ဗုဒ္ဗဘာသာဝင်တွေအတွက် နေ့ထူးနေ့မြတ်အဖြစ် သတ်မှတ်ထားတဲ့ ဝါဆိုလပြည့်နေ့ညမှာ မန္တလေး၊ မကွေးနဲ့ ကရင်နီပြည်နယ်ထဲက နေရာသုံးခုကို စစ်ကောင်စီလေတပ်က ဗုံးကြဲခဲ့တာကြောင့် ကလေးငယ်တွေအပါအဝင် အနည်းဆုံး လူ ၉ဦး သေဆုံးပြီး၊ ဒဏ်ရာရသူတွေလည်း လူတစ်ဒါဇင်ကျော် ရှိခဲ့ပါတယ်။
မန္တလေးတိုင်း၊ မိုးကုတ်မြို့၊ ကရင်နီပြည်နယ် မော်ချီးဒေသနဲ့ မကွေးတိုင်း၊ မြိုင်မြို့နယ်တို့မှာ စစ်ကောင်စီလေတပ်က တစ်ရက်ထဲ ၃နေရာကို ဗုံးကြဲတိုက်ခိုက်ခဲ့တာပါ။
ဝါဆိုလပြည့်နေ့ကို ဗုဗ္ဓဘာသာဝင်တွေက နေ့ထူးနေ့မြတ်အဖြစ် သတ်မှတ်ထားကြပြီး ဝါဆိုလပြည့်နေ့ကစလို့ ဝါတွင်းသုံးလပတ်လုံး ဥပုလ်နေ့တိုင်းမှာ ဥပုလ်သီလဆောက်တည်တာ၊ သက်သတ်လွတ်စားတာ၊ ဘုရားစေတီပုထိုးတွေသွားတာ စသဖြင့် ကောင်းမှုကုသိုလ်တွေလုပ်လေ့ ရှိကြပါတယ်။
ဒီလို အထွတ်အမြတ်ထားတဲ့ နေ့ကြီးရက်ကြီးတွေလည်းမရှောင် စစ်ကောင်စီတပ်က ဆက်လက်ဗုံးကြဲသတ်ဖြတ်နေတာ ဖြစ်ပါတယ်။
ကိုလှိုင်း/ Myanmar Now
