စစ်ကိုင်းတိုင်း၊ ကန့်ဘလူမြို့နယ်၊ ဇီးကုန်းမြို့အနီးက ကျေးရွာတွေကို သင်္ကန်းဝတ် ဦးဝါသဝ ဦးဆောင်တဲ့ ပျူစောထီးနဲ့ စစ်ကောင်စီတပ်တွေ ဝင်ရောက်စီးနင်းပြီး တစ်ပတ်ကျော်အတွင်းမှာ အနည်းဆုံး ဒေသခံ ၁၁ဦးကို သတ်ဖြတ်ခဲ့သလို ကျေးရွာတွေကိုလည်း မီးရှို့ဖျက်ဆီးနေတယ်လို့ ဒေသခံတွေနဲ့ ကာကွယ်ရေး အဖွဲ့တွေက ပြောပါတယ်။
ဇီးကုန်းမြို့နဲ့ ဇီးကုန်းမြို့အနီးက သကြားစက်တွေမှာ အထိုင်စခန်းချထားတဲ့ စစ်ကောင်စီနဲ့ ပျူစောထီး အင်အား ၁၅၀ လောက် ပါတဲ့ ပူးပေါင်းအဖွဲ့ဟာ ဇွန်လ ၂၃ ရက်က စပြီး ဇီးကုန်းမြို့အနီးပတ်လည်ကို စစ်ကြောင်းထိုးခဲ့ပါတယ်။
အဲ့ဒီ့ပူးပေါင်းစစ်ကြောင်းဟာ ဒီကနေ့(ဇူလိုင် ၄)အထိ ဒေသခံ ၁၁ ဦးထိ သတ်ဖြတ်ခဲ့သလို ဇီးကုန်းမြို့ ရန်ကြီးအောင်ကွက်သစ်နဲ့ ဆင်ထူးကုန်း ဘုန်းကြီးကျောင်း အရှေ့ဘက်က နေအိမ်တွေကိုလည်း မီးရှို့ဖျက်ဆီးခဲ့တယ်လို့ ဒေသခံတွေက ပြောပါတယ်။
ကန့်ဘလူမြို့နယ်အတွင်းမှာ ၅၀၅ ဆရာတော်လို့ လူသိများတဲ့ စစ်ကောင်စီလက်အောက်ခံ သင်္ကန်းဝတ်ဘုန်းကြီး ဦးဝါသ၀ ဦးဆောင်တဲ့ ပျူစောထီးတပ်တွေက စစ်ကောင်စီတပ် တွေနဲ့ ပူးပေါင်းပြီး ဒီသတ်ဖြတ်မှုတွေကို ကျူးလွန်နေကြတာပါ။
စစ်တပ်နဲ့ ပျူစောထီးလက်ချက်ကြောင့် သေဆုံးသွားသူတွေဟာ သပြေသာရွာက အမျိုးသား ၅ ဦး၊ ကျောင်းကုန်းရွာက အမျိုးသား ၃ ဦး၊ ဖိုကုန်းရွာက အမျိုးသား ၁ဦး ၊ မင်းဘာရွာက အမျိုးသာ ၁ဦးနဲ့ အမည်မသိအမျိုးသား ၁ ဦးတို့ ဖြစ်ပြီး အသတ်ခံရတဲ့ သူတွေဟာ တော်လှန်ရေးအဖွဲ့တွေနဲ့ ဆက်စပ်သူတွေမဟုတ်ပဲ အရပ်သားတွေသာဖြစ်တယ်လို့ ဒေသခံတွေက ပြောပါတယ်။
ကိုလှိုင်း/ Myanmar Now
