ထရမ့်မိတ်ဆွေ၏ဆေးအဖွဲ့ကို  စစ်ခေါင်းဆောင် သွားတွေ့၊ အမေရိကန်ကို ကျေးဇူးစကားဆို

အမေရိကန်သမ္မတဒေါ်နယ်ထရမ့်နှင့် နီးစပ်မှုရှိသလို    ခရစ်ယာန်ဘာသာသို့ ကူးပြောင်းရေး စည်းရုံးသိမ်းသွင်းတတ်သော အမေရိကန်အခြေစိုက် အကူအညီပေးရေး အဖွဲ့အစည်း   Samaritan’s Purse မှတစ်ဆင့် ပေးအပ်သည့် လူသားချင်းစာနာထောက်ထားမှု ဆိုင်ရာအကူအညီများအတွက် အမေရိကန်အစိုးရကို ကျေးဇူးတင်ကြောင်း မြန်မာစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က  ဧပြီ ၉ ရက်နေ့က ပြောကြားခဲ့သည်။ 

နေပြည်တော် ဇဗ္ဗူသီရိမြို့နယ်၌ ဖွင့်လှစ်ထားသော အဆိုပါ ခရစ်ယာန်ဘာသာရေးအဖွဲ့၏ မြေပြင်ရွှေ့ပြောင်းဆေးရုံသို့ ထိုနေ့က  သွားရောက်စဉ် မြေငလျင်ကြောင့် ထိခိုက်ဒဏ်ရာရသူများကို ကြည့်ရှုခဲ့သလို အမေရိကန်၊  မြန်မာဆေးကုသရေးအဖွဲ့များနှင့်လည်း တွေ့ဆုံခဲ့ကြောင်း စစ်ကောင်စီဝါဒဖြန့် မီဒီယာများတွင် ဖော်ပြထားသည်။

  “အမေရိကန်၏ လူသားချင်းစာနာထောက်ထားမှုဆိုင်ရာအကူအညီများ အချိန်မီ ပေးခြင်းနှင့် စာနာထောက်ထားသော ဆောင်ရွက်မှုများအတွက် မြန်မာပြည်သူများကိုယ်စား စိတ်ရင်းမှန်ဖြင့် ကျေးဇူးပါသည်” ဟု စစ်ခေါင်းဆောင်က ပြောကြားခဲ့ကြောင်း  သတင်းများတွင် ရေးထားသည်။ 

နေပြည်တော် ဘောလုံးကွင်းတစ်ခုတွင် စစ်တပ်က ပေးသော ကွန်တိန်နာများဖြင့် Samaritan’s Purse အဖွဲ့က တည်ဆောက်ထားသည့် မြေပြင်ဆေးရုံသည် ဧပြီ ၇ရက်နေ့မှစတင်၍ လူနာများကို ကုသပေးခဲ့သည်။ 

အဆိုပါဆေးရုံတွင် ယခုချိန်ထိ  ခွဲစိတ်မှုပေါင်း ၂၀ ပြုလုပ်ပြီးဖြစ်ကာ ပြင်ပလူနာဝန်ဆောင်မှုများ၊ အရေးပေါ်စောင့်ရှောက်မှုများနှင့် ခွဲစိတ်ကုသမှုများကို ဆောင်ရွက်ပေးလျက်ရှိကြောင်း တာဝန်ရှိသူများက ပြောကြားသည်။ အထူးကြပ်မတ်ကုသဆောင်နှင့် နောက်ထပ်ခွဲစိတ်ခန်း ၂ခန်းကို ဧပြီလ ၁၀ ရက်နေ့တွင် ဖွင့်လှစ်ရန် စီစဉ်ထားကြောင်း သိရှိရသည်။ 

ထိုအဖွဲ့၏ နိုင်ငံတကာကျန်းမာရေးစောင့်ရှောက်မှုဌာန ညွှန်ကြားရေးမှူး ဒေါက်တာ အီလီယက် တန်ပင်နီက စစ်ခေါင်းဆောင်ကို ဆေးကုသမှုလုပ်ငန်းများအကြောင်း   ရှင်းပြခဲ့ပြီး မြန်မာအာဏာပိုင်များ ပံ့ပိုးပေးသော ထောက်ပံ့ပို့ဆောင်ရေးနှင့် အုပ်ချုပ်ရေးအဖွဲ့အစည်းများ၏  အကူအညီများအတွက် ကျေးဇူးတင်ကြောင်း ပြောကြားခဲ့သည်။ 

စစ်ခေါင်းဆောင်က အမေရိကန်အစိုးရကို ကျေးဇူးတင်ကြောင်း ပြောကြားခဲ့သော်လည်း အမေရိကန်နိုင်ငံခြားရေးဌာန ပြောရေးဆိုခွင့်ရှိသူတစ်ဦးက ၎င်းတို့အနေဖြင့်  မြန်မာနိုင်ငံတွင် ရောက်ရှိနေသော Samaritan’s Purse အဖွဲ့၏ လုပ်ငန်းများအတွက် ရန်ပုံငွေထောက်ပံ့ပေးထားခြင်း မရှိကြောင်း ပြောကြားသည်။ 

“မြေပြင်မှာ အဖွဲ့အစည်းအများအပြားက  ကူညီပေးနေတာ   မြင်တွေ့ရတဲ့အတွက်   ဝမ်းသာပါတယ်” ဟု အဆိုပါ ပြောရေးဆိုခွင့်ရှိသူက ပြောကြားခဲ့သည်။

မြန်မာပြည်ငလျင်အတွက် အမေရိကန်အစိုးရကပေးသော ငွေများကို ၎င်းတို့အဖွဲ့က ရရှိနေခြင်းရှိမရှိ Myanmar Now ကမေးမြန်းရာ Samaritan’s Purse ၏ ပြောရေးဆိုခွင့်ရှိသူတစ်ဦးက ၎င်းတို့အဖွဲ့အစည်းကို  “အမေရိကန်နှင့် ကမ္ဘာ့နိုင်ငံများရှိ ခရစ်ယာန်ထောင်ပေါင်းများစွာတို့က ထောက်ပံ့ထားပါတယ်”  ဟု ပြန်လည် ဖြေကြားခဲ့သည်။ 

သမ္မတထရမ့်အစိုးရလက်ထက် ကမ္ဘာတစ်ဝှမ်းရှိ နိုင်ငံခြားအကူအညီအားလုံးနီးပါးကို ဖြတ်တောက်လိုက်ခြင်းကြောင့် မြန်မာနိုင်ငံ၏ လူသားချင်းစာနာထောက်ထားမှုဆိုင်ရာ အစီအစဉ်များအပေါ်တွင်လည်း ပြင်းထန်စွာထိခိုက်ခဲ့ချိန်  စစ်ခေါင်းဆောင်က  အမေရိကန်အစိုးရကို အကူအညီပေးခြင်းအတွက် ကျေးဇူးတင်ကြောင်း ထုတ်ဖော် ပြောကြားလိုက်ခြင်းဖြစ်သည်။

Myanmar Now က ဖတ်ရှုခွင့်ရသည့် အမေရိကန်နိုင်ငံတကာဖွံ့ဖြိုးမှုကူညီရေးအဖွဲ့ USAID ၏ ယခုနှစ် မတ်လ ၂၄ ရက်စွဲပါ  မှတ်တမ်းတစ်ခုတွင် အမေရိကန်က မြန်မာနိုင်ငံအတွက် အကူအညီပေးရန် စာချုပ် ချုပ်ဆိုထားပြီးသော သဘောတူညီမှုများ၏   ၇၅ ရာခိုင်နှုန်းကို ဖြတ်တောက်ခဲ့ကြောင်း ဖော်ပြထားသည်။ 

Samaritan’s Purse အဖွဲ့ကို ထင်ရှားသည့်  ခရစ်ယာန် ဘုန်းတော်ကြီး ဖရန်ကလင်ဂရေဟမ် ဦးဆောင်နေသည်၊  ရှေးရိုးစွဲခရစ်ယာန်ဘာသာသို့ စည်းရုံးသိမ်းသွင်းရေးနှင့်  လူသားချင်းစာနာထောက်ထားမှု လုပ်ငန်းတို့ကို ရောယှက်ဆောင်ရွက်နေသလို  အဆိုပါ ဘုန်းတော်ကြီး ဂရေဟမ်၏ တစ်နှစ်လစာ  အမေရိကန်ဒေါ်လာ ၈၀၀,၀၀၀ ကျော်သည်လည်း မေးခွန်းထုတ်စရာဖြစ်နေသည်။  

 Samaritan’s Purse က ယခုအချိန် အကူအညီများ လာရောက်ပေးချိန်တွင် တစ်ချိန်က အဖွဲ့ခေါင်းဆောင်ဘုန်းတော်ကြီး ဂရေဟမ် မြန်မာနိုင်ငံနှင့်ပတ်သက်၍  ပြောကြားခဲ့သည့် မှတ်ချက်များ ပြန်လည်ထွက်ပေါ်လာခဲ့သည်။

  ၂၀၁၅ ခုနှစ်တွင် မြန်မာနိုင်ငံသို့လာရောက် လည်ပတ်စဉ်က  မြန်မာနိုင်ငံသည် ခရစ်ယာန်ဘာသာ၏ ကယ်တင်ခြင်းကို လိုအပ်သော ဗုဒ္ဓဘာသာဝင်အများအပြားနေထိုင်သည့် နိုင်ငံဖြစ်ကြောင်း သူက ပြောကြားခဲ့သည်။

 “ကမ္ဘာပေါ်မှာ ဗုဒ္ဓဘာသာတွေရဲ့ သက်တမ်း အရှည်ကြာဆုံး  ရွှေတိဂုံစေတီတော်ကိုလည်း ရောက်ရှိခဲ့ပါတယ်။ အသက်မဲ့ရုပ်တုတွေကို လူအများအပြား ဆုတောင်းနေတာကို မြင်တွေ့ရတာဟာ  သခင်ယေရှုခရစ်တော်ရဲ့ သေခြင်းတရားနဲ့ ရှင်ပြန်ထမြောက်ခြင်းအားဖြင့် ကယ်တင်ခြင်း သတင်းစကားကို အလျင်အမြန် ပြောကြားပေးဖို့လိုအပ်နေကြောင်း စိတ်နှလုံးထိခိုက်စရာ ကောင်းလောက်အောင် သတိပြုမိစေပါတယ်” ဟု ဂရေဟမ်က သူ၏ Facebook တွင် ထိုစဉ်က ရေးသားခဲ့သည်။ 

အဆိုပါ ရေးသားချက်သည် မြန်မာနိုင်ငံတွင် ၁၉ ရာစုက ဗြိတိသျှကိုလိုနီအရာရှိအချို့  ဗုဒ္ဓဘာသာအား ရုပ်တုကိုးကွယ်ရာမိစ္ဆာဝါဒအဖြစ် ရေးသားခဲ့ပုံများကို ပြန်ပြောင်းအောက်မေ့စေသည်။ 

ထို့ပြင် ၎င်းက သမ္မတထရမ့်အစိုးရ၏ နိုင်ငံခြားအကူအညီများကို ဖြတ်တောက်မှု ပြန်လည်သုံးသပ်ခြင်း ဆုံးဖြတ်ချက်ကို ကောင်းမွန်သည့် လုပ်ရပ်အဖြစ် ချီးကျူးခဲ့သူဖြစ်သည်၊ သို့ရာတွင် အမေရိကန်အစိုးရက အသက်ကယ်ဆယ်ရေးလုပ်ငန်းများ၊ စားနပ်ရိက္ခာနှင့် ဆေးဘက်ဆိုင်ရာအကူအညီများ နိုင်ငံတကာတွင် ဆက်လက်ပေးနေခြင်းကိုလည်း ထောက်ခံသူဖြစ်သည်ဟု ၎င်း၏အဖွဲ့က Myanmar Now ကို ပြောကြားသည်။  

ဂရေဟမ်သည် ဒေါ်နယ်ထရမ့်၏ နီးကပ်သော မဟာမိတ်ဖြစ်သလို သမ္မတ သက်တမ်း ၂ ကြိမ်စလုံး၌  ကျမ်းသစ္စာကျိန်ဆိုပွဲများတွင်  ဆုတောင်းခြင်းကို ဦးဆောင်ခဲ့သည်။ ၎င်းက  အစ္စလာမ်ဘာသာကို မိစ္ဆာဘာသာဟု ခေါ်ဆိုခဲ့ဖူးသလို   LGBTQI+ အခွင့်အရေးများနောက်ကွယ်တွင် မကောင်းဆိုးဝါး စေတန်ရှိသည်ဟု ပြောဆိုခြင်းတို့ကြောင့် ဝေဖန်မှုများခံခဲ့ရသည်။ 

မြန်မာနိုင်ငံတွင် မတ်လ ၂၈ ရက် ငလျင်လှုပ်ခတ်ပြီးနောက်  အမေရိကန်အစိုးရက  လူသားချင်းစာနာထောက်ထားမှုဆိုင်ရာ မိတ်ဖက်အဖွဲ့များကတစ်ဆင့် ဒေါ်လာ ၂ သန်း ရန်ပုံငွေထောက်ပံ့ကြောင်း ကြေညာခဲ့သည်။ 

ဧပြီလ ၄ ရက်နေ့တွင် ကုလသမဂ္ဂကမ္ဘာ့စားနပ်ရိက္ခာအစီအစဉ်၊ နိုင်ငံတကာ ရွှေ့ပြောင်းသွားလာမှုများအဖွဲ့နှင့် အမည်ဖော်ပြမထားသည့် အစိုးရမဟုတ်သောအဖွဲ့အစည်းများကို   နောက်ထပ် ဒေါ်လာ ၇ သန်း ပေးမည်ဟု ထပ်မံကြေညာခဲ့သည်။