ပဲခူးတိုင်း၊ ညောင်လေးပင်မြို့နယ်၊ ဖအောင်းရွာရှိ စစ်တပ်ကင်းစခန်းငယ်တစ်ခု ယမန်နေ့ (ဇွန် ၂၂) ညပိုင်း၌ တိုက်ခိုက်ခံရပြီး စစ်သားတစ်ဦး ဒဏ်ရာရခဲ့ကြောင်း ဒေသခံများထံမှ သိရသည်။
ည ၈ နာရီကျော်ခန့်တွင် ကင်းစခန်းဘက်မှ ပေါက်ကွဲသံကြားရပြီး လက်လုပ်ဗုံးဖြင့် ပစ်ခတ်သည်ဟု ယူဆရကြောင်း ဒေသခံတစ်ဦးက ပြောသည်။
“ပေါက်ကွဲသံလည်း ကြားရတယ်။ တစ်ယောက်ပဲ ထိတယ်။ လက်ကိုပဲ ထိသွားတယ်။ ဆိုင်ကယ်နဲ့ လာပစ်သွားတာ။ ၇ ယောက်သေတယ်ဆိုတာကတော့ မဟုတ်ဘူး” ဟု ၎င်းက ပြောသည်။
ကားလမ်းမဘေးရှိ ၎င်းကင်းစခန်းတွင် စစ်သား ၄ ဦးခန့်ရှိပြီး ဘေးတွင် စစ်မှုထမ်းဟောင်းအဆောက်အအုံရှိကာ သွားလာနေသည့် ဆိုင်ကယ်နှင့် ယာဉ်များကို ရံဖန်ရံခါ စစ်ဆေးတတ်ကြောင်း အထက်ပါဒေသခံက ဆိုသည်။
“စစ်မှုထမ်းဟောင်းအဆောက်အအုံဘေး ကားလမ်းပေါ်မှာပဲ တဲလေးထိုးပြီး ကင်းစောင့်ကြတယ်။ စစ်တပ်ကပဲ စောင့်တာပဲ။ ပုံမှန်အချိန်တွေမှာတော့ သူတို့ ၂ယောက်ကနေ ၄ ယောက်ထိပဲ စောင့်ကြတယ်။ ကားလမ်းဘေးမှာတော့ ၂ ယောက်လောက်ပဲ ထိုင်နေကြတာများတယ်။ ကျန်တဲ့သူတွေကတော့ တဲအတွင်းဘက်မှာ ထိုင်နေကြတာ” ဟု ပြောသည်။
ယနေ့ ဇွန် ၂၃ နံနက်ပိုင်းတွင် ပဲခူးပြည်သူ့ကာကွယ်ရေးအဖွဲ့ (BDF) မှ ၎င်းတို့လက်ချက်ဖြစ်ကြောင်း ကြေညာခဲ့ပြီး စစ်တပ်မှ ၇ ဦး သေဆုံးခဲ့ကြောင်း ထုတ်ပြန်ခဲ့သည်။
သို့ရာတွင် ညောင်လေးပင်၊ ပြွန်တန်ဆာမြို့ခံများ၏ ပြောဆိုချက်အရ ၇ ဦးသေဆုံးသည်မှာ မဟုတ်မှန်ကြောင်း၊ ဆေးရုံတက်ရောက်သူမရှိကြောင်း အသီးသီးပြောသည်။
ယမန်နေ့က မန္တလေးမြို့တွင် ပြည်သူ့ကာကွယ်ရေးတပ်ဖွဲ့ (PDF) ဝင်တချို့ တိုက်ခိုက်ခံခဲ့ရသောကြောင့် တန်ပြန်တိုက်ခိုက်ခြင်းဖြစ်သည်ဟု BDF အဖွဲ့ဝင်တစ်ဦးက ဆိုသည်။
” မနေ့က မန္တလေးမှာ ကျွန်တော်တို့ရဲဘော်တွေ ပစ်ခတ်ဖမ်းဆီးခံရတာရှိတယ်။ အဲ့ဒီအတွက် ကျွန်တော်တို့ တစ်ချိန်တည်းမှာပဲ လှုပ်ရှားရခြင်းဖြစ်တယ်” ဟု ၎င်းက ပြောသည်။
လက်ရှိအချိန်ထိ ထိုနေရာတွင် လုံခြုံရေးတိုးမြှင့်ချထားမှုများနှင့် အခြားမည်သည့်ထူးခြားမှုမျှမရှိသေးဟု သိရသည်။
