​မြန်မာနိုင်ငံမှ ထွက်​ပြေးလာ​​သူများကို ကာကွယ်​စောင့်​ရှောက်​ပေးရန် ကုလတာဝန်ရှိသူတိုက်တွန်း

မြန်မာနိုင်ငံမှ ထွက်ပြေးတိမ်းရှောင်လာသူများကို အိမ်နီးချင်းနိုင်ငံများက ကာကွယ်စောင့်ရှောက်ပေးရန် လိုအပ်ကြောင်း ကုလသမဂ္ဂ၏ မြန်မာနိုင်ငံ၏ လူ့အခွင့်အရေးဆိုင်ရာ အထူးအစီရင်ခံစာတင်သွင်းသူက ယနေ့ (ဧပြီ ၁၉) တွင် တိုက်တွန်းလိုက်သည်။ 

“ကာကွယ်ပေးဖို့ တာဝန်ရှိမှုဆိုတာဟာ အခုအတိုင်းပဲ ဆက်ဖြစ်နေမယ်ဆိုရင် ဒုက္ခသည်အကျပ်အတည်းအတွက် ပြင်ဆင်ထားဖို့ မလွဲမသွေလုပ်ရမှာပါ။ ဒီလူမဆန်တဲ့လုပ်ရပ်ကြောင့် အသက်လုထွက်ပြေးနေရတဲ့သူတွေကို အိမ်နီးချင်းနိုင်ငံတွေက ဝင်ရောက်ခွင့်ပြုဖို့ ပြည်သူတွေရဲ့ အခြေခံအခွင့်အရေးကို လေးစားရမယ်ဆိုတာကို ကျွန်တော်တို့ အသေအချာလုပ်ဖို့ လိုအပ်ပါတယ်” ဟု အထူးအစီရင်ခံစာတင်သွင်းသူ Tom Andrews က UN News နှင့် တွေ့ဆုံစဉ် ပြောသည်။

ဆက်လက်၍ ၎င်းက “နောက်ပြီး ဒုက္ခသည်တွေကို စောင့်ရှောက်ထားတဲ့ အဲဒီနိုင်ငံတွေကို နိုင်ငံတကာအသိုက်အဝန်းက ကူညီပံ့ပိုးဖို့ လိုအပ်တယ်လို့ ထင်ပါတယ်။ ဒါဟာ ကာကွယ်ပေးဖို့တာဝန်ရှိမှုအတွက် လုပ်ဆောင်ရမယ့်အချက်တွေပါပဲ” ဟု ဆိုသည်။

Tom Andrews သည် မြန်မာပြည်သူလူထုကို အိမ်နီးချင်းနိုင်ငံများနှင့် နိုင်ငံတကာအသိုင်းအဝိုင်းက ကာကွယ်ပေးရန်တာဝန်ရှိမှု(R2P)ကို လုပ်ဆောင်ရန် တိုက်တွန်းခဲ့ပြီး စစ်ရေးအရကြားဝင်မှုကို ထောက်ခံခြင်းမပြုခဲ့ပေ။

လက်ရှိတွင် ရာနှင့်ချီသော မြန်မာပြည်သူများ ထိုင်းနှင့် အိန္ဒိယနိုင်ငံဘက်သို့ ထွက်ပြေးတိမ်းရှောင်မှုများရှိနေပြီး တစ်ဖက်နိုင်ငံများက ပြန်လည်နှင်ထုတ်မှုများ၊ လက်မခံမှုများနှင့်လည်း ရင်ဆိုင်နေရသည်။

စစ်ရေးအရထိပ်တိုက်တွေ့ဆုံမှုသည် မှားယွင်းသည့် လုပ်ဆောင်ချက်ဖြစ်နိုင်ပြီး ယခုမြင်တွေ့ရသည်ထက် ပိုမိုကြောက်မက်ဖွယ် လူမဆန်သည့် လုပ်ရပ်များကို ပိုမိုကျူးလွန်ကာ အပြစ်မဲ့ဘဝဆုံးရှုံးမှုများ သိသာစွာ တိုးမြင့်လာနိုင်ပြီး ထိုသို့စစ်ရေးအရ ထိပ်တိုက်တွေ့ဆုံမှုကို ရှောင်ရှားရမည်ဟု အထူးအစီရင်ခံစာတင်သွင်းသူ Tom Andrews က ဆိုသည်။

မြန်မာ့အရေးနှင့်ပတ်သက်၍ ကမ္ဘာ့နိုင်ငံများက ညီညွတ်စွာ၊ ရှင်းလင်းစွာ၊ အတူတကွ ချိတ်ဆက်ပြီး အရေးယူမှုများလုပ်ဆောင်ရန် လွန်စွာအရေးကြီးပြီး အာဏာသိမ်းစစ်ကောင်စီကို အထီးကျန်စေခြင်းကို တိုးမြှင့်ကာ ပြည်ထောင်စုလွှတ်တော်ကိုယ်စားပြုကော်မတီ (CRPH)နှင့် ပိုမိုနီးကပ်စွာ အလုပ်လုပ်ရန်လည်း ၎င်းက တိုက်တွန်းသည်။

ထို့ပြင် အကြမ်းမဖက်အာဏာဖီဆန်ရေးလှုပ်ရှားမှု (CDM)နှင့် နိုင်ငံကို မှန်ကန်စွာ ကာကွယ်ခုခံရန် ကြိုးပမ်းနေသူများကို တိုက်ခိုက်ခြင်းထက် ပိုမိုနီးကပ်စွာ လုပ်ဆောင်ကြရန် ၎င်းက တိုက်တွန်းသည်။

ဖေဖော်ဝါရီ ၁ ရက်တွင် စစ်တပ်က အာဏာသိမ်းပြီးနောက်ပိုင်း ငြိမ်းချမ်းစွာဆန္ဒပြသူများကို လုံခြုံရေးတပ်ဖွဲ့ဝင်များက ဖြိုခွင်းသတ်ဖြတ်ခဲ့ရာ လူပေါင်း ၇၀၀ ကျော် သေဆုံးခဲ့ပြီး စစ်တပ်၏ အကြမ်းဖက်မှုကြောင့် လူရာပေါင်းများစွာလည်း အိမ်နီးချင်းနိုင်ငံများသို့ ထွက်ပြေးတိမ်းရှောင်နေရကြောင်း ကုလသမဂ္ဂ၏ ဝက်ဘ်ဆိုက်စာမျက်နှာတွင် ဖော်ပြထားသည်။