ဓာတ်ပုံအက်ဆေး

ဒုက္ခသည်စခန်းထဲမှ ပျော်ရွှင်မှု

ကချင်ပြည်နယ်၊ မြစ်ကြီးနားမြို့နယ်ရှိ ရွှေဇက်စစ်ရှောင်စခန်းတွင် ဒီဇင်ဘာလ ၂၉ ရက်နေ့က ခရစ္စမတ်ပွဲတော် ဆက်လက် ကျင်းပနေသည်ကို တွေ့ရသည်။

၂၀၁၁ ခုနှစ်က စတင် ပေါ်ပေါက်လာသည့် ရွှေဇက်စခန်းတွင် အိမ်ထောင် ၉၅ စု၊ လူဦးရေ ၅၅၃ ဦး ခိုလှုံ နေထိုင်လျက်ရှိသည်။ အများစုမှာ တာလောကြီး ၊ အင်ပေါင်၊ နန်ဆန်ယန် ဒေသတို့မှ ရောက်ရှိလာကြသူများဖြစ်သည်။ မိဘများ နေရပ်ရင်း မတူညီကြသော်လည်း ကလေးငယ် အများအပြားမှာ ဤစခန်းတွင် မွေးဖွားလာသူများ ဖြစ်သည်။

 နေရပ်ပြန်ရမည့်နေ့ မရေရာကြသော်လည်း ခရစ္စမတ်ပွဲတော်ကာလတွင် စခန်းတွင် နေထိုင်သူ အများအပြား ကြည်နူး ပျော်ရွှင်နေကြသည် (ဓာတ်ပုံ – ရွှေပေါ်မြတင်)

စစ်ရှောင်စခန်းတွင် ခရစ္စမတ်ပွဲတော်ကို နှစ်စဉ်ကျင်းပလေ့ရှိသည်။ ပွဲတော်အတွင်း တရားဒေသနာ ဟောကြားခြင်း၊ ပျော်ပွဲရွှင်ပွဲများ၊ ပြဇာတ်၊ ကလေးငယ်တို့၏ဖျော်ဖြေမှုများ၊ ကချင်ရိုးရာအကများ၊ ကချင်တိုင်းရင်းသား အဆိုတော်တို့၏ တင်ဆက်မှုများကို တွေ့ရသည်။

 ဝတ်ပြုဆုတောင်းမှု မြင်ကွင်းတစ်ခု (ဓာတ်ပုံ – ရွှေပေါ်မြတင်)

ဒီဇင်ဘာ၂၅ မှ ၃၁ အထိကို ပွဲတော်ကာလဟု သတ်မှတ်ထားကြောင်း သိရသည်။ ဒီဇင်ဘာ၂၅ ခရစ္စမတ်နေ့အစီအစဉ်ကို ခရစ်ယာန်အသင်းတော်က ဦးဆောင် ပြုလုပ်ပြီး ကျန်နေ့များတွင် ကူညီလှူဒါန်းသူ ရှိပါက ပွဲတော်ကို စည်စည်ကားကား ပြုလုပ်နိုင်မည်ဖြစ်သည်။

ခရစ္စမတ်သီချင်းတစ်ပုဒ်ဖြင့် ဖျော်ဖြေနေသည့် ကလေးငယ်တစ်ဦး (ဓာတ်ပုံ – ရွှေပေါ်မြတင်)

နေရပ်စွန့်ခွာ တိမ်းရှောင်သူတို့ ခိုလှုံရာစခန်းတွင်း အနာဂတ် မရေရာသောကြောင့် နေရပ်ပြန်ရမည့်နေ့ကို ခန့်မှန်းနိုင်ကြခြင်း မရှိပေ။ ပျော်ရွှင်စရာ နည်းပါးသည့် စစ်ရှောင်စခန်းတွင် နေထိုင်သူ ကလေး၊ လူကြီးတို့အတွက် ခရစ္စမတ်အချိန်ကာလသည် ကြည်နူးဝမ်းသာမှုများနှင့်အတူ ရောက်ရှိလာလေသည်။

ရွှေဇက်စစ်ရှောင်စခန်း ခရစ္စမတ်ပွဲတော်မှ ကလေးများ၏ တင်ဆက်မှု (ဓာတ်ပုံ – ရွှေပေါ်မြတင်)

 

ဓမ္မသီချင်းတစ်ပုဒ် ဝိုင်းဝန်း သီဆိုနေကြသော ဒေသခံတချို့ (ဓာတ်ပုံ – ရွှေပေါ်မြတင်)
ခေတ်ပေါ်အကဖြင့် ဖျော်ဖြေနေသည့် ကချင်တိုင်းရင်းသူ ကလေးငယ်များ (ဓာတ်ပုံ – ရွှေပေါ်မြတင်)

Show More

Related Articles

Back to top button