တိုက်ပွဲတွေနီးကပ်လာတဲ့ စစ်တက္ကသိုလ်တွေအခြေစိုက်ရာ မေမြို့ ခေါ် ပြင်ဦးလွင်မှာ စစ်ဖြစ်လာနိုင်တဲ့ အရိပ်အယောင်တွေကြောင့် မန္တလေးဘက်ကို လူအများအပြား ထွက်ပြေးတိမ်းရှောင်လာကြပါတယ်။ ပြင်ဦးလွင်မြို့ထဲ နေရာတချို့မှာ ဈေးဆိုင်တွေ ပိတ်ထားကြပြီး မြို့အထွက် ဝက်ဝံစစ်ဆေးရေးဂိတ်ကစပြီး ပြင်ဦးလွင်-နောင်ချိုလမ်း မြို့အဝင်အထွက်ကိုလည်း သြဂုတ်လ စစ်တပ်က ပိတ်လိုက်တယ်လို့ မြို့ခံတွေက ပြောပါတယ်။ စစ်တပ်မိသားစုတချို့လည်း ပြင်ဦးလွင်မြို့ကနေ စတင်ပြောင်းရွှေ့နေကြပြီး ကိုယ်ပိုင်ကားရှိသူတွေနဲ့ အရာရှိတပ်မိသားစုဝင်တချို့ဟာ မိသားစုဝင်တွေ ရှိရာ နေရာတွေနဲ့ တိုက်ပွဲတွေမရှိတဲ့ နေပြည်တော်အပါအဝင် မြို့ကြီးတွေကို စတင်ပြောင်းရွှေ့နေကြတယ်လို့ တပ်မိသားစုဝင်တွေဆီကနေ သိရပါတယ်။ ပြင်ဦးလွင်မြို့နယ်ထဲက ရတနာပုံဆိုက်ဘာစီးတီးတက္ကသိုလ်ဝင်းထဲ စစ်ကောင်စီတပ်က ဩဂုတ် ၇ ရက်နေ့ ဝင်ရောက်တပ်စွဲခဲ့ပါတယ်။ အဲ့ဒီနေရာဟာ မန္တလေးမြို့ကို အပေါ်စီးကနေ မြင်ရပြီး စစ်ရေးအရ အသာစီးနေရာရဖို့ စစ်တပ်က ဝင်ရောက်နေရာယူတာ ဖြစ်နိုင်တယ်လို့ ဒေသခံတွေက ပြောပါတယ်။ သတင်း၊ တင်ဆက် – နေမင်းနီ၊ မြတ်ကြီး
