စစ်ကိုင်းတိုင်း၊ ကနီမြို့နယ်၊ လာပို့ရွာအနီးရှိ စစ်ကောင်စီ ဆက်သွယ်ရေးတပ်စခန်းကို ကာကွယ်ရေးပူးပေါင်းအဖွဲ့များက နှစ်ရက်တိုင် တိုက်ခိုက်ပြီးနောက် နိုဝင်ဘာ ၂၃ ရက်နေ့တွင် သိမ်းပိုက်ရရှိခဲ့ကြောင်း အမှတ် ၁ စစ်ဒေသရုံးက ယနေ့ (နိုဝင်ဘာ ၂၅) တွင် ထုတ်ပြန်သည်။
မုံရွာ-ယာကြီး-ကလေးဝလမ်းပေါ် လာပို့ရွာအနီးရှိ စစ်ကောင်စီတပ်ဖွဲ့ဝင် အင်အား ၃၀ နီးပါး တပ်စွဲထားသည့် ဆက်သွယ်ရေးတပ်စခန်းကုန်းကို နိုဝင်ဘာ ၂၂ ရက်နေ့ နံနက်ပိုင်းမှ စတင်တိုက်ခိုက်ခဲ့ပြီး နောက်ရက်တွင် သိမ်းပိုက်နိုင်ခဲ့ကြောင်း အမှတ် ၁ စစ်ဒေသရုံးက ထုတ်ပြန်သည်။
စစ်ကောင်စီတပ်သည် ကုန်းပေါ်တွင် နေရာယူထားပြီး လက်နက်အင်အားပြည့်စုံသဖြင့် စခန်းသိမ်းပိုက်နိုင်ရန် ၂ ရက်ကြာ တိုက်ခိုက်ခဲ့ရသည်ဟု ကာကွယ်ရေးအဖွဲ့ဝင်တစ်ဦးက သုံးသပ်သည်။
“သူတို့မှာ လူအင်အားတော့ နည်းတယ်။ လက်နက်အင်အားကောင်းတယ်။ ကုန်းပေါ်ကနေ လက်နက်အပြည့်အစုံရှိတယ်။ ငါးကြင်းမြီး ၂ လက်ရှိတယ်။ စစ်လက်နက်ပစ္စည်းကောင်းကောင်းရှိတာပေါ့” ဟု ကာကွယ်ရေးအဖွဲ့ဝင်တစ်ဦးက ပြောသည်။
ထိုတိုက်ပွဲတွင် စစ်ကောင်စီ တပ်ဖွဲ့ဝင် ၁ ဦး သေဆုံးပြီး ၁၁ ဦး ထိခိုက်ဒဏ်ရာရရှိခဲ့ကာ သေနတ် ၁ လက်အပါအဝင် လက်နက်ခဲယမ်းများ သိမ်းဆည်းရမိသည်ဟု အမှတ် ၁ စစ်ဒေသရုံးက ထုတ်ပြန်သည်။
စခန်းကို ကာကွယ်ရေးအဖွဲ့များက စတင်တိုက်ခိုက်သည့်နေ့တွင် စစ်ကောင်စီက လေကြောင်းမှ ဗုံးဖြင့် ၃ ကြိမ်တိုင်တိုင် တိုက်ခိုက်ခဲ့ကြောင်း ဒေသကာကွယ်ရေးအဖွဲ့များထံမှ သိရသည်။
စခန်းသိမ်းတိုက်ပွဲစတင်သည့် နိုဝင်ဘာ ၂၂ ရက်က ပစ်ခတ်မှုအတွင်း ကာကွယ်ရေးအဖွဲ့ဝင် ၂ ဦး သေဆုံးပြီး၊ နောက်တစ်ရက် နံနက်ပိုင်းတိုက်ပွဲတွင် ကာကွယ်ရေးအဖွဲ့ဝင် ၁ ဦး သေဆုံးခဲ့ကြောင်း သိရသည်။
ချင်းတွင်းမြစ်အနောက်ဘက်ကမ်းရှိ ကနီမြို့သည် မြစ်တဖက်ကမ်း အနောက်မြောက်တိုင်းစစ်ဌာနချုပ်တည်ရှိရာ မုံရွာမြို့နှင့် မိုင် ၄၀ ခန့်သာ ကွာဝေးပြီး ကားဖြင့် သွားလာပါက ၂ နာရီနီးပါးသာ ကြာမြင့်သည်။
တော်လှန်ရေးအဖွဲ့များ နယ်မြေစိုးမိုးမှုအားကောင်းရာ ကနီမြို့နယ်တွင် စစ်ကောင်စီတပ်က မြို့ပေါ်ရှိ ရဲစခန်း၊ အထွေထွေအုပ်ချုပ်ရေးရုံး၊ ရွှေစည်းခုံတောင်ပေါ်တို့တွင် တပ်စွဲထားပြီး မြို့ပြင်ပတွင် မုံရွာ-ယာကြီး-ကလေးဝ လမ်းပေါ်ရှိ တာဝါတိုင်စခန်းနှင့် ရေလည်ကျွန်းရွာတို့တွင်အထိုင်ချထားကြောင်း ဒေသကာကွယ်ရေးအဖွဲ့များထံမှ သိရသည်။
မုံရွာ-ယာကြီး-ကလေးဝ ကားလမ်း မိုင်တိုင် ၄၉ အနီးရှိ တာဝါတိုင်စခန်းမှ စစ်ကောင်စီ စခန်းကို ယခုနှစ် ဧပြီ ၁၇ ရက်နေ့တွင် ကာကွယ်ရေးအဖွဲ့များက တိုက်ခိုက်သိမ်းပိုက်ပြီး လက်နက်ခဲယမ်းများရရှိခဲ့သည်။ ထိုတာဝါတိုင်စခန်းကို သိမ်းပိုက်ပြီးနောက် ကာကွယ်ရေးအဖွဲ့များ ပြန်လည်ဆုတ်ခွာပြီး ရက်ပိုင်းတွင်ပင် စစ်တပ်က ထိုနေရာတွင် ပြန်လည်တပ်စွဲထားခြင်းဖြစ်သည်။
