စစ်ကိုင်းတိုင်း အထက်ပိုင်း ကချင်ပြည်နယ်အစပ်က အင်းတော်မြို့ကို တော်လှန်ရေး ပူးပေါင်းတပ်တွေက ၈ လ နီးပါးကြ ာတိုက်ခိုက်ပြီးနောက် ဧပြီ ၇ ရက် ညဦးပိုင်းမှာ အပြီးသတ်သိမ်းပိုက်နိုင်ခဲ့ပါပြီ။
ဧပြီ ၇ရက်နေ့ ည ၈ နာရီလောက်က အင်းတော်မြို့မှာ တစ်ခုတည်း ကျန်နေတဲ့ စစ်ကောင်စီတပ်ရဲ့ ဂျပန်လှိုဏ်ဂူကုန်းကို တော်လှန်ရေးပူးပေါင်းတပ်တွေက သိမ်းပိုက်ပြီးတဲ့နောက် အင်းတော်မြို့ကို အပြီးသတ် သိမ်းပိုက်နိုင်ခဲ့တာလို့ ရှေ့တန်းသတင်းရင်းမြစ်က ပြောပါတယ်။
အင်းတော်မြို့သိမ်းတိုက်ပွဲမှာ တော်လှန်ရေး ပူးပေါင်းအဖွဲ့တွေဘက်ကနေ စစ်ကောင်စီတပ်ရဲ့ စစ်သုံ့ပန်း အများအပြား ဖမ်းမိခဲ့သလို ၁၂၀ မမ ၊ ဟောင်ဝစ်ဇာ အမြောက်လက်နက်ကြီးတွေအပါအဝင် လက်နက်ခဲယမ်းအများအပြား သိမ်းဆည်း ရရှိထားပါတယ်။
တိုက်ပွဲဖြစ်ပွားနေစဉ်တစ်လျှောက်လုံး စစ်ကောင်စီတပ်က လေယာဉ်တွေနဲ့ ဗုံးကြဲ တိုက်ခိုက်ခဲ့တာကြောင့် နှစ်ဖက်ထိခိုက်သေဆုံးမှုတွေလည်း ရှိခဲ့ပါတယ်။
