို့ရမလားခင်ဗျ။

ဖြေ – တရုတ်နိုင်ငံကလည်း ကျွန်မတို့တိုင်းပြည်ရဲ့ နိုင်ငံရေးအခြေအနေ၊ ပြည်တွင်းမှာရှိတဲ့ နိုင်ငံရေးဇာတ်ကောင်တွေ၊ ပြည်သူလူထုရဲ့ သဘောထားအမြင်တွေကို နီးနီးကပ်ကပ်ကို စောင့်ကြည့်လေ့လာ စိတ်ဝင်တစားရှိနေတယ်လို့ ကျွန်မတို့ သိရပါတယ်။ ဒါကလည်း သိပ်ကို သေချာတဲ့ကိစ္စပါ။ 

ဘာလို့လဲဆိုတော့ အိမ်နီးနားချင်းနိုင်ငံတစ်နိုင်ငံဖြစ်တယ်၊ အကျိုးစီးပွားချင်းက အများကြီးကို ချည်နှောင်ထားကြတာဖြစ်တယ်။ အဲဒီတော့ တရုတ်နိုင်ငံအတွက်လည်း မြန်မာပြည်တွင်းမှာရှိတဲ့ နိုင်ငံရေးတည်ငြိမ်မှုက သူ့နိုင်ငံအတွက်လည်း အများကြီးအရေးကြီးပါတယ်။

အထူးအားဖြင့် အမျိုးသားဒီမိုကရေစီအဖွဲ့ချုပ်အစိုးရလက်ထက်မှာ သဘောတူညီခဲ့တဲ့ တရုတ်နိုင်ငံရဲ့ ရင်းနှီးမြှုပ်နှံမှုကိစ္စတွေရှိတယ်။ အဲဒီတော့ ဘယ်လောက်ပင် သဘောတူညီမှုတွေ ရှိခဲ့ရှိခဲ့၊ စီးပွားရေးရင်းနှီးမြှုပ်နှံမှုကိုပဲ ဦးစားပေးပြီးတော့ နိုင်ငံရေးစနစ်ကို ထည့်မထွက်ဘူးဆိုတဲ့ အခင်းအကျင်းမျိုးတော့ စဉ်းစားလို့မရတော့ဘူးဆိုတာတော့ သဘောပေါက်လာပုံရတယ်လို့ ကျွန်မတို့ထင်ပါတယ်။ ဘာဖြစ်လို့လဲဆိုတော့ မြန်မာပြည်မှာ နိုင်ငံရေးမတည်ငြိမ်ရင် ဘယ်စီးပွားရေးမှ လုပ်လို့မရဘူးပေါ့နော်။

မေး – တရုတ်နဲ့ ဆွေးနွေးမှုတွေရှိနေတယ်ဆိုတဲ့ သဘောမျိုးလား။ စစ်ခေါင်းဆောင်တွေနဲ့ ဟိုးအရင်ကတည်းက နီးကပ်တဲ့ ဆက်ဆံရေးရှိတဲ့ တရုတ်နိုင်ငံနဲ့ ဆက်ဆံရေးကောင်းဖို့၊ ထောက်ခံမှုရဖို့ ဘယ်လိုလုပ်နေပါသလဲခင်ဗျာ။ 

ဖြေ – အထူးသဖြင့် နိုင်ငံရေးမတည်ငြိမ်မှုဖြစ်ရတဲ့ အကြောင်းရင်းကလည်း စစ်တပ်က နိုင်ငံရေးဦးဆောင်မှုအခန်းကဏ္ဍမှာ ပါရမယ်ဆိုတဲ့ ဒီအယူအဆ၊ ကယ်တင်ရှင်အယူအဆကြီးကို ကိုင်စွဲထားသရွေ့ မြန်မာပြည်မှာ ဒီလိုမျိုး နိုင်ငံရေးမတည်ငြိမ်မှုတွေက တောက်လျှောက်ဖြစ်နေဦးမှာပဲ။ ဒီအယူအဆကြောင့်သာ ဖြစ်တယ်ဆိုတာကို သဘောပေါက်ဖို့လိုတယ်။ ဒါကိုလည်း ကျွန်မတို့ တရုတ်နဲ့ပတ်သက်ပြီး ဆွေးနွေးနေတာရှိပါတယ်။

သိပ်အများကြီး တုံ့ပြန်မှုမရှိပေမဲ့ ကျွန်မတို့ဘက်ကတော့ မြန်မာပြည်သူလူထုရဲ့ တကယ့်လိုအပ်ချက်၊ မြန်မာ့နိုင်ငံရေးရဲ့ ပကတိလိုအပ်ချက်က ဘာဖြစ်တယ်၊ ဒီအပေါ်မှာ တရုတ်နိုင်ငံအနေနဲ့ စိုးရိမ်ကြောင့်ကျမှု မရှိဖို့၊ ကျွန်မတို့အနေနဲ့ မည်သည့်နိုင်ငံကိုမှ ဆန့်ကျင်ဖို့၊ ဘယ်ဘက်ကိုမှ ယိမ်းသွားဖို့ လုပ်တာမဟုတ်ဘူး။ ပြည်သူလူထုရဲ့ လိုအပ်ချက်၊ နိုင်ငံရေးလိုအပ်ချက်အရ တော်လှန်ရေးကို ဆင်နွှဲနေတာဖြစ်တယ်။ ဒါဟာ ဘယ်အိမ်နီးနားချင်းနိုင်ငံကိုမှ ခြိမ်းခြောက်ဖို့ မဟုတ်ဘူး။ ကမ္ဘာ့အင်အားကြီးနိုင်ငံတွေကြားထဲမှာ ဘယ်ဘက်ကိုမှ ယိမ်းသွားဖို့ မဟုတ်ဘူး။

ဒါ ကျွန်မတို့တိုင်းပြည်ရဲ့ ပကတိလိုအပ်ချက်ကိုး။ အခုဆိုရင် ဘယ်သူမှမလုံခြုံဘူး။ ဒီအခြေအနေကို ဘယ်သူမှမလိုချင်ဘူး။ ဒါကြောင့် အရင်းခံအကြောင်းရင်းပြဿနာကိုတော့ ဖြေရှင်းဖို့လိုတယ်။ ဒီနိုင်ငံရေး အရင်းခံပြဿနာကို မဖြေရှင်းနိုင်သရွေ့ အခုခဏလေး ငြိမ်သွားလည်း နောက်ပြန်ဖြစ်မှာပဲ။ ခဏခဏဖြစ်ခဲ့ပြီးပြီ၊ အခုမှ ဒါ ပထမဆုံးအကြိမ်တော့မဟုတ်ဘူး။ ဒါတွေကိုတော့ ကျွန်မတို့ ကျေကျေလည်လည်သဘောပေါက်အောင် အိမ်နီးနားချင်းနိုင်ငံတွေကိုရော ဆက်စပ်ဆောင်ရွက်နေတဲ့ နိုင်ငံမှန်သမျှကို ရှင်းပြပါတယ်။

မေး – နောက်တစ်ခုက အာဏာသိမ်းပြီးနောက်မှာ စစ်ရေးအပြင် စီးပွားရေးပါ ပတ်သက်ဖို့ စစ်ကောင်စီက ခြေလှမ်းထားတဲ့ ရုရှားနိုင်ငံနဲ့ ပတ်သက်လို့ သိချင်တာပါ။ ရုရှားနဲ့ရော ဆက်ဆံရေးအခြေအနေ ဘယ်လိုရှိပါသလဲ။

ဖြေ – ရုရှားနဲ့ စစ်တပ်၊ စစ်တပ်ချင်းဆက်ဆံရေးက အစောကြီးကတည်းက ရှိနှင့်ပြီးဖြစ်တယ်။ သို့သော်လည်းပဲ နိုင်ငံရေးအကျိုးစီးပွား၊ ပထဝီအနေအထားအရ ကြည့်မယ်ဆိုရင် ရုရှားက အိမ်နီးနားချင်းလည်း ဟုတ်မနေဘူး။ သူ့နိုင်ငံရေးရည်မှန်းချက်ကလည်း ပုံစံတစ်မျိုးဖြစ်တယ်။ 

အာဏာသိမ်းပြီးနောက်ပိုင်းမှာတော့ သံခင်းတမန်ခင်းဆက်ဆံရေးထက် ရုရှားဘက်က တပ်ချင်းဆက်ဆံရေးကို ပိုပြီးတော့ အလေးကဲနေတဲ့ အနေအထားမျိုးတွေ့ရတယ်။ ကျွန်မတို့ဘက်က ပုံမှန် ကမ္ဘာ့နိုင်ငံအသီးသီးကို စာပို့တဲ့အခါမှာတော့ ရုရှားကိုလည်း ဆက်သွယ်ဆောင်ရွက်တာရှိပါတယ်။ သံခင်းတမန်ခင်းမှာတော့ တခြားနိုင်ငံတွေထက်စာရင် ဆက်သွယ်ဆောင်ရွက်မှု၊ တုံ့ပြန်မှုဟာ အင်မတန်အေးခဲတဲ့ သဘောရှိတယ်။ တုံ့ပြန်မှုနှေးကွေးတဲ့ သဘောတော့ရှိပါတယ်။

မေး – NUG က အမေရိကန်သမ္မတရဲ့ အမျိုးသားလုံခြုံရေးအကြံပေးပုဂ္ဂိုလ်နဲ့ ဆွေးနွေးတာတွေ့ပါတယ်။ ဘာတွေပြောဖြစ်ခဲ့ကြပါသလဲ။

ဖြေ – ဒီအာဏာသိမ်းမှုကို ဆန့်ကျင်ပြီးတော့ တိုက်ပွဲဝင်နေကြတဲ့ ပြည်သူလူထုနဲ့အတူ သူတို့ရှိနေတယ်။ NUG လည်း ဒီလှုပ်ရှားမှုထဲမှာ နိုင်ငံရေးအရ identity (စိတ်တူသဘောတူ) အနေနဲ့ ဆောင်ရွက်နေတယ်။ ဦးဆောင်မှုကို သူတို့ အသိအမှတ်ပြုတယ်။ ဒီတော်လှန်ရေးမှာ အစိုးရတစ်ရပ်အနေနဲ့ ရပ်တည်နေမှုတွေ၊ တိုက်ပွဲဝင်နေမှုတွေအပေါ်မှာ သူတို့ အသိအမှတ်ပြုတယ်။ ပြည်သူလူထုရဲ့ တော်လှန်ရေးကိုလည်း အသိအမှတ်ပြုတယ်။ ဒီအတွက် အမေရိကန်ပြည်ထောင်စုကတော့ အကူအညီပေးဖို့ နိုင်ငံတကာမျက်နှာစာမှာ အဆင်သင့်ရှိတယ်။ ဒီသတင်းစကားရပါတယ်။

မေး – အမေရိကန် အမျိုးသားလုံခြုံရေးအကြံပေးလိုလူမျိုးနဲ့ တွေ့ဆုံမှုက သံတမန်ရေးဆိုတဲ့ အဓိပ္ပာယ်ထက်ပိုတဲ့သဘော ကောက်ယူကြတာတွေရှိပါတယ်။ ဒီထက်ပိုပြီး ဘာများပြောပြလို့ရအုံးမလဲ။

ဖြေ – သမ္မတရဲ့ လုံခြုံရေးအကြံပေးဖြစ်တဲ့အတွက် သမ္မတကို တိုက်ရိုက်အကြံပေးတဲ့သူ၊ အစီရင်ခံတယ်ပေါ့။ ဆိုတော့ ဒါ အိမ်ဖြူတော်ကနေ ဆက်သွယ်ဆောင်ရွက်တာဖြစ်တယ်။ ကျွန်မတို့ရနိုင်တဲ့ ယူနိုင်တဲ့ သတင်းစကားကတော့ အမေရိကန်ပြည်ထောင်စုအနေနဲ့ မြန်မာပြည်အရေး၊ အာဏာသိမ်းခံရတဲ့ကိစ္စတွေ၊ ဖိနှိပ်မှုတွေ၊ ဖမ်းဆီးထိန်းသိမ်းခံရမှုတွေ၊ လူ့အခွင့်အရေးချိုးဖောက်မှုတွေ ပြောရရင်တော့ အာဏာသိမ်းမှုနောက်ပိုင်းမှာ ဖြစ်ပေါ်လာတဲ့ ဆိုးပြစ် အရာရာမှန်သမျှ စစ်ကောင်စီမှာပဲ တာဝန်ရှိတယ်။

အခုဆို ပြည်သူလူထုက လက်နက်စွဲကိုင် တော်လှန်နေကြတာရှိတယ်။ ရတဲ့နည်းနဲ့ သွားနေကြတာရှိတယ်။ ကျွန်မတို့ကိုယ်တိုင်လည်း PDF (ပြည်သူ့ကာကွယ်ရေး) တပ်မတော်ဆိုပြီး လုပ်လိုက်ရတာ တွေရှိတယ်။ ဒါတွေက ကိုယ်ရွေးချယ်ချင်လို့ ရွေးချယ်ခဲ့ရတဲ့ အနေအထားမဟုတ်ဘူး။ ဒီအခြေအနေရောက်အောင် အာဏာသိမ်းမှုက တွန်းပို့လိုက်တာဖြစ်တယ်။ ဒီနောက်ဆက်တွဲ တာဝန်ယူမှု၊ တာဝန်ခံမှုတွေက စစ်ကောင်စီက တာဝန်ယူရလိမ့်မယ်ဆိုတဲ့ သတင်းစကားမျိုးကို ရတယ်ပေါ့နော်။ ဆိုတော့ ကောင်းမွန်တဲ့ သံခင်းတမန်ခင်းကို အဆင့်မြှင့်ပြီး တိုးတက်ရရှိနေတာဖြစ်ပါတယ်။ 

အရေးကြီးတာက ကျွန်မတို့တိုင်းပြည်က ပြည်သူလူထုရဲ့ ရုန်းကန်မှုတွေ၊ လွတ်လပ်၊ တရားမျှတမှုနဲ့ ဒီမိုကရေစီရေးအတွက် လှုပ်ရှားမှုတွေကို အိမ်ဖြူတော်လိုမျိုး အမေရိကန်ပြည်ထောင်စုရဲ့ အစိုးရသမ္မတရုံးကနေ တိုက်ရိုက်စိတ်ဝင်စားမှုရှိနေတယ်၊ မျက်ခြည်မပြတ်လည်းရှိနေပါမယ်ဆိုတဲ့ သတင်းစကားကို ရပါတယ်။ ဒါကတော့ ဘာပဲပြောပြော တော်တော်လေးကို စိတ်အားတက်စရာကောင်းတဲ့ကိစ္စလို့ မှတ်ယူလို့ရပါတယ်။

မေး –  သိပ်မကြာသေးမီကပဲ အမေရိကန်နဲ့ NATO (မြောက်အတ္တလန္တိတ်စစ်စာချုပ်အဖွဲ့) တို့ ပေါင်းပြီး Burmese Chase ဆိုတဲ့ နာမည်နဲ့ စစ်ရေးလေ့ကျင့်ခဲ့ပါတယ်။ မြန်မာပြည်မှာ စစ်အာဏာရှင်စနစ်ချုပ်ငြိမ်းရေးအတွက် NUG က လုပ်ဆောင်နေတဲ့ နိုင်ငံတကာဆက်ဆံရေးမျက်နှာစာမှာပေါ့လေ။ သူတို့ဆီက သံတမန်ရေးအကူအညီအပြင် အခြားကတိကဝတ်တွေများ ရနေ၊ ရှိနေပါပြီလားခင်ဗျာ။

ဖြေ – နိုင်ငံခြားရေးအနေနဲ့ကတော့ ထွေထွေထူးထူး ဒီကိစ္စကို သိထားတာတော့ မရှိပါဘူး။ အများသိသလိုမျိုးပါပဲ။ သူတို့ သတင်းတွေထုတ်ပြန်တဲ့အခါမှာလည်း တစ်မျိုးအဓိပ္ပာယ်မယူကြဖို့ အမည်နာမတစ်ခုသာလျှင် ဖြစ်တယ်ဆိုတဲ့ ရေးကြတာတွေတော့ တွေ့ပါတယ်။

ကျွန်မတို့အနေနဲ့ ပြည်သူလူထုကို လွန်ကဲတဲ့ မျှော်လင့်ချက်တွေတော့ မဖြစ်စေချင်ဘူး။ ဒီရုန်းကန်မှုတွေ၊ ဒီအခြေအနေအထိ နိုင်ငံတကာအသိအမှတ်ပြုလာတယ်ဆိုတာ ကိုယ်တိုင်ရုန်းကန်မှ ရတာဖြစ်တယ်။ ကိုယ်တိုင်မရုန်းကန်ဘဲနဲ့ ဘယ်သူကမှ အခုလို ဆက်ဆံဆောင်ရွက်လာမှာ မဟုတ်ဘူး။ ဒါကြောင့် အလွန်အမင်း ဘယ်သူ့ဘယ်သူကိုမှ မျှော်လင့်လို့မရဘူး။

ကျွန်မတို့အလုပ်၊ ကျွန်မတို့တိုင်းပြည်ရဲ့ နိုင်ငံရေးပြုပြင်ပြောင်းလဲဖို့က ပြည်သူလူထုနဲ့ ကျွန်မတို့ကိုယ်တိုင်လုပ်ရမှာဖြစ်တယ်။ ဒါကြောင့်လည်း ဒီနေရာလောက်ထိ ရောက်လာတာထင်တယ်။ ဒါပေမဲ့ မိတ်ဆွေကောင်းဆိုတာတော့ လိုအပ်ပါတယ်။ မိတ်ကောင်းဆွေကောင်းမရှိဘဲနဲ့လည်း ကျွန်မတို့က မအောင်မြင်နိုင်ဘူး။ ကျွန်မတို့မှာ မဟာမိတ်လိုတယ်။ ဒါပေမဲ့ မဟာမိတ် မည်သို့ပင်ကောင်းစေကာမူ ကိုယ်မလုပ်ရင်လည်း ရမှာမဟုတ်ဘူး။ အလွန်အမင်းတော့ မမျှော်လင့်စေချင်ပါဘူး။ ကိုယ်လုပ်စရာရှိတဲ့ အလုပ်ကို ဆက်ပြီးတော့ လုပ်သွားရမှာပဲဖြစ်ပါတယ်။

NATO (မြောက်အတ္တလန္တိတ်စစ်စာချုပ်အဖွဲ့) တပ်ဖွဲ့နှင့် ပူးပေါင်း၍ Burmese Chase အမည်ရ စစ်ရေးလေ့ကျင့်မှုကို အောက်တိုဘာ ၂၃ ရက်က အမေရိကန်နိုင်ငံ Camp Lejeune စစ်အခြေစိုက်စန်းတစ်ခုတွင် ပြုလုပ်ခဲ့သည့် ရုပ်သံမှတ်တမ်း။ မူပိုင် – U.S. Department of Defense (DoD)

(လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့အကူအညီကို လိုအပ်နေပါတယ်။ ဒီနေရာကိုနှိပ်၍ လှူဒါန်းနိုင်ပါတယ်။)