မန္တလေး – ကျောင်းတွင်းလုံခြုံရေးနှင့် သန့်ရှင်းရေး တိုးမြှင့်ပေးရန် မန္တလေးမြို့ ရတနာပုံ တက္ကသိုလ်ရှေ့ တွင် ဇန်နဝါရီ ၂ရက် ယနေ့နံနက်ပိုင်းက ဆန္ဒပြခဲ့ကြသည့် ကျောင်းသား ၄ ဦး အား အရပ်ဝတ်လုံခြုံရေးတပ်ဖွဲ့ဝင်များက ထိန်းသိမ်းလိုက်သည်။
၂၀၁၈ ဒီဇင်ဘာ ၂၈ တွင် တက္ကသိုလ်ရှေ့ ဆန္ဒပြခဲ့ကြသည့် ကျောင်းသား ၃ ဦး ဖမ်းခံခဲ့ရပြီးနောက် ၎င်းတို့ ၄ ဦး ထပ်မံဖမ်းခံရခြင်းဖြစ်သည်။
“ကျွန်တော်တို့ဟာ မန်းတိုင်းအစိုးရနဲ့ကျောင်းအုပ်ချုပ်ရေးကို ညှိနှိုင်းရေးအဆင့်ဆင့်သွားခဲ့တယ်။ တက္ကသိုလ်ကျောင်းတစ်ခုရဲ့ အခြေခံရပိုင်ခွင့်ထဲမှာ တက္တသိုလ်နယ်မြေဆိုတာ ဒုစရိုက်ကင်းစင်တဲ့ နယ်မြေဖြစ်ရမယ်၊ လုယက်မှုကင်းစင်နယ်မြေဖြစ်ရမယ်၊ စသဖြင့် အခြေခံရပိုင်ခွင့်တွေရှိတယ်” ဟု ရတနာပုံတက္ကသိုလ်(ဗကသ)မှ ကိုဘချစ်ကပြောသည်။
ကျောင်းသား ၂၀၀၀၀ ကျော်နှင့် ဆရာ ၇၀၀ ကျော်ဖြင့် လည်ပတ်နေသည့် အဆိုပါ တက္ကသ်ိုလ်တွင် လုံခြုံရေး ၃၀ ခန့်သာရှိကြောင်း၊ ကျောင်းလုံခြုံရေး တိုးမြှင့်ပေးရန် နိုင်ဝင်ဘာနှင့် ဒီဇင်ဘာ လများတွင် လေးကြိမ် ဆန္ဒ ပြခဲ့သော်လည်း သက်ဆိုင်ရာက ဖြေရှင်းပေးရန်ပျက်ကွက်နေပြီး တောင်းဆိုကြသည့်ကျောင်းသားသုံးဦးအား ဖမ်းဆီးခဲ့သည်ဟု ဆန္ဒပြကျောင်းသားတစ်ဦးဖြစ်သည့် ကိုဘုန်းမြင့်ကျော်ကပြောသည်။
ကျောင်းသားများနှင့် ထိပ်တိုက်တွေ့နေသည့် ပြဿနာကို ပြေလည်ရန် အကြိမ်ကြိမ်ညှိနှိုင်းခဲ့ပြီး ပူးပေါင်းဆောင်ရွက်ရန်လည်း ကမ်းလှမ်းထားသော် မအောင်မြင်ခဲ့ကြောင်း ရတနာပုံတက္ကသိုလ် ပါမောက္ခချုပ်ဒေါက်တာမောင်မောင်နိုင်ကပြောသည်။
“ကျွန်တော်သူတို့ကို အစအဆုံးရှင်းပြထားပြီးသားပါ။ ဒီဟာတွေခန့်လို့မရသေးဘူး ဒီလိုအကြောင်းတွေရှိတယ် ဝန်ထမ်းမိသားစုတွေအတွက်အဆောက်အအုံတွေပေးရမယ်။ ခန့်လို့မရသေးဘူး သူတို့ကိုရှင်းပြပြီးသားပါ။ ကျန်တဲ့ကလေးတွေကအိမ်သာသန့်ရှင်းတွေလုပ်တယ် အမှိုက်ကောက်တယ် အဲ့ထဲမှာသူတို့မပါဘူး ပူးပေါင်းဆောင်ရွက်ကြဖို့အကြိမ်ကြိမ်ပြောတယ် ” ဟု ၎င်းကပြောသည်။
